ନୂଆଦିଲ୍ଲୀ ୩୦।୮: ଭାରତ-ପାକିସ୍ତାନ ଯୁଦ୍ଧ ରୋକିବାରେ ବାରମ୍ବାର ନିଜ ଭୂମିକା ଥିବାର କହୁଥିବା ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ଜୋରଦାର ଝଟକା ଲାଗିଛି। ଏହି ଯୁଦ୍ଧ ରୋକିବାର ଶ୍ରେୟକୁ ନେଇ ଟ୍ରମ୍ପ ନୋବେଲ ଶାନ୍ତି ପୁରସ୍କାର ଚାହୁଁଥିଲେ। ହେଲେ ଭାରତ ଏଥି ପାଇଁ ଟ୍ରମ୍ପଙ୍କୁ ନୋମିନେଟ କରିବାକୁ ମନା କରିଦେଇଛି। ନ୍ୟୁୟର୍କ ଟାଇମ୍ସ ଅନୁସାରେ ଟ୍ରମ୍ପ ପୁଣି ଥରେ ଜୁନ ୧୭ ତାରିଖରେ ମୋଦିଙ୍କୁ ଭାରତ-ପାକ ଯୁଦ୍ଧ ରୋକିବାରେ ତାଙ୍କ ଭୂମିକା ସମ୍ପର୍କରେ ଜଣାଇଥିଲେ। ଏଥି ପାଇଁ ଟ୍ରମ୍ପ ନୋବେଲ ପୁରସ୍କାର ନିମନ୍ତେ ତାଙ୍କୁ ନୋମିନେଟ କରିବାକୁ ମୋଦିଙ୍କୁ କହିଥିଲେ।
କାହିଁକି ଭାରତ କଲାନି ନୋମିନେଟ୍?
ନ୍ୟୁୟର୍କ ଟାଇମ୍ସ ଅନୁସାରେ ମୋଦିଙ୍କଠାରୁ ରାଷ୍ଟ୍ରପତି ଟ୍ରମ୍ପ ଯାହା ସବୁଠୁ ଅଧିକ ଚାହୁଁଥିଲେ, ତାହା ରାଜନୈତିକ ରୂପେ ଅପ୍ରାସଙ୍ଗିକ। ଯଦି ଏହା ମନେ କରାଯାଏ ପିଏମ ମୋଦି ଏକ ଦୁର୍ବଳ ଦେଶ ସହିତ ଯୁଦ୍ଧବିରାମ ଲାଗି ଆମେରିକା ଚାପରେ ନଇଁ ପଡିଲେ, ତେବେ ତାଙ୍କ ଦେଶରେ ତାଙ୍କୁ ବହୁମୂଲ୍ୟ ଦେବାକୁ ପଡିଥାନ୍ତା। ପ୍ରଧାନମନ୍ତ୍ରୀ ମୋଦିଙ୍କ ମଜଭୁତ ଛବି ଏହି କଥା ଉପରେ ନିର୍ଭର କରେ କି ସେ ପାକିସ୍ତାନ ପ୍ରତି କେତେ କଠୋର। ଯଦି ସେ ଏହା ସ୍ୱୀକାର କରନ୍ତି ଯୁଦ୍ଧବିରାମରେ ଆମେରିକାର ହାତ ଥିଲା ତେବେ ଟ୍ରମ୍ପଙ୍କୁ ନୋବେଲ ପୁରସ୍କାର ନିମନ୍ତେ ନାମିତ କରିବା ଦୂରର କଥା ପାକିସ୍ତାନ ଆଗରେ ଭାରତର ଆତ୍ମସମର୍ପଣ ଭଳି ହୋଇଥାଆନ୍ତା।
ନୋମିନେଟ କରିସାରିଛି ପାକିସ୍ତାନ
ଭାରତ-ପାକ୍ ସିଜଫାୟାର ପରେ ପରେ ପାକିସ୍ତାନ ସେନାମୁଖ୍ୟ ଜେନେରାଲ ଅସୀମ ମୁନିରଙ୍କୁ ଆମେରିକାରେ ଡିନର କରୁଥିବାର ଦେଖାଯାଇଥିଲା। ଏହା ପରେ ବି ଅସୀମ ମୁନିର ଆମେରିକା ଗସ୍ତ କରିଛନ୍ତି। ପାକିସ୍ତାନ ଉପରେ ଆମେରିକା କୃପାର ଏକ କାରଣ ହେଉଛି ପାକିସ୍ତାନ ଆମେରିକା ରାଷ୍ଟ୍ରପତି ଟ୍ରମ୍ପଙ୍କୁ ନୋବେଲ ଶାନ୍ତି ପୁରସ୍କାର ପାଇଁ ନାମିତ କରିଛି।
