ନୂଆ ଉପମୁଖ୍ୟମନ୍ତ୍ରୀଙ୍କୁ ଗୁରୁତ୍ବପୂର୍ଣ୍ଣ ଦାୟିତ୍ବ, ସୁନେତ୍ରାଙ୍କୁ ମିଳିଲା ଅଜିତଙ୍କ ‘ପାଓ୍ବାର’

ମୁମ୍ବାଇ: ମହାରାଷ୍ଟ୍ର ସରକାର ପୁଣେ ଏବଂ ବୀଡ ଜିଲ୍ଲାର (ଗାର୍ଡିଆନ୍) ଅଭିଭାବକ ମନ୍ତ୍ରୀ ଭାବରେ ଉପମୁଖ୍ୟମନ୍ତ୍ରୀ ସୁନେତ୍ରା ପାୱାରଙ୍କୁ ନିଯୁକ୍ତ କରିଛନ୍ତି । ଅଜିତ ପାୱାର ପୂର୍ବରୁ ଏହି ଦାୟିତ୍ୱ ତୁଲାଉଥିଲେ। ଗାର୍ଡିଆନ୍ ମନ୍ତ୍ରୀ ନିଯୁକ୍ତି ପାଇଁ ସରକାରୀ ନିର୍ଦ୍ଦେଶ ଜାରି କରାଯାଇଛି। ଅଜିତ ପାୱାର ମହାରାଷ୍ଟ୍ର ସରକାରରେ ଅର୍ଥ ମନ୍ତ୍ରୀ ଥିଲେ । କିନ୍ତୁ ଶପଥ ଗ୍ରହଣ କରିବା ପରେ ସୁନେତ୍ରା ପାୱାରଙ୍କୁ ଏହି ବିଭାଗ ମିଳିନଥିଲା। ତାଙ୍କୁ ଅବକାରୀ, କ୍ରୀଡ଼ା ଏବଂ ଯୁବ ବ୍ୟାପାର, ସଂଖ୍ୟାଲଘୁ ବ୍ୟାପାର ବିଭାଗ ଏବଂ ୱାକଫ ବୋର୍ଡର ଦାୟିତ୍ୱ ଦିଆଯାଇଛି । ଏହା ବ୍ୟତୀତ, ତାଙ୍କୁ ଏବେ ଦୁଇଟି ଜିଲ୍ଲାର ଗାର୍ଡିଆନ୍ ମନ୍ତ୍ରୀ ଭାବରେ ମଧ୍ୟ ଗୁରୁଦାୟିତ୍ବ ମିଳିଛି ।

ଦିବଂଗତ ନେତା ଅଜିତ ପାୱାରଙ୍କ ପୂର୍ବରୁ ଧନଞ୍ଜୟ ମୁଣ୍ଡେ ବୀଡର ଅଭିଭାବକ ମନ୍ତ୍ରୀ ପଦରେ ଥିଲେ। କିନ୍ତୁ, ସରପଞ୍ଚ ସନ୍ତୋଷ ଦେଶମୁଖ ହତ୍ୟା ମାମଲାରେ ତାଙ୍କର ଜଣେ ଘନିଷ୍ଠ ସହଯୋଗୀଙ୍କ ନାମ ଆସିବା ପରେ ମୁଣ୍ଡେ ମହାରାଷ୍ଟ୍ର ମନ୍ତ୍ରୀ ପଦରୁ ଇସ୍ତଫା ଦେଇଥିଲେ ଏବଂ ଦାୟିତ୍ୱ ଅଜିତ ପାୱାରଙ୍କୁ ଦିଆଯାଇଥିଲା । ଅଜିତ ପାଓ୍ବାରଙ୍କ ମୃତ୍ୟୁ ପରେ ଏବେ ଏହି ଦାୟିତ୍ବ ତାଙ୍କ ପତ୍ନୀ ସୁନେତ୍ରା ପାଓ୍ବାର ତୁଲାଇବେ ।

ମହାରାଷ୍ଟ୍ର ସରକାର ଜଣେ ଗାର୍ଡିଆନ ମନ୍ତ୍ରୀ ନିଯୁକ୍ତ କରନ୍ତି। ଜଣେ କ୍ୟାବିନେଟ ସ୍ତରୀୟ ମନ୍ତ୍ରୀ, ଜିଲ୍ଲାରେ ସରକାରୀ ଯୋଜନାର କାର୍ଯ୍ୟାନ୍ୱୟନ ଏବଂ ପ୍ରଶାସନିକ ସମନ୍ୱୟ ତଦାରଖ କରନ୍ତି। ମହାରାଷ୍ଟ୍ରରେ ଗାର୍ଡିଆନ ମନ୍ତ୍ରୀ ଭାବରେ ନିଯୁକ୍ତ ନେତାମାନଙ୍କର ପ୍ରଭାବ ବେଶୀ । ପ୍ରତ୍ୟେକ ପ୍ରମୁଖ ନେତା ଜନସାଧାରଣଙ୍କ ସହିତ ସେମାନଙ୍କର ସମ୍ପର୍କ ଉନ୍ନତ କରିବା ପାଇଁ ନିଜ ଅଞ୍ଚଳରେ ଗାର୍ଡିଆନ ମନ୍ତ୍ରୀ ଭାବରେ କାର୍ଯ୍ୟ କରିବାକୁ ଚେଷ୍ଟା କରନ୍ତି। ଅଜିତ ପାୱାର ଦୀର୍ଘ ସମୟ ଧରି ପୁଣେର ଏହି ଦାୟିତ୍ବ ନିର୍ବାହ କରିଥିଲେ ।

ମହାରାଷ୍ଟ୍ରର ସମସ୍ତ ୩୬ଟି ଜିଲ୍ଲା ପାଇଁ ଅଭିଭାବକ ମନ୍ତ୍ରୀ ନିଯୁକ୍ତ କରାଯାଇଛି। ମହାରାଷ୍ଟ୍ର ମୁଖ୍ୟମନ୍ତ୍ରୀ ଫଡନବୀସ୍ ଗଡ଼ଚିରୋଲିର ଅଭିଭାବକ ମନ୍ତ୍ରୀ। ଉପମୁଖ୍ୟମନ୍ତ୍ରୀ ଏକନାଥ ସିନ୍ଦେ ଥାନେ ଏବଂ ମୁମ୍ବାଇ ସହରର ଗାର୍ଡିଆନ ମନ୍ତ୍ରୀ। ମହାରାଷ୍ଟ୍ରର ପୂର୍ବତନ ବିଜେପି ସଭାପତି ଚନ୍ଦ୍ରଶେଖର ନାଗପୁରର ଗାର୍ଡିଆନ ମନ୍ତ୍ରୀ ଭାବରେ କାର୍ଯ୍ୟ କରୁଛନ୍ତି ।