ନୂଆଦିଲ୍ଲୀ: ସିରିଆ ଉପରେ ଇସ୍ରାଏଲର ଆକ୍ରମଣ। ରାଜଧାନୀ ଡାମାସକସର ଦକ୍ଷିଣ ଅଞ୍ଚଳରେ IDFର ଡ୍ରୋନ୍ ଆକ୍ରମଣରେ ୬ ସିରିଆ ସୈନିକଙ୍କ ମୃତ୍ୟୁ ହୋଇଛି। ଅନେକ ଆହତ ହୋଇଛନ୍ତି। ଏହି ସୂଚନା ସିରିଆର ସରକାରୀ ଗଣମାଧ୍ୟମ ଏବଂ ଏକ ଯୁଦ୍ଧ ପର୍ଯ୍ୟବେକ୍ଷଣ ସଂଗଠନ ଦେଇଛି। ମଙ୍ଗଳବାର ଡାମାସକସର ଦକ୍ଷିଣ ଉପକଣ୍ଠ କିସୱାରେ ଏହି ଆକ୍ରମଣ ହୋଇଥିଲା। ଇସ୍ରାଏଲୀ ସେନା ଏପର୍ଯ୍ୟନ୍ତ ଏହି ଆକ୍ରମଣ ଉପରେ କୌଣସି ସରକାରୀ ମନ୍ତବ୍ୟ ଦେଇନାହିଁ।
ଡିସେମ୍ବର ୨୦୨୪ରେ ସିରିଆର ରାଷ୍ଟ୍ରପତି ବଶର ଅଲ-ଆସାଦଙ୍କ କ୍ଷମତାରୁ ପତନ ପରଠାରୁ ଇସ୍ରାଏଲ ସିରିଆର ବିଭିନ୍ନ ସ୍ଥାନରେ ଶହ ଶହ ଏଯାର ଏବଂ ଡ୍ରୋନ୍ ଆକ୍ରମଣ କରିଛି। ଏହି ଆକ୍ରମଣରେ ସିରିଆ ସେନାର ଅନେକ ସମ୍ପତ୍ତି ଏବଂ ଘାଟି ନଷ୍ଟ ହୋଇଯାଇଛି।
ୟୁକେସ୍ଥିତ ସଂଗଠନ ସିରିଆନ୍ ଅବଜରଭେଟୋରୀ ଫର ହ୍ୟୁମାନ୍ ରାଇଟ୍ସ (SOHR) କହିଛି ଯେ ମଙ୍ଗଳବାର ହୋଇଥିବା ଆକ୍ରମଣ ଡାମାସକସ ଏବଂ ଦକ୍ଷିଣ ପ୍ରଦେଶ ସ୍ୱେଇଡାକୁ ସଂଯୋଗ କରୁଥିବା ଅଞ୍ଚଳରେ ହୋଇଥିଲା। ଏହି ସ୍ୱେଇଡାରେ ଗତ ମାସରେ ଭୟଙ୍କର ସଂଘର୍ଷ ହୋଇଥିଲା ଯେଉଁଠାରେ ସରକାର ସମର୍ଥକ ବନ୍ଧୁକଧାରୀ ଏବଂ ଡ୍ରୁଜ୍ ସଂଖ୍ୟାଲଘୁ ଲଢ଼ୁଆଙ୍କ ମଧ୍ୟରେ ସଂଘର୍ଷ ହୋଇଥିଲା। ଇସ୍ରାଏଲ ସେହି ସଂଘର୍ଷରେ ଡ୍ରୁଜ୍ ଯୋଦ୍ଧାଙ୍କୁ ସମର୍ଥନ କରିଥିଲା। ଡ୍ରୁଜ୍ ସମ୍ପ୍ରଦାୟ ମଧ୍ୟ ଇସ୍ରାଏଲରେ ବହୁ ସଂଖ୍ୟାରେ ବାସ କରନ୍ତି ଏବଂ ଦେଶର ସେନାରେ ସକ୍ରିୟ ଭାବରେ ଅଂଶଗ୍ରହଣ କରନ୍ତି।
ସିରିଆନ୍ ଅବଜରଭେଟୋରୀ କହିଛି ଯେ ଏହି ଅଞ୍ଚଳରେ ଅନେକ ଡ୍ରୋନ୍ ଆକ୍ରମଣ କରାଯାଇଥିଲା। ଉଦ୍ଧାର କର୍ମୀ ଏବଂ ଆମ୍ବୁଲାନ୍ସ ଘଟଣାସ୍ଥଳକୁ ପହଞ୍ଚି ସାରିଥିବା ବେଳେ ଗୋଟିଏ ଆକ୍ରମଣ ହୋଇଥିଲା। ମୋଟ ଛଅ ଜଣ ସୈନିକଙ୍କ ମୃତ୍ୟୁ ହୋଇଥିଲା ଏବଂ ଅତି କମରେ ତିନି ଜଣ ଆହତ ହୋଇଥିଲେ। ଏହା ବ୍ୟତୀତ, ମଙ୍ଗଳବାର ଦିନ ଦକ୍ଷିଣ ସହର କୁନାଇଟ୍ରା ନିକଟରେ ଇସ୍ରାଏଲୀ ଡ୍ରୋନ୍ ମଧ୍ୟ ଆକ୍ରମଣ କରିଥିଲା। ଏହି ଆକ୍ରମଣରେ ଜଣେ ବ୍ୟକ୍ତିଙ୍କ ମୃତ୍ୟୁ ହୋଇଥିଲା। ଅନ୍ୟପକ୍ଷରେ, ସିରିଆର ବୈଦେଶିକ ମନ୍ତ୍ରଣାଳୟ କୁନାଇଟ୍ରା ଉପରେ ଆକ୍ରମଣକୁ କଡ଼ା ନିନ୍ଦା କରିଛି। ମନ୍ତ୍ରଣାଳୟ କହିଛି ଯେ ଏହି ଆକ୍ରମଣ ଅନ୍ତର୍ଜାତୀୟ ଆଇନର ଉଲ୍ଲଂଘନ ଏବଂ ସମଗ୍ର ଅଞ୍ଚଳର ଶାନ୍ତି ଏବଂ ସ୍ଥିରତା ପାଇଁ ବିପଦ।
