ଦିନିକିଆରେ ବଦଲା ନେଇପାରିବ କି ଟିମ୍ ଇଣ୍ଡିଆ ? ୧୦ ବର୍ଷ ହେଲା ଭାରତରେ ସିରିଜ୍ ଜିତିନି ଦକ୍ଷିଣ ଆଫ୍ରିକା

ନୂଆଦିଲ୍ଲୀ: ଦକ୍ଷିଣ ଆଫ୍ରିକା ୨୫ ବର୍ଷ ପରେ ଭାରତରେ ଟେଷ୍ଟ ସିରିଜ ଜିତିଛି । ୨-୦ରେ ବିଜୟ ସହିତ ସିରିଜ୍ କ୍ଲିନ୍ ସୁଇପ୍ କରିଛି। ଦୁଇ ଦଳ ମଧ୍ୟରେ ତିନି ମ୍ୟାଚ୍ ବିଶିଷ୍ଟ ଦିନିକିଆ ସିରିଜ୍ ନଭେମ୍ବର ୩୦ ତାରିଖରେ ରାଞ୍ଚିରେ ଆରମ୍ଭ ହେବ। ଅଭିଜ୍ଞ ରୋହିତ ଶର୍ମା ଏବଂ ବିରାଟ କୋହଲି ଏହି ସିରିଜ୍ ଖେଳିବେ । ଏହି ସିରିଜ୍ରେ ଭାରତ ଟେଷ୍ଟ ସରିଜ୍ ପରାଜୟର ପ୍ରତିଶୋଧ ନେବାକୁ ଚେଷ୍ଟା କରିବ । ଏହା ପୂର୍ବରୁ ଭାରତ ଟି-୨୦ ବିଶ୍ବକପ-୨୦୨୪ ଫାଇନାଲ୍ରେ ଦକ୍ଷିଣ ଆଫ୍ରିକାକୁ ୭ ରନରେ ପରାସ୍ତ କରି ଟ୍ରଫି ଜିତିଥିଲା। ଟିମ୍ ଇଣ୍ଡିଆ ଚତୁର୍ଥ ଥର ପାଇଁ ସୀମିତ ଓଭର ବିଶ୍ୱକପ ଜିତିଥିଲା । କିନ୍ତୁ ଦକ୍ଷିଣ ଆଫ୍ରିକାକୁ ପ୍ରଥମ ଟାଇଟଲ ପାଇବାରୁ ବଞ୍ଚିତ କରିଥିଲା। ସେହି ମ୍ୟାଚ୍ ପରେ ପ୍ରାୟ ଦେଢ଼ ବର୍ଷ ପରେ, ଦୁଇ ଦଳ ମୁହାଁମୁହିଁ ହୋଇଥିଲେ। ଦକ୍ଷିଣ ଆଫ୍ରିକା ପରାଜୟର ପ୍ରତିଶୋଧ ନେଇ ଭାରତରେ ଆୟୋଜିତ ଟେଷ୍ଟ ସିରିଜରେ ଟିମ୍ ଇଣ୍ଡିଆକୁ ପରାସ୍ତ କରିଥିଲା।

ଦକ୍ଷିଣ ଆଫ୍ରିକା ଶେଷ ଥର ପାଇଁ ୨୦୦୦ ମସିହାରେ ଭାରତରେ ସରିଜ୍ ବିଜୟୀ ହୋଇଥିଲା । ସେବେଠାରୁ, ଦଳ ଏଠାରେ ୫ଟି ସିରିଜ ଖେଳିଛି, ତିନୋଟିରେ ପରାଜିତ ହୋଇଛି ଏବଂ ଦୁଇଟି ଡ୍ର ହୋଇଛି। ଭାରତର ଏହି ୨୫ ବର୍ଷର ଦବଦବାକୁ ଚୂରମାର କରିଛି ଦକ୍ଷିଣ ଆଫ୍ରିକା । ଏବେ ୩ ମ୍ୟାଚ୍ ବିଶିଷ୍ଟ ଓଡିଆଇ ସିରିଜ୍ ଉପରେ ସମସ୍ତଙ୍କ ନଜର ରହିଛି । ୩ଟି ମ୍ୟାଚ୍ ନଭେମ୍ବର ୩୦, ଡିସେମ୍ବର ୩ ଏବଂ ଡିସେମ୍ବର ୬ରେ ଖେଳାଯିବ। ଏଠାରେ ୩-୦ରେ ବିଜୟ ଭାରତକୁ ଟେଷ୍ଟ ପରାଜୟର ଯନ୍ତ୍ରଣାକୁ କିଛି ମାତ୍ରାରେ କମ୍ କରିପାରେ । ଭାରତ ଏବଂ ଦକ୍ଷିଣ ଆଫ୍ରିକା ୫୮ ଟି ODI ମ୍ୟାଚ୍ ଖେଳିଛନ୍ତି। ଭାରତ ୨୭ ଟି ଜିତିଛି । ଭାରତ ବିପକ୍ଷରେ ଦକ୍ଷିଣ ଆଫ୍ରିକା ୩୦ ଟି ଦିନିକିଆ ମ୍ୟାଚ ଜିତିଛି। ଗୋଟିଏ ମ୍ୟାଚ୍ ଡ୍ରରେ ହୋଇଥିଲା । ଯଦି ଭାରତ ୩-୦ ବିଜୟ ହାସଲ କରେ, ତେବେ ଉଭୟ ଦଳର ODIରେ ବିଜୟ-ପରାଜୟ ରେକର୍ଡ ସମାନ ହୋଇଯିବ ।

ସିରିଜ୍ ବିଜୟ ଦୃଷ୍ଟିରୁ ଟିମ୍ ଇଣ୍ଡିଆ ନିଶ୍ଚିତ ଭାବରେ ଉପରେ ଅଛି। ଏପର୍ଯ୍ୟନ୍ତ ଦୁଇ ଦେଶ ମଧ୍ୟରେ ୧୫ଟି ଦିନିକିଆ ସିରିଜ୍ ଖେଳାଯାଇଛି। ଦକ୍ଷିଣ ଆଫ୍ରିକା ୬ଟି ଜିତିଛି ଏବଂ ଭାରତ ୮ଟି ଜିତିଛି । ୨୦୦୫ରେ ଗୋଟିଏ ସିରିଜ୍ ଡ୍ର ଥିଲା। ଦୁଇ ଦଳ ଶେଷ ଥର ପାଇଁ ୨୦୨୩ରେ ଏକ ଦିନିକିଆ ସିରିଜ୍ ଖେଳିଥିଲେ, ଯାହାକୁ ଭାରତ ୨-୧ରେ ଜିତିଥିଲା। ଉଭୟ ଦଳ ଭାରତରେ ୨୪ଟି ଦିନିକିଆ ଖେଳିଥିଲେ, ଯେଉଁଥିରେ ଭାରତ ୧୪ଟି ଏବଂ ଦକ୍ଷିଣ ଆଫ୍ରିକା ୧୦ଟି ଜିତିଥିଲା। ତଥାପି, ସିରିଜ୍ ବିଜୟରେ ଟିମ୍ ଇଣ୍ଡିଆ ବହୁତ ଆଗରେ ଅଛି। ଉଭୟ ଦଳ ଭାରତରେ ୭ଟି ସିରିଜ୍ ଖେଳିଥିଲେ, ଯେଉଁଥିରେ ଭାରତ ୫ଟି ଜିତିଥିଲା ଏବଂ ଦକ୍ଷିଣ ଆଫ୍ରିକା କେବଳ ଗୋଟିଏ ଜିତିଥିଲା। ଗୋଟିଏ ସିରିଜ୍ ଡ୍ର ହୋଇଥିଲା।

ଦକ୍ଷିଣ ଆଫ୍ରିକା ୨୦୧୫ରେ ଏକମାତ୍ର ସିରିଜ୍ ଜିତିଥିଲା । ଏବି ଡିଭିଲିୟର୍ସଙ୍କ ଅଧିନାୟକତ୍ୱରେ ଦଳ ୩-୨ରେ ସିରିଜ୍ ଜିତିଥିଲା। ଜାନୁଆରୀ ୨୦୧୧ ପରଠାରୁ, ଘରୋଇ ମାଟିରେ ଯେକୌଣସି ଫର୍ମାଟରେ ଟିମ୍ ଇଣ୍ଡିଆକୁ ପରାସ୍ତ କରିବା ବହୁତ କଷ୍ଟକର ହୋଇପଡ଼ିଛି। ବର୍ଷେ ହେଲା ଟେଷ୍ଟରେ ଭାରତୀୟ ଟିମ୍ ଖରପା ପ୍ରଦର୍ଶନ କରୁଥିଲେ ହେଁ, ଦିନିକିଆ ଏବଂ ଟି-୨୦ରେ ଦଳ ଦବଦବା ଜାରି ରଖିଛି । ଗତ ୧୫ ବର୍ଷ ମଧ୍ୟରେ, ଭାରତ ଘରୋଇ ମାଟିରେ ୧୧୮ ଦିନିକିଆ ଖେଳିଛି, ଯେଉଁଥିରେ ୮୪ଟି ଜିତିଛି ଏବଂ ମାତ୍ର ୩୧ଟିରେ ହାରିଛି। ଏହି ସମୟ ମଧ୍ୟରେ ଦୁଇଟି ମ୍ୟାଚ୍ ଟାଇ ହୋଇଥିଲା ଏବଂ ଗୋଟିଏ ମ୍ୟାଚ୍ରେ ଫଳାଫଳ ବାହାରି ପାରିନଥିଲା । ଏହାର ଅର୍ଥ ହେଉଛି, ଭାରତ ଘରୋଇ ମାଟିରେରେ ୭୧% ଦିନିକିଆ ମ୍ୟାଚ୍ ଜିତିଛି। ଭାରତ ଚଳିତ ବର୍ଷ ଅଷ୍ଟ୍ରେଲିଆ ବିପକ୍ଷରେ ଓଡିଆଇ ସିରିଜ୍ ଖେଳିଥିଲା । କିନ୍ତୁ ଦଳ ୨-୧ରେ ସିରିଜ ହାରିଥିଲା । କିନ୍ତୁ କୋହଲି ଏବଂ ରୋହିତ ଭଲ ପ୍ରଦର୍ଶନ କରିଥିଲେ ।