ବିହାରରେ ସବୁଠୁ କମ୍ ଭୋଟ ବ୍ୟାବଧାନରେ ଜିତିଲେ କଂଗ୍ରେସ ପ୍ରାର୍ଥୀ, ମାତ୍ର ୨୧ ଖଣ୍ଡ ଭୋଟରେ ହରାଇଲେ ବିଜେପିକୁ

ଅରରିୟା ୧୪।୧୧: ବିହାର ବିଧାନସଭା ନିର୍ବାଚନରେ ଅରରିଆ ଜିଲ୍ଲା ଫାରବିସଗଞ୍ଜ ବିଧାନସଭା ନିର୍ବାଚନମଣ୍ଡଳିରେ ସବୁଠୁ କଡ଼ା ପ୍ରତିଦ୍ୱନ୍ଦ୍ୱୀତା ହୋଇଛି। ଏଠାରେ ବିଜେପି ଓ କଂଗ୍ରେସ ପ୍ରାର୍ଥୀଙ୍କ ମଧ୍ୟରେ ଟକ୍କର ହୋଇଥିବା ବେଳେ କଂଗ୍ରେସ ପ୍ରାର୍ଥୀ ମନୋଜ ବିଶ୍ୱାସ ବିଜେପିର ବିଦ୍ୟା ସାଗରଙ୍କୁ ମାତ୍ର ୨୧ ଖଣ୍ଡ ଭୋଟରେ ମାତ ଦେଇଛନ୍ତି। ଦେଶରେ ଅନେକ ନିର୍ବାଚନ ହୋଇଛି, ହେଲେ ଫରବିସଗଞ୍ଜରେ ଶୁକ୍ରବାର ଯେଉଁ ପ୍ରତିଦ୍ୱନ୍ଦ୍ୱୀତା ଦେଖିବାକୁ ମିଳିଛି ତାହା ବାସ୍ତବିକ ରୋମାଞ୍ଚକର। ଏଠାରେ ଭୋଟ ଗଣନା କାଳରେ ପ୍ରତି ରାଉଣ୍ଡରେ ବିଜେପି ପ୍ରାର୍ଥୀ ଓ କଂଗ୍ରେସ ପ୍ରାର୍ଥୀଙ୍କ ଭୋଟ ସଂଖ୍ୟା ସମସ୍ତଙ୍କ ହୃଦଗତିକୁ ବଢାଇଥିଲା।

ଏହି ଦୁଇ ପ୍ରତିଦ୍ୱନ୍ଦ୍ୱୀ ସବୁ ରାଉଣ୍ଡ ଗଣନାରେ ପରସ୍ପରକୁ ପିଛା କରି ଗଣନାକୁ ପ୍ରତିଦ୍ୱନ୍ଦ୍ୱୀତାମୂଳକ କରିଥିଲେ। ଶେଷ ୩୦ ରାଉଣ୍ଡ ଗଣନାରେ କଂଗ୍ରେସ ପ୍ରାର୍ଥୀ ମନୋଜ ବିଶ୍ୱାସ ମାତ୍ର ୨୧ ଖଣ୍ଡ ଭୋଟରେ ବିଜେପିର ବିଦ୍ୟାସାଗରଙ୍କୁ ପରାସ୍ତ କରିଛନ୍ତି। ଏଠାରେ ମନୋଜ ବିଶ୍ୱାସଙ୍କୁ ୧ଲକ୍ଷ ୨୦ ହଜାର ୧୧୪ଟି ଭୋଟ ମିଳିଛି। ତେବେ ମାତ୍ର ୨୧ଟି ଭୋଟରେ ବିଜେପି ପ୍ରାର୍ଥୀ ପଛେଇ ଯାଇଛନ୍ତି। ବିହାର ବିଧାନସଭା ନିର୍ବାଚନ ପାଇଁ ନଭେମ୍ବର ୬ ତାରିଖରେ ପ୍ରଥମ ପର୍ଯ୍ୟାୟ ଭୋଟ ଗ୍ରହଣ ଅନୁଷ୍ଠିତ ହୋଇଥିଲା। ଏଥିରେ ୧୨୧ଟି ଆସନ ନିମନ୍ତେ ଭୋଟ ପଡିଥିବା ବେଳେ ଦ୍ୱିତୀୟ ପର୍ଯ୍ୟାୟ ଭୋଟ ଗ୍ରହଣ ନଭେମ୍ବର ୧୧ ତାରିଖରେ ଶେଷ ହୋଇଥିଲା।

ପ୍ରଥମ ପର୍ଯ୍ୟାୟ ଭୋଟ ଗ୍ରହଣରେ ୬୫.୦୮ % ଭୋଟ ପଡିଥିବା ବେଳେ ଦ୍ୱିତୀୟ ପର୍ଯ୍ୟାୟରେ ୬୮.୭୬% ଭୋଟ ପଡିଥିଲା। ଯାହା ଦେଶର ଗଣତାନ୍ତ୍ରିକ ନିର୍ବାଚନ ଇତିହାସରେ ଭୋଟ ଗ୍ରହଣର ଏକ ରେକର୍ଡ ବୋଲି କୁହାଯାଉଛି। ଏଥିରେ ଗ୍ରାମୀଣ କ୍ଷେତ୍ରରେ ମତଦାନ ପାଇଁ ଭୋଟରଙ୍କୁ ବେଶ୍ ଉତ୍ସାହିତ ଦେଖାଯାଇଥିଲା। ବିହାରରେ ଦୁଇ ପର୍ଯ୍ୟାୟ ମତଦାନ ବେଶ୍ ଶାନ୍ତିଶୃଙ୍ଖଳାର ସହ ଶେଷ ହୋଇଥିଲା।