ବାଂଲାଦେଶ ହିଂସା ପରେ ସୀମାରେ ଭାରତୀୟ ସେନା; କର୍ପସ ଷ୍ଟ୍ରାଇକରଙ୍କୁ ଦେଖି ଢ଼ାକା ଥରହର

ଏମିତି ଜବାବ ଦେବ ଭାରତ, କଳ୍ପନା କରିନଥିବ ବାଂଲାଦେଶ। ସବୁ ନାଟର ଗୋବର୍ଦ୍ଧନ ୟୁନୁସ। ଉଗ୍ରବାଦୀଙ୍କ ହାତକୁ ଦେଇଦେଲେ ପାଓ୍ୱାର। ଶାନ୍ତିର ନୋବେଲ ଧରି ବାଣ୍ଟୁଛନ୍ତି ଅଶାନ୍ତି। ଭାରତକୁ ଯୁଦ୍ଧର ଧମକ… ସେଭେନ୍ ସିଷ୍ଟର ଷ୍ଟେଟ୍ସକୁ ଅଲଗା କରିବାକୁ ଚେତାବନୀ… ଚିକେନ୍ ନେକ୍ କରିଡରକୁ ଦଖଲ କରିବାକୁ ଧମକ… ହିନ୍ଦୁଙ୍କ ଉପରେ ଆକ୍ରମଣ। ଢ଼ାକା ଭାବୁଛି କି ଏସବୁ ଶୁଣିକି ଚୁପ ରହିଛି ଭାରତ। ଭୁଲିଗଲେ ଇଏ ନୂଆ ଭାରତ, ଶକ୍ତିଶାଳୀ ଭାରତ। ଏହା କେବଳ ଶବ୍ଦରେ ସୀମିତ ନୁହେଁ ବରଂ ତାହା କରିକି ଦେଖାଇଛି।

ବାଂଲାଦେଶ ସ୍ଥିତି ଅଣାୟତ୍ତ। ଯୁବ ନେତା ସରିଫ ଓସମାନ ହାଦିଙ୍କ ହତ୍ୟାକୁ ନେଇ ହିଂସା । ଇଏ ହେଉଛି ସେହି ନେତା, ଯିଏ ବାଂଲାଦେଶରେ ରହି ଭାରତ ବିରୋଧରେ ବୁଣୁଥିଲା ବିଷମଞ୍ଜି। ଧର୍ମ ନାଁରେ ସୃଷ୍ଟି କରୁଥିଲା ଅରାଜକତା। ଯିଏ ଗତବର୍ଷ ବାଂଲାଦେଶରେ ଶେଖ ହସିନାଙ୍କ ସରକାରକୁ ଭାଙ୍ଗି ଦେଇଥିବା ବିଦ୍ରୋହରେ ଅଂଶଗ୍ରହଣ କରିଥିଲା। ତାର ମୃତ୍ୟୁ ପରେ ଏବେ ବାଂଲାଦେଶରେ ହିଂସା। ହିନ୍ଦୁଙ୍କ ଉପରେ ପ୍ରତିଶୋଧ, ଭାରତକୁ ଧମକ।

କିଛି ବାଂଲାଦେଶୀ ନେତା ସେମାନଙ୍କର ଘରୋଇ ରାଜନୀତିକୁ ବୃଦ୍ଧି କରିବା ପାଇଁ ଭାରତ ବିରୋଧୀ ବୟାନ ଦେଉଛନ୍ତି। କେତେକ କହୁଛନ୍ତି ଯେ ସେମାନେ ଭାରତଠାରୁ ସେଭେନ୍ ସିଷ୍ଟର ଷ୍ଟେଟ୍ସକୁ ଅଲଗା କରିଦେବେ। ଅନେକ ଭାରତର ଚିକେନ୍ ନେକ୍ ବନ୍ଦ କରିବାକୁ ଧମକ ଦେଉଛନ୍ତି। କିନ୍ତୁ ଏହା ପଛରେ କାରଣ କ'ଣ? ପ୍ରକୃତ କଥା ହେଲା, ଏହି ବୟାନ ବାଂଲାଦେଶର ଘରୋଇ ରାଜନୀତି ଉପରେ ଏକ ନାଟକବାଜି। ଜନସାଧାରଣଙ୍କୁ ଉତ୍ତେଜିତ କରିବାର ଏକ ଉପାୟ। ଏହା ଗଣମାଧ୍ୟମର ଶିରୋନାମା ହାତେଇବା ପାଇଁ ଏକ ପ୍ରୟାସ। କିନ୍ତୁ ଏହି ନେତାମାନେ ବହୁତ ବଡ଼ ଭୁଲ କରିଛନ୍ତି। ସେମାନେ ଧରି ନେଇଥିଲେ ଯେ ଭାରତ କେବଳ ବୟାନ ଶୁଣିବ ଏବଂ କାର୍ଯ୍ୟାନୁଷ୍ଠାନ ଗ୍ରହଣ କରିବ ନାହିଁ। କିନ୍ତୁ ଏବେ ଜାଣିସାରିଲାଣି ବାଂଲାଦେଶ, ଭାରତ କୋପରୁ ବର୍ତ୍ତିବା ମୁସ୍କିଲ। ସୀମା ପାଖରେ ଗର୍ଜନ କଲାଣି ଭାରତୀୟ ସେନା। 17-ମାଉଣ୍ଟେନ୍ ଷ୍ଟ୍ରାଇକ୍ କର୍ପସ। ନାଁ ଶୁଣିକି ଢ଼ାକାରେ ହଇଚଇ। ଭାରତ ବିରୋଧୀ ନେତାମାନଙ୍କ ମୁହଁରୁ ହସ ଉଭାନ।

ଏପର୍ଯ୍ୟନ୍ତ ଭାରତ ମିଜୋରାମ ଏବଂ ଦକ୍ଷିଣ ଆସାମରେ ଭାରତ-ବାଂଲାଦେଶ ସୀମାକୁ ଏକ ତୁଳନାତ୍ମକ ଦ୍ୱିତୀୟ ମୋର୍ଚ୍ଚା ବୋଲି ବିବେଚନା କରୁଥିଲା। ଏଠାରେ ସୀମା ପରିଚାଳନା, ଚୋରା ଚାଲାଣ ନିୟନ୍ତ୍ରଣ ଏବଂ ସୀମିତ ସାମରିକ ଉପସ୍ଥିତି ଉପରେ ଧ୍ୟାନ ଦିଆଯାଇଥିଲା। କିନ୍ତୁ ରାଜନୈତିକ ଉଗ୍ରବାଦ, ଭାରତ ବିରୋଧୀ ବୟାନ ଏବଂ ବାଂଲାଦେଶରେ ଅସ୍ଥିରତା ପରେ ଭାରତ ରଣନୀତି ପରିବର୍ତ୍ତନ କରିଛି। ଆଉ ଏହି ପରିବର୍ତ୍ତନର ସବୁଠାରୁ ବଡ଼ ସଙ୍କେତ ହେଉଛି 17 ମାଉଣ୍ଟେନ୍ ଷ୍ଟ୍ରାଇକ୍ କର୍ପସର ଏଣ୍ଟ୍ରି।

ଏ କୌଣସି ସାଧାରଣ ସାମରିକ ୟୁନିଟ୍ ନୁହେଁ। 17 ମାଉଣ୍ଟେନ୍ ଷ୍ଟ୍ରାଇକ କର୍ପସ ହେଉଛି ଭାରତର ସବୁଠାରୁ ଘାତକ ଏବଂ ଆକ୍ରମଣାତ୍ମକ ପର୍ବତ ଯୁଦ୍ଧ ବାହିନୀ। ଏହାର ସ୍ପଷ୍ଟ ଅର୍ଥ ହେଉଛି ଏହା ପ୍ରତିରକ୍ଷା ପାଇଁ ନୁହେଁ, ବରଂ ଦ୍ରୁତ ଏବଂ ନିର୍ଣ୍ଣାୟକ ଆକ୍ରମଣ ପାଇଁ ଡିଜାଇନ୍ କରାଯାଇଛି। ଏହି ବାହିନୀ ଉଚ୍ଚ-ତୀବ୍ରତା ଅପରେସନ, ଦ୍ରୁତ ପ୍ରତିକ୍ରିୟା କ୍ଷମତା, ପାହାଡ଼ି ଅଞ୍ଚଳରେ ଅନୁପ୍ରବେଶକୁ ରୋକିବ। ରକେଟ୍ ତୋପ ଏବଂ ଭାରୀ ଗୋଳାବାରୁଦ ସହିତ ଯୁଦ୍ଧ କରିବାରେ ମାହିର। ବର୍ତ୍ତମାନ, ଏହି ବାହିନୀକୁ ବାଂଲାଦେଶ ସୀମା ଅପରେସନ ପାଇଁ ପ୍ରସ୍ତୁତ କରିବା ପାଇଁ ନିୟୋଜିତ କରାଯାଇଛି।

ସୂତ୍ର ଅନୁଯାୟୀ, ମିଜୋରାମ ଏବଂ ସିଲଚର ସୀମାନ୍ତ ଅଞ୍ଚଳରେ ତିନୋଟି ବାଟାଲିୟନ କମାଣ୍ଡ ଜୋନ୍ ପ୍ରତିଷ୍ଠା କରାଯାଉଛି। ଏହା ସହିତ ରକେଟ୍ ତୋପ, ଭାରୀ ପ୍ରତିରକ୍ଷା ଏବଂ ଆଗୁଆ ଲଜିଷ୍ଟିକ୍ସ ବେସ୍ ନିୟୋଜିତ କରାଯାଉଛି। ସ୍ପଷ୍ଟ ଭାବରେ ଭାରତ ଏବେ ବାଂଲାଦେଶ ସୀମାକୁ ଏକ ପୂର୍ଣ୍ଣାଙ୍ଗ ଅପରେସନାଲ୍ ଥିଏଟର ଭାବରେ ବ୍ୟବହାର କରୁଛି। ପାକିସ୍ତାନ ସୀମାରେ ଗ୍ରହଣ କରାଯାଇଥିବା ସମାନ ମଡେଲ୍ ଏବେ ଏଠାରେ ମଧ୍ୟ ପ୍ରୟୋଗ କରାଯିବ।

ଚିକେନ୍ ନେକ୍ କରିଡର, ଯାହାକୁ ସିଲିଗୁଡ଼ି କରିଡର ମଧ୍ୟ କୁହାଯାଏ। ଏହା ପଶ୍ଚିମବଙ୍ଗର ଏକ ସଂକୀର୍ଣ୍ଣ ପଟି ଯାହା ଭାରତର ଉତ୍ତର-ପୂର୍ବ ରାଜ୍ୟଗୁଡ଼ିକ ଯେପରିକି ଆସାମ, ଅରୁଣାଚଳ ପ୍ରଦେଶ, ମଣିପୁରକୁ ଦେଶର ଅନ୍ୟାନ୍ୟ ଅଂଶ ସହିତ ସଂଯୋଗ କରେ। ଏହାର ପ୍ରସ୍ଥ ସର୍ବାଧିକ ୨୦-୨୨ କିଲୋମିଟର ବ୍ୟାପ୍ତ। ନେପାଳ, ଭୁଟାନ, ବାଂଲାଦେଶ ଏବଂ ଚୀନ୍ ସୀମା ନିକଟତର ହୋଇଥିବାରୁ ଏହା ରଣନୈତିକ ଦୃଷ୍ଟିରୁ ଭାରତ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। କିନ୍ତୁ ଚୀନ ସହ ସାଲିସ କରି ଏହାକୁ ଦଖଲ କରିବାକୁ ଚାହୁଁଛି ବାଂଲାଦେଶ।

ବାଂଲାଦେଶ ସେନା ଏହି ପରିସ୍ଥିତିକୁ ଭଲ ଭାବରେ ବୁଝୁଛି। ଭୟଭୀତ ହେବାର ପ୍ରମୁଖ କାରଣ ହେଲା ନିଜ ଦେଶର ରାଜନେତାଙ୍କ ଦାୟିତ୍ୱହୀନ ବୟାନ। ସୀମା ନିକଟରେ କଡ଼ା ପହରା ଦେଲାଣି ଭାରତୀୟ ସେନା, କେବଳ ଆକ୍ସନ ନେବାକୁ ଅପେକ୍ଷା।

ଏହି ପ୍ରସଙ୍ଗକୁ ନେଇ ଚରମ ଚେତାବନୀ ଦେଇଛନ୍ତି ବାଂଲାଦେଶର ପୂର୍ବତନ ପ୍ରଧାନମନ୍ତ୍ରୀ ଶେଖ ହସିନା। କହିଛନ୍ତି- ଭାରତର ଉତ୍ତର-ପୂର୍ବ ଓ "ଚିକେନ ନେକ୍" କରିଡରକୁ ନେଇ ୟୁନୁସ ସରକାରଙ୍କ ବୟାନବାଜି ବିପଜ୍ଜନକ ଓ ଦାୟିତ୍ୱହୀନ"। ବାଂଲାଦେଶର ଲୋକମାନେ ଭଲ ଭାବରେ ବୁଝନ୍ତି ଯେ ଆମର ସମୃଦ୍ଧି ଏବଂ ସୁରକ୍ଷା ଭାରତ ସହିତ ଦୃଢ଼ ସମ୍ପର୍କ ଉପରେ ନିର୍ଭର କରେ । ବର୍ତ୍ତମାନର ମଧ୍ୟବର୍ତ୍ତୀକାଳୀନ ସରକାରଙ୍କ ଅଧୀନରେ ବଢ଼ୁଥିବା ମୌଳବାଦୀ ପ୍ରଭାବକୁ ପ୍ରତିଫଳିତ କରେ । ଭାରତ ବିରୋଧୀ ମନୋଭାବ ଏବଂ ସଂଖ୍ୟାଲଘୁଙ୍କ ଉପରେ ଅତ୍ୟାଚାର ଦିନେ ବାଂଲାଦେଶ ପତନର କାରଣ ହେବ।