ନୂଆଦିଲ୍ଲୀ: ଉତ୍ତରଗାଜରେ ଇସ୍ରାଏଲ୍ର ଘାତକ ଆକ୍ରମଣରେ ହମାସର ଶୀର୍ଷ ନୌସେନା କମାଣ୍ଡର ରାମଜି ସାଲେହଙ୍କ ମୃତ୍ୟୁ ହୋଇଛି। ଏହି ଆକ୍ରମଣ ଗାଜା ସହରରେ ହୋଇଥିଲା ଏବଂ ଏଥିରେ ଅନ୍ୟ ଦୁଇ ଜଣ ହମାସ ଯୋଦ୍ଧା ହିଶାମ ମନସୁର (ଡେପୁଟି ମୋର୍ଟାର ମୁଖ୍ୟ) ଏବଂ ନିସିମ ଆବୁ ସବା (ମୋର୍ଟାର ୟୁନିଟ୍ ଅପରେଟିଭ୍) ମଧ୍ୟ ପ୍ରାଣ ହରାଇଛନ୍ତି।ଏନେଇ ଇସ୍ରାଏଲ ପ୍ରତିରକ୍ଷା ବଳ(ଆଇଡିଏପ୍) ଟ୍ୱିଟ୍ କରି ସୂଚନା ଦେଇଛି।
ଇସ୍ରାଏଲ ସାଲେହଙ୍କୁ ଆତଙ୍କବାଦୀ ବୋଲି କହିବା ସହ ଇସ୍ରାଏଲ ସମ୍ପର୍କରେ ସବୁ ସୂଚନା ରଖୁଥିଲା ବୋଲି କହିଛି। ଇସ୍ରାଏଲୀ ସେନା ବିରୁଦ୍ଧରେ ସମୁଦ୍ର ଆକ୍ରମଣ ଯୋଜନା କରୁଥିଲେ ବୋଲି ଆଇଡିଏଫ୍ ଟ୍ୱିଟ୍ କରିଛି।
ଇସ୍ରାଏଲ ହମାସର ନେତାମାନଙ୍କୁ ଟାର୍ଗେଟ୍ କରି ହତ୍ୟା କରି ଚାଲିଛି। ନିକଟରେ ଇସ୍ରାଏଲ୍ ହମାସର ଶୀର୍ଷ ସାମରିକ ମୁଖ୍ୟ ମହମ୍ମଦ ଦୈଫ୍ ଏବଂ ହମାସର ପୂର୍ବତନ ନେତାଙ୍କ ଭାଇ ଏବଂ ଜଣେ ପ୍ରମୁଖ କମାଣ୍ଡର ମହମ୍ମଦ ସିନୱାରଙ୍କ ହତ୍ୟା କରିଥିଲା ବୋଲି ସୂଚନା ଦେଇଥିଲା। ହମାସର ଯୁଦ୍ଧ କରିବାର କ୍ଷମତାକୁ ଦୁର୍ବଳ କରିବା ପାଇଁ ଇସ୍ରାଏଲ୍ ଏହି ଟାର୍ଗେଟ୍ କିଲିଂ ଚଳାଇଛି।
ସୂଚନା ଥାଉକି ଗାଜା ପାଇଁ ଯୁଦ୍ଧ ବିନାଶକାରୀ ହୋଇଛି। ୧୮ ମାର୍ଚ୍ଚରେ ପୁଣି ଥରେ ଯୁଦ୍ଧ ଆରମ୍ଭ ହେବା ପରଠାରୁ, ୬,୮୬୦ ରୁ ଅଧିକ ପାଲେଷ୍ଟାଇନୀଙ୍କ ମୃତ୍ୟୁ ହୋଇଛି ଏବଂ ୨୪,୨୨୦ ଆହତ ହୋଇଛନ୍ତି। ଅକ୍ଟୋବର ୨୦୨୩ ପରଠାରୁ ମୋଟ ପାଲେଷ୍ଟାଇନୀଙ୍କ ମୃତ୍ୟୁ ସଂଖ୍ୟା ୫୭,୪୧୮ ହୋଇଥିବା ବେଳେ ୧୩୬,୨୬୧, ଆହତ ହୋଇଛନ୍ତି। ଇସ୍ରାଏଲ କହିଛି ଯେ ଏହାର ଆକ୍ରମଣ ସାଧାରଣ ନାଗରିକଙ୍କୁ ଏଡାଇବା ପାଇଁ ଚେଷ୍ଟା କରୁଛି, କିନ୍ତୁ ଏଥିର ସାଧାରଣ ଲୋକଙ୍କର ବହୁ ସଂଖ୍ୟାରେ ମୃତ୍ୟୁ ହେଉଛି।
ଯୁଦ୍ଧରେ ଗାଜାର ପ୍ରାୟ ସମସ୍ତ ୨୩ ଲକ୍ଷ ଲୋକ ବାସହୀନ ହୋଇପଡ଼ିଛନ୍ତି। ସମ୍ପ୍ରତି ଏକ ଅସ୍ଥିର ଯୁଦ୍ଧବିରତି ଯୋଗୁ କିଛି ସାହାଯ୍ୟ ଏବଂ କଏଦୀ ଅଦଳବଦଳ ସମ୍ଭବ ହୋଇଥିଲା, କିନ୍ତୁ ସଂଘର୍ଷ ଜାରି ରହିଛି। ହମାସ ଏବେ ବି ଗାଜାର କିଛି ସ୍ଥାନରେ ଇସ୍ରାଏଲ ବିରୋଧୀ କାର୍ଯ୍ୟର ପରିଚାଳନା ଜାରି ରଖିଛି। ଏହାର ନେତାମାନଙ୍କର ହତ୍ୟା ସତ୍ୱେ ଲଢ଼ିବାକୁ ପ୍ରତିଜ୍ଞା କରିଛି।
