ଗୋଟିଏ ଓଭରରେ ୧୩ଟି ବଲ୍ ପକାଇଲେ ଅର୍ଶଦୀପ, ରାଗି ଗଲେ ଗମ୍ଭୀର

ଚଣ୍ଡିଗଡ଼: ଅର୍ଶଦୀପ ସିଂହ ଟି-୨୦ ଅନ୍ତର୍ଜାତୀୟ ମ୍ୟାଚରେ ଗୋଟିଏ ଓଭରରେ ସର୍ବାଧିକ ବଲ ପକାଇଥିବା ବୋଲର ହୋଇଛନ୍ତି। ସେ ଦକ୍ଷିଣ ଆଫ୍ରିକା ବିପକ୍ଷ ଦ୍ୱିତୀୟ ଟି-୨୦ରେ ୧୩ ବଲ୍ ବିଶିଷ୍ଟ ଏକ ଓଭର ସହିତ ନବୀନ-ଉଲ୍-ହକ୍ ଙ୍କ ସହ ସମକକ୍ଷ ହୋଇଛନ୍ତି । ଏହି ଓଭରରେ ଅର୍ଶଦୀପ ୧୮ ରନ୍ ଦେଇଥିଲେ। ପ୍ରଥମ ଟି-୨୦ରେ ଅର୍ଶଦୀପ ସିଂହ ଭଲ ପ୍ରଦର୍ଶନ କରିଥିଲେ । କିନ୍ତୁ ଦ୍ୱିତୀୟ ମ୍ୟାଚ୍ରେ ତାଙ୍କ ପାଖରେ ସେହି ଗତି ନଥିଲା। ସୂର୍ଯ୍ୟକୁମାର ଯାଦବ ଟସ୍ ଜିତି ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିଲେ।

ଦକ୍ଷିଣ ଆଫ୍ରିକା ଇନିଂସର ୧୧ତମ ଓଭରରେ ଅର୍ଶଦୀପ ସିଂହ ୭ଟି ୱାଇଡ୍ ବଲ୍ ପକାଇଥିଲେ । ୭ଟି ୱାଇଡ୍ ଏବଂ ୬ଟି ବଲ୍, ଫଳରେ ଗୋଟିଏ ଓଭରରେ ମୋଟ ୧୩ଟି ବଲ୍ ପକାଇଥିଲେ ଅର୍ଶଦୀପ । ଏହି ଓଭରରେ ସେ ୧୮ ରନ୍ ଦେଇଥିଲେ। ଭାରତୀୟ ଟିମ୍ର ବୋଲର ଭାବରେ ଅର୍ଶଦୀପ ସିଂହ ଗୋଟିଏ ଓଭରରେ ସର୍ବାଧିକ ବଲ୍ ପକାଇ ଏକ ଅଲୋଡ଼ା ରେକର୍ଡ ନିଜ ନାଁରେ କରିଛନ୍ତି ।

ଆଫଗାନିସ୍ତାନର ନବୀନ ଉଲ୍ ହକ୍ ୨୦୨୪ ମସିହାରେ ଜିମ୍ବାୱେ ବିପକ୍ଷରେ ଗୋଟିଏ ଓଭରରେ ୧୩ଟି ବଲ୍ ପକାଇଥିଲେ। ଅର୍ଶଦୀପଙ୍କ ଓଭରଟି ଛକା ସହିତ ଆରମ୍ଭ ହୋଇଥିଲା। ଅର୍ଶଦୀପ ସିଂହ ଲଗାତାର ତୃତୀୟ ଥର ୱାଇଡ୍ ବୋଲିଂ ପକାଇବା ପରେ, ମୁଖ୍ୟ ପ୍ରଶିକ୍ଷକ ଗୌତମ ଗମ୍ଭୀର ବିରକ୍ତ ହୋଇଯାଇ ଥିଲେ । ତାଙ୍କର ପ୍ରତିକ୍ରିୟା ସୋସିଆଲ ମିଡିଆରେ ଭାଇରାଲ ହେଉଛି ।

ପ୍ରଥମେ ବ୍ୟାଟିଂ କରି ଦକ୍ଷିଣ ଆଫ୍ରିକା ୨୧୩ ରନ୍ କରିଥିଲା । କ୍ୱିଣ୍ଟନ୍ ଡି କକ୍ ଦ୍ରୁତ ୯୦ ରନ୍ କରିଥିଲେ। ଆଶ୍ଚର୍ଯ୍ୟଜନକ ଭାବରେ, ଅର୍ଶଦୀପ ସିଂହ ଏବଂ ଜସପ୍ରିତ ବୁମରାହ ୱିକେଟ୍ ନେଇପାରି ନଥିଲେ । ବହୁତ ରନ୍ ମଧ୍ୟ ଦେଇଥିଲେ। ଅର୍ଶଦୀପ ତାଙ୍କ ୪ ଓଭରରେ ୫୪ ରନ୍ ଦେଇଥିଲେ, ବୁମରା ତାଙ୍କ ୪ ଓଭରରେ ୪୫ ରନ୍ ଦେଇଥିଲେ। ବରୁଣ ଚକ୍ରବର୍ତ୍ତୀ ୪ ଓଭରରେ ୨୯ ରନ ଦେଇ ୨ଟି ୱିକେଟ୍ ନେଇଥିଲେ । ଅକ୍ଷର ପଟେଲ ଗୋଟିଏ ୱିକେଟ୍ ନେଇଥିଲେ। ହାର୍ଦ୍ଦିକ ପାଣ୍ଡ୍ୟା ୩ ଓଭରରେ ୩୪ ରନ ଦେଇଥିଲେ । ଶିବମ୍ ଦୁବେ ୨ ଓଭରରେ ୧୮ ରନ ଦେଇଥିଲେ।