ନୂଆଦିଲ୍ଲୀ: ଭାରତ ଓ ପାକିସ୍ତାନ ମଧ୍ୟରେ ଜାରି ଉତ୍ତେଜନା ମଧ୍ୟରେ ଆମେରିକା ବଡ ବୟାନ ଦେଇଛି । ଭାରତ ଓ ପାକିସ୍ତାନ ଯଥା ଶୀଘ୍ର ଉତ୍ତେଜନା କମ କରନ୍ତୁ ବୋଲି ଆମେରିକା ଅପିଲ୍ କରିଛି । ଏହା ସହିତ ଆମେରିକା ପାକିସ୍ତାନର ମଧ୍ୟସ୍ଥତା ଅନୁରୋଧକୁ ମଧ୍ୟ ଅଗ୍ରାହ୍ୟ କରିଛି । ଆମେରିକା ଭାରତ-ପାକିସ୍ତାନ ମଧ୍ୟରେ ମଧ୍ୟସ୍ଥତା କରିବ ନାହିଁ ବୋଲି କହିଛି । ହ୍ୱାଇଟ୍ ହାଉସ ପକ୍ଷରୁ ପ୍ରେସ ସଚିବ କ୍ୟାରୋଲିନ ଲେଭିଟ ଶୁକ୍ରବାର ଏହାର ସୂଚନା ଦେଇଛନ୍ତି ।
ଭାରତ-ପାକିସ୍ତାନ ସଂଘର୍ଷରେ ଆମେରିକାର ମଧ୍ୟସ୍ଥତାର ପ୍ରଶ୍ନ ଉପରେ ହ୍ୱାଇଟ୍ ହାଉସର ପ୍ରେସ ସଚିବ କହିଛନ୍ତି, ଏହି ଘଟଣା ଉପରେ ଆମର ବୈଦେଶିକ ମନ୍ତ୍ରୀ ତଥା ଏନଏସଏ ମାର୍କୋ ରୁବିଓ ନଜର ରଖିଛନ୍ତି । ଆମେରିକା ରାଷ୍ଟ୍ରପତି ଯଥା ଶୀଘ୍ର ଉତ୍ତେଜନା କମ ହେଉ ବୋଲି ଚାହୁଁଛନ୍ତି । ରାଷ୍ଟ୍ରପତି ଭଲ ଭାବେ ଜାଣିଛନ୍ତି ଯେ, ଏହି ଦୁଇ ଦେଶ ମଧ୍ୟରେ ଦଶନ୍ଧି ଦଶନ୍ଧି ବର୍ଷ ଧରି ତିକ୍ତ ସଂପର୍କ ରହିଛି । କିନ୍ତୁ ଆମେରିକାର ଦୁଇ ଦେଶ ସହିତ ଉତ୍ତମ ସଂପର୍କ ରହିଛି । ବୈଦେଶିକ ମନ୍ତ୍ରୀ ମାର୍କୋ ରୁବିଓ ଦୁଇ ଦେଶର ନେତାଙ୍କ ସହିତ ଲଗାତାର ସଂପର୍କରେ ଅଛନ୍ତି ଏବଂ ଏହି ସଂଘର୍ଷ ସମାପ୍ତ କରିବା ପାଇଁ ଉଦ୍ୟମ ଚଳାଇଛନ୍ତି ।
ସୂଚନାଯୋଗ୍ୟ, ଅପରେସନ ସିନ୍ଦୂରରେ ହତାଶ ପାକିସ୍ତାନ ଶୁକ୍ରବାର ତୃତୀୟ ଦିନ ଜମ୍ମୁଠୁ ନେଇ ପଠାନକୋଟ୍ ପର୍ଯ୍ୟନ୍ତ ଅନେକ ସହର ଉପରେ ଡ୍ରୋନ ଓ ମିସାଇଲରେ ହମଲା କରିଥିଲା । ଆଉ ଭାରତୀୟ ସେନା ଶତ୍ରୁ ଦେଶର ପ୍ରତିଟି ଦୁଃସାହସକୁ ମୁହଁତୋଡ ଜବାବ ଦେଇ ସବୁ ଉଦ୍ୟମ ପଣ୍ଡ କରିଛନ୍ତି । । କେବଳ ଏତିକି ନୁହେଁ ଜଳ, ସ୍ଥଳ ଓ ଆକାଶଠୁ ନେଇ କୂଟନୈତିକ ସ୍ତରରେ ଭାରତ ପାକିସ୍ତାନକୁ ଘେରାବନ୍ଦୀ କରିଛି ।
