ନୂଆଦିଲ୍ଲୀ: ଭାରତର ସାମଗ୍ରିକ ଅର୍ଥନୈତିକ ସ୍ଥିରତାକୁ ଏକ ପ୍ରମୁଖ ପ୍ରୋତ୍ସାହନ ସ୍ୱରୂପ, ଉପଭୋକ୍ତା ମୂଲ୍ୟ ସୂଚକାଙ୍କ (ସିପିଆଇ) ଉପରେ ଆଧାରିତ ଖୁଚୁରା ମୁଦ୍ରାସ୍ଫୀତି ଜୁନ୍ ୨୦୨୫ରେ ୨.୧% କୁ ହ୍ରାସ ପାଇଛି। ଯାହା ଗତ ଛଅ ବର୍ଷ ମଧ୍ୟରେ ସର୍ବନିମ୍ନ। ପରିସଂଖ୍ୟାନ ଏବଂ କାର୍ଯ୍ୟକ୍ରମ କାର୍ଯ୍ୟାନ୍ୱୟନ ମନ୍ତ୍ରଣାଳୟ ଅନୁଯାୟୀ, ମେ ୨୦୨୫ ରେ ଖୁଚୁରା ମୁଦ୍ରାସ୍ଫୀତି ୨.୮୨% ଥିଲା। ଏଥିରେ ତୀବ୍ର ହ୍ରାସ ମୁଖ୍ୟତଃ ଖାଦ୍ୟ ମୂଲ୍ୟ, ବିଶେଷକରି ପନିପରିବା, ଡାଲି ଏବଂ ମସଲା ମୂଲ୍ୟରେ ଯଥେଷ୍ଟ ହ୍ରାସ ଯୋଗୁ ହୋଇଛି।

ସେହିପରି ପାଇକାରୀ ମୁଦ୍ରାସ୍ଫୀତି ହାର (ହୋଲେସଲ୍ ମୂଲ୍ୟ ସୂଚକାଙ୍କ - WPI ଉପରେ ଆଧାରିତ) ଶୂନ୍ୟ ତଳେ 0.୧୩ ପ୍ରତିଶତରେ ପହଞ୍ଚିଛି। ଏହି ଏକକାଳୀନ ଦ୍ୱିଗୁଣିତ ହ୍ରାସ ଭାରତୀୟ ଅର୍ଥନୀତି ପାଇଁ ଅନେକ ସକାରାତ୍ମକ ପ୍ରଭାବ ପକାଇଛି। ଚଳିତ ବର୍ଷ ପ୍ରଥମ ଥର ପାଇଁ ପାଇକାରୀ ମୁଦ୍ରାସ୍ଫୀତି ହାର ଶୂନ୍ୟ ତଳକୁ ୦.୧୩ ପ୍ରତିଶତରେ ହ୍ରାସ ପାଇଛି। ଏହା ଗତ ୧୪ ମାସ ମଧ୍ୟରେ ସର୍ବନିମ୍ନ ସ୍ତର। ଏହାକୁ ଡିଫ୍ଲେସନ ପରିସ୍ଥିତି କୁହାଯାଏ, ଯେଉଁଠାରେ ସାମଗ୍ରୀର ମୂଲ୍ୟ ପାଇକାରୀ ସ୍ତରରେ ହ୍ରାସ ପାଉଛି।

ପାଇକାରୀ ମୁଦ୍ରାସ୍ଫୀତି ନେଇ ଶିଳ୍ପ ମନ୍ତ୍ରଣାଳୟ କହିଛି ଯେ ଏହି ହ୍ରାସ ମୁଖ୍ୟତଃ ଖାଦ୍ୟ ସାମଗ୍ରୀ, ଖଣିଜ ତୈଳ, ମୌଳିକ ଧାତୁ ଉତ୍ପାଦନ, ଅଶୋଧିତ ପେଟ୍ରୋଲିୟମ ଏବଂ ପ୍ରାକୃତିକ ଗ୍ୟାସର ମୂଲ୍ୟ କମ ହେବା ଯୋଗୁ ହୋଇଛି। ଏହା ଉତ୍ପାଦକମାନଙ୍କ ପାଇଁ ଇନପୁଟ୍ ଖର୍ଚ୍ଚ ହ୍ରାସ କରିବ। ଏହା କମ୍ପାନୀଗୁଡ଼ିକର ଲାଭ ପରିମାଣ ବୃଦ୍ଧି ସହିତ ଉତ୍ପାଦନକୁ ବୃଦ୍ଧି କରିପାରିବ। ସେହିପରି ଜୁନ୍ ମାସରେ ଇନ୍ଧନ ଏବଂ ବିଦ୍ୟୁତ୍ ମଧ୍ୟ ୨.୬୫ ପ୍ରତିଶତ ହ୍ରାସ ପାଇଛି। ଯେତେବେଳେ ମ୍ୟାନୁଫେକ୍ଚରିଂ ଉତ୍ପାଦର ମୁଦ୍ରାସ୍ଫୀତି ହାର ୧.୯୭ ପ୍ରତିଶତ ରହିଥିଲା। 

ଆରବିଆଇ ମୁଖ୍ୟତଃ ତା’ର ମୁଦ୍ରାନୀତି ନିଷ୍ପତ୍ତି ନେବା ସମୟରେ ଖୁଚୁରା ମୁଦ୍ରାସ୍ଫୀତି (CPI)କୁ ବିଚାରକୁ ନେଇଥାଏ। ଦୁଇଟି ପ୍ରମୁଖ ମୁଦ୍ରାସ୍ଫୀତି ସୂଚକରେ ଏତେ ବଡ଼ ହ୍ରାସ ଆରବିଆଇକୁ ସୁଧ ହାର ଆହୁରି ହ୍ରାସ କରିବା ପାଇଁ ପର୍ଯ୍ୟାପ୍ତ ସୁଯୋଗ ଦେବ। ଗତ ମାସରେ ହିଁ, ରିଜର୍ଭ ବ୍ୟାଙ୍କ ନୀତିଗତ ସୁଧ ହାର ୦.୫୦ ପ୍ରତିଶତ ହ୍ରାସ କରି ୫.୫୦ ପ୍ରତିଶତ କରିଥିଲା। ବର୍ତ୍ତମାନର ସଂଖ୍ୟା ଆଗାମୀ ମୁଦ୍ରାନୀତି ସମୀକ୍ଷାରେ ଆରବିଆଇ ସୁଧ ହାର ଆହୁରି ହ୍ରାସ କରିବାର ସମ୍ଭାବନାକୁ ବୃଦ୍ଧି  ପାଇଛି। କମ ସୁଧ ହାର ଋଣକୁ ଶସ୍ତା କରିଥାଏ। ଏହା ବ୍ୟବସାୟ ପାଇଁ ନିବେଶ କରିବା ଏବଂ ଗ୍ରାହକମାନଙ୍କ ପାଇଁ ଖର୍ଚ୍ଚ କରିବା ସହଜ କରିଥାଏ। ଏହା ଅର୍ଥନୈତିକ ଅଭିବୃଦ୍ଧିକୁ ତ୍ୱରାନ୍ୱିତ କରିପାରିବ।