ପଞ୍ଚମ ଟି୨୦ : ସିରିଜ୍ ବିଜୟ ଲକ୍ଷ୍ୟରେ ଟିମ୍ ଇଣ୍ଡିଆ, ଦକ୍ଷିଣ ଆଫ୍ରିକା ପାଇଁ 'କର ବା ମର' ସ୍ଥିତି

ଗାନ୍ଧୀନଗର, ୧୯/୧୨: ଶୁକ୍ରବାର ଭାରତ ଏବଂ ଦକ୍ଷିଣ ଆଫ୍ରିକା ମଧ୍ୟରେ ଟି୨୦ ସିରିଜର ଶେଷ ତଥା ଅନ୍ତିମ ମୁକାବିଲା ଖେଳାଯିବ । ଟିମ୍ ଇଣ୍ଡିଆ ସିରିଜରେ ୨-୧ରେ ଆଗୁଆ ରହିଛି । ସିରିଜ୍ ଜିତିବାକୁ ହେଲେ ଭାରତକୁ ଆଜିର ମ୍ୟାଚ୍ ଜିତିବାକୁ ହେବ । ଯଦି ଦକ୍ଷିଣ ଆଫ୍ରିକା ମୁକାବିଲାରେ ବିଜୟୀ ହୁଏ ତାହାଲେ ସିରିଜ୍ ଡ୍ର ରହିବ ।

୫ ମ୍ୟାଚ୍ ବିଶିଷ୍ଟ ଟେଷ୍ଟ୍ ସିରିଜର ଚତୁର୍ଥ ମ୍ୟାଚ୍ ବାତିଲ ହୋଇଯାଇଥିଲା । ଲକ୍ଷ୍ମୌରେ ଖେଳାଯିବାକୁ ଥିବା ଏହି ମୁକାବିଲାରେ ଘନ କୁହୁଡି ଦେଖିବାକୁ ମିଳିଥିଲା । ଫଳରେ ଠିକ୍ ଭାବେ କିଛି ଦେଖାଯାଉ ନଥିଲା । ତେଣୁ ମୁକାବିଲାକୁ ବାତିଲ କରିବାକୁ ପଡିଥିଲା । ପଳରେ ସିରିଜ୍ ୪ ମ୍ୟାଚ୍ ବିଶିଷ୍ଟ ହୋଇଯାଇଛି । ଏଥିରେ ଭାରତ ଆଗୁଆ ଥିଲେ ବି ଆଜିର ମୁକାବିଲା ସିରିଜ୍ ଜିତିବା ପାଇଁ ଗୁରୁତ୍ୱପୂର୍ଣ୍ଣ । ସେପଟେ କର ବା ମର ସ୍ଥିତିରେ ରହିଛି ଦକ୍ଷିଣ ଆଫ୍ରିକା । ଯେମିତି ହେଲେ ଦଳ ବିଜୟୀ ହେବାକୁ ପ୍ରୟାସ କରିବ । ନହେଲେ ହାତରୁ ସିରିଜ୍ ଖସିଯିବ ।

ଅହମ୍ମଦାବାଦରେ ମୁକାବିଲା

ଶେଷ ତଥା ୫ମ ଟି୨୦ ଫାଇଟ୍ ଅହମ୍ମଦାବାଦରେ ହେବ । ଅହମ୍ମଦାବାଦରେ କୁହୁଡି ସମ୍ଭାବନା କମ୍ ରହିଛି । ଲକ୍ଷ୍ନୌ ଉତ୍ତର ଭାରତରେ ଅବସ୍ଥିତ ଥିବାରୁ ଦିଲ୍ଲୀର ବାୟୁ ପ୍ରଦୂଷଣ ସହ ବିଷାକ୍ତ ଧୂଆଁ ସେଠାକାର ପରିବେଶକୁ ବିଷମ କରିଦେଇଥିଲା । କିନ୍ତୁ ଅହମ୍ମଦାବାଦରେ ସେପରି ପରିସ୍ଥିତି ଉପୁଜିବ ନାହିଁ ।

ଗିଲ୍ ହୋଇପାରନ୍ତି ଆଉଟ୍

ଶେଷ ମୁକାବିଲାରେ ଭାରତୀୟ ବ୍ୟାଟର ସଞ୍ଜୁ ସାମସନଙ୍କୁ ସୁଯୋଗ ମିଳିପାରେ । ଶୁଭମନ୍ ଗିଲଙ୍କ ଜାଗାରେ ସେ ବ୍ୟାଟିଂ କରିପାରନ୍ତି । ଦଳ ତାଙ୍କୁ ଓପନିଂରେ ପଠାଇପାରେ । ଯଦି ସଞ୍ଜୁଙ୍କୁ ସୁଯୋଗ ମିଳେ ତାହାଲେ ସେ ଅଭିଷେକ ଶର୍ମାଙ୍କ ସହ ଓପନିଂ କରୁଥିବା ନଜର ଆସିବେ ।

ସୂର୍ଯ୍ୟଙ୍କ ଉପରେ ନଜର

ମ୍ୟାଚରେ ସବୁଠୁ ଅଧିକ ନଜର ଅଧିନାୟକ ସୂର୍ଯ୍ୟ କୁମାର ଯାଦବଙ୍କ ଉପରେ ରହିବ । କାରଣ ସେ ଲଗାତାର ବିଫଳ ହେଉଛନ୍ତି । ତାଙ୍କ ବ୍ୟାଟରୁ ଫ୍ୟାନ୍ସ ବଡ ରନ୍ ଆଶା କରୁଛନ୍ତି । ଟି୨୦ ବିଶ୍ୱକପ୍ ପୂର୍ବରୁ ସୂର୍ଯ୍ୟ ଫର୍ମରୁ ଫେରିବା ଅଧିକ ଗୁରୁତ୍ୱପୂର୍ଣ୍ଣ ।