ଖଣ୍ଡଗିରି ଏବେ ନିସ୍ତବ୍ଦ.. ଶୁଭୁନି ସଂଳାପ,୧୪ଦିନରେ ୧୨କୋଟିରୁ ଅଧିକ ଟଙ୍କାର ବେପାର

ଭୁବନେଶ୍ୱର ୦୯।୦୨ : ଶୁଭୁନି ସଂଳାପ । ଅନ୍ଧାର ହୋଇଯାଇଛି ଯାତ୍ରା ପଡିଆ । ରାତି ହେଲେ ଯେଉଁଠିକି ହଜାର ହଜାର ଦର୍ଶକ ଆସୁଥିଲେ, ତାହା ଏବେ ନିରବ ନିସ୍ତବ୍ଦ ପାଲଟିଛି । ଏବେ ସଂଳାପ ବଦଳରେ ଶୁଭୁଛି ଝିଙ୍କାରୀର ଝିଁ ଝିଁ ଶବ୍ଦ । ପୂରା ପରିବେଶ ଶାନ୍ତ । ଯାତ୍ରା ମଣ୍ଡପରେ ଖାଲି ବାଉଁଶ ପୋତା ହୋଇଛି । ମୁକୁଳା ପଡ଼ିଛି ଟିକେଟ୍ କାଉଣ୍ଟର । ରାତି ୧୦ଟା ବେଳକୁ ସବୁ ଦୋକାନ ବନ୍ଦ । ପାର୍କିଂର ଗହଳି ବି ନାହିଁ । କାଁ ଭାଁ ଗୋଟେ ଗୋଟେ ଗାଡ଼ି ଗଡ଼ୁଥିଲା ଖଣ୍ଡଗିରି ପାନ୍ଥିକା ଅଭିମୁଖେ । ଟ୍ରାଫିକ୍ ଟେନ୍ସନ ନଥିଲା । ଯାତ୍ରା କମିଟି ସଦସ୍ୟ ବି ନଥିଲେ ।

ଏ ଖବର ବି ପଢନ୍ତୁ:- ସରିଲା ଖଣ୍ଡଗିରି ଯାତ୍ରା ମହାକୁମ୍ଭ, ସାଇ-ପାୟଲ-ନାଣ୍ଡୁଙ୍କ ପାଇଁ ହଙ୍ଗାମା, ଟିକେଟ ଟଙ୍କା ଫେରାଗଲା

ତେବେ ଦୀର୍ଘ ୧୪ ଦିନ ଧରି ଖଣ୍ଡଗିରିରେ ଲାଗି ରହିଥିବା ଗହଳିଚହଳି ଆଉ ନାହିଁ । ଚଳିତବର୍ଷ ମେଳା ଓ ଯାତ୍ରାକୁ ମିଶାଇ ୧୨କୋଟିରୁ ଊଦ୍ଧ୍ୱର୍ ଟଙ୍କାର ବେପାର ହୋଇଛି । ଯାତ୍ରାରେ ୫କୋଟିର ବେପାର ହୋଇଥିବା ବେଳେ ଅବଶିଷ୍ଟ ମେଳାରେ ପଡ଼ିଥିବା ବଜାରରୁ ହୋଇଥିବା ଆୟୋଜକ କମିଟି ସୂଚନା ଦେଇଛି । ପୂର୍ବବର୍ଷ ଅପେକ୍ଷା ଜାନୁଆରୀ ୨୫ ମାଘସପ୍ତମୀ ଠାରୁ ଆରମ୍ଭ ହୋଇଥିଲା ଖଣ୍ଡଗିରି କୁମ୍ଭମେଳା । ଏକାଠି ହୋଇଥିଲେ ଶହ ଶହ ସାଧୁସନ୍ଥ । ଖଣ୍ଡଗିରି, ଉଦୟଗିରି ପାହାଡ଼ର ସୁନ୍ଦର ପରିବେଶ ମଧ୍ୟରେ ସାଧୁସନ୍ଥଙ୍କ ଦ୍ୱାରା ବେଦ, ଭାଗବତ, ମନ୍ତ୍ର ଧ୍ୱନିରେ ମୁଣ୍ଡିଆ ପ୍ରତିଧ୍ୱନିତ ହେଉଥିଲା । ମାଘ ପୂର୍ଣ୍ଣିମାରେ ମହାଯଜ୍ଞରେ ପୂର୍ଣ୍ଣାହୁତି ଦେବା ପରେ ବାହୁଡ଼ିଗଲେ ସାଧୁସନ୍ଥ । ଖଣ୍ଡଗିରି-ଉଦୟଗିରି ମହୋତ୍ସବ ବି ସରିଲା । ଯାତ୍ରା ମହାକୁମ୍ଭର ସମାପ୍ତି ଘଟିଲା । ଗତମାସ ୨୭ ତାରିଖ ଠାରୁ ଚଳିତମାସ ୭ ତାରିଖ ପର୍ଯ୍ୟନ୍ତ ଯାତ୍ରା ମହାକୁମ୍ଭରେ ଖଣ୍ଡଗିରି ମେଳା ପଡ଼ିଆରେ ୭ଟି ମଣ୍ଡପରେ ୧୫ଟି ନାମକରା ଅପେରା ପାର୍ଟି ନାଟକ ପ୍ରଦର୍ଶନ କରିଥିଲେ । ସବୁ ପାର୍ଟି ମଧ୍ୟରେ ନାଟକକୁ ନେଇ ଚାଲିଥିଲା ଘମାଘୋଟ ଲଢ଼େଇ । ଯାତ୍ରା ସଂଳାପରେ ଦୁଲୁକୁଥିଲା ସମଗ୍ର ଖଣ୍ଡଗିରି ଅଞ୍ଚଳ । ୧୪ ଦିନ ଧରି ଗହଳି ସହ ଖାପ ଖୁଆଇ ଯାଇଥିବା ସ୍ଥାନୀୟ ଲୋକଙ୍କୁ ଏବେ ଖାଁ ଖାଁ ଲାଗୁଛି ଖଣ୍ଡଗିରି ।  ଅଳିଆରେ ଭର୍ତ୍ତି ପାଦଦେଶ ମେଳା ଓ ଯାତ୍ରା ସରିଗଲା । ହେଲେ ଅଳିଆ ହଟିଲାନି । ଯାତ୍ରା ମଞ୍ଚଠୁ ଖଣ୍ଡଗିରି ପାନ୍ଥିକା ପର୍ଯ୍ୟନ୍ତ, ଏପରିକି ରାସ୍ତା କଡ଼ରେ ଜମି ରହିଛି କୁଢ଼କୁଢ଼ ଅଳିଆ, ଆବର୍ଜନା । ସମ୍ପୂର୍ଣ୍ଣ ପରିବେଶ ଅସ୍ୱାସ୍ଥ୍ୟକର ହୋଇ ପଡ଼ିଛି । ମୂତ୍ର ଗନ୍ଧରେ ନାକ ଫାଟି ପଡ଼ୁଛି । କେଉଁଠି ଦହିବରା ଠୁଙ୍ଗା ପଡ଼ିଛି ତ ଆଉ କେଉଁଠି ଖଲିପତ୍ର, ଜରି ଗଦା ହୋଇଛି । ବିଭିନ୍ନ ମଣ୍ଡପ ତଳେ ଖାଲି ପଲିଥିନ୍ ଓ ଅନ୍ୟାନ୍ୟ ଜରି ଉଡ଼ୁଛି । ଏବେବି ଗ୍ରାହକଙ୍କ ଅପେକ୍ଷାରେ ଖଣ୍ଡଗିରି ଯାତ୍ରାରେ ଉଠା ଦୋକାନୀଙ୍କ ମେଳି ଜମିଥିଲା । ଶହ ଶହ ଦୋକାନୀ ମେଳାକୁ ନିଜ ନିଜର ପସରା ନେଇ ଆସିଥିଲେ । ବିଏମ୍ସି ଠାରୁ ପିଣ୍ଡି କିଣି ପସରା ମେଲାଇଥିଲେ । ଏବେ ମେଳା ଓ ଯାତ୍ରା ସରି ଯାଇଛି । କିଛି ଦୋକାନୀ ଅନ୍ୟତ୍ର ଚାଲି ଯାଇଥିବା ବେଳେ କିଛି ଦୋକାନୀ ଏବେ ବି ପସରା ମେଲାଇ ବସିଛନ୍ତି । ଆଉ ଦୁଇତିନି ଦିନ ପର୍ଯ୍ୟନ୍ତ ଏଠି ଏମିତି କାଁ ଭାଁ ଗୋଟେ ଯୋଡ଼େ ପସରା ଦେଖିବାକୁ ମିଳିବ । ଏହାପରେ ସମସ୍ତେ ଜାଗର ମେଳା ଲାଗି ରାଜ୍ୟର ବିଭିନ୍ନ ପ୍ରାନ୍ତକୁ ଚାଲିଯିବେ ।

ଏ ଖବର ବି ପଢନ୍ତୁ:- ଇରାନ୍‌ ଜେଲ୍‌ରେ ବନ୍ଦୀ ନୋବେଲ ବିଜେତାଙ୍କୁ ପୁଣି ଜେଲ୍‌ଦଣ୍ଡ, କଣ କହିଲେ ଆଇନଜୀବୀ