ନୂଆଦିଲ୍ଲୀ ୧୭।୦୭: ଭାରତର ‘ସ୍ଲିପ୍ ଚାମ୍ପିଅନ୍ ଅଫ୍ ଦ ଇୟର’ ଟାଇଟଲ୍ ଜିତିଛନ୍ତି ପୁନେର ଆଇପିଏସ୍ ପ୍ରତ୍ୟାଶୀ ପୂଜା ମାଧବ ୱାଭହଲ। ଫର୍ନିଚର୍ ବ୍ରାଣ୍ଡ୍ ୱେକ୍ଫିଟ୍ ପକ୍ଷରୁ ବେଙ୍ଗାଲୁରୁରେ ଆୟୋଜିତ ୬୦ ଦିନିଆ ନିଦ ଇଣ୍ଟର୍ନସିପ୍ରେ ପ୍ରତିଯୋଗିତା କରି ସେ ଏହି ଟାଇଟଲ୍ର ଅଧିକାରିଣୀ ହୋଇଛନ୍ତି । ୧୪ ଅନ୍ୟ ଚୂଡ଼ାନ୍ତ ପ୍ରତିଯୋଗୀଙ୍କୁ ପଛରେ ପକାଇ ସେ ଶୀର୍ଷ ସ୍ଥାନ ହାସଲ କରିଛନ୍ତି । ପ୍ରତ୍ୟେକ ରାତିରେ ହାରାହାରି ୯ ଘଣ୍ଟା ଶୋଇ ସେ ୯.୧ ଲକ୍ଷ ଟଙ୍କା ପୁରସ୍କାର ଲାଭ କରିଛନ୍ତି ।
ଭାରତରେ ବଢୁଥିବା ନିଦ୍ରାଭାବ ଉପରେ ସଚେତନତା ସୃଷ୍ଟି ଏହି ନିଦ ଇଣ୍ଟର୍ନସିପ୍ର ଉଦ୍ଦେଶ୍ୟ । ସ୍ଲିପ୍ ଇଣ୍ଟର୍ନସିପ୍ର ଏହା ଥିଲା ୪ର୍ଥ ସଂସ୍କରଣ । ୧ ଲକ୍ଷରୁ ଅଧିକ ପ୍ରତିଯୋଗୀ ଏହି କାର୍ଯ୍ୟକ୍ରମ ପାଇଁ ଆବେଦନ କରିଥିଲେ । କିନ୍ତୁ ୧୫ ଜଣ ପ୍ରତିଯୋଗୀଙ୍କୁ ଚୟନ କରାଯାଇଥିଲା । ସମସ୍ତଙ୍କୁ ୱେକ୍ଫିଟ୍ ବ୍ରାଣ୍ଡ୍ର ଗଦି ପ୍ରଦାନ କରାଯାଇଥିଲା । ପ୍ରତି ରାତିରେ ସେମାନଙ୍କ ନିଦ୍ରା ଅଭ୍ୟାସ ଉପରେ ନଜର ରଖିବାକୁ ଏକ କଣ୍ଟାକ୍ଟଲେସ୍ ସ୍ଲିପ୍ ଟ୍ରାକର୍ ବି ଦିଆଯାଇଥିଲା । ଇଣ୍ଟର୍ନସିପ୍ ସମୟରେ ପ୍ରତିଯୋଗୀମାନେ ନିଦ୍ରା-ବୃଦ୍ଧିକାରୀ କର୍ମଶାଳାରେ ଅଂଶଗ୍ରହଣ କରିଥିଲେ । ଉତ୍ତମ ନିଦ୍ରା ଅଭ୍ୟାସର ପ୍ରୋତ୍ସାହନ ଲାଗି ଦୈନିକ ଚାଲେଞ୍ଜ୍ ମଧ୍ୟ ସ୍ଥିର କରାଯାଇଥିଲା । ପ୍ରତିଯୋଗୀଙ୍କୁ କିଛି ମଜାଦାର କାମ ଦିଆଯାଇଥିଲା । ଆଖିରେ ଅନ୍ଧପୁଟୁଳି ବାନ୍ଧି ବିଛଣା ପ୍ରସ୍ତୁତ କରିବା, ଆଲାର୍ମ ଘଡ଼ି ଖୋଜିବା ଏବଂ ଶେଷରେ ସେମାନଙ୍କ ଶୃଙ୍ଖଳା ଓ ଧୈର୍ଯ୍ୟ ପରୀକ୍ଷା ଲାଗି ନିଦ୍ରା ଅବକାଶ ଦିଆଯାଇଥିଲା ।
ପୂଜା ଅନ୍ୟ ପ୍ରତିଯୋଗୀଙ୍କୁ ପଛରେ ପକାଇ ୯୧.୩୬ ସ୍କୋର୍ କଲେ ଏବଂ ଟାଇଟଲ୍ ସହିତ ନଗଦ ପୁରସ୍କାର ଜିତିଲେ । ଇଣ୍ଟର୍ନସିପ୍ରେ ପ୍ରତିଯୋଗିତା କରିଥିବା ସମସ୍ତ ୧୫ ଜଣଙ୍କୁ ସେମାନଙ୍କ ପ୍ରୟାସ ଲାଗି ୧ ଲକ୍ଷ ଟଙ୍କା ଲେଖାଏଁ ପୁରସ୍କାର ପ୍ରଦାନ କରାଗଲା । ଉଲ୍ଲେଖଯୋଗ୍ୟ, ଇଣ୍ଟର୍ନସିପ୍ର ପ୍ରଥମ ସଂସ୍କରଣ ୨୦୧୯ରେ ଆରମ୍ଭ ହୋଇଥିଲା । ୪ର୍ଥ ସଂସ୍କରଣ ଶେଷ ହେବା ସହିତ ଏହା ଲକ୍ଷାଧିକ ଆବେଦନକାରୀଙ୍କ ଧ୍ୟାନ ଆକର୍ଷଣ କରିଛି । ପ୍ରତି ବର୍ଷ ଚୟନ ହୋଇଥିବା ପ୍ରତିଯୋଗୀ ବା ‘ସ୍ଲିପ୍ ଇଣ୍ଟର୍ନ’ଙ୍କୁ ଲଗାତାର ୬୦ ଦିନ ପାଇଁ ପ୍ରତି ରାତିରେ ଅତିକମ୍ରେ ୯ ଘଣ୍ଟା ଶୋଇବା ପାଇଁ ଟଙ୍କା ଦିଆଯାଏ । ଏହାର ଉଦ୍ଦେଶ୍ୟ ନିଦ ଗୁଣବତ୍ତାକୁ ଯାଞ୍ଚ୍ କରିବା ।
