ନୂଆଦିଲ୍ଲୀ: ଭାରତ ଓ ପାକିସ୍ତାନ ମଧ୍ୟରେ ଯୁଦ୍ଧ ଆଶଙ୍କା ବଢ଼ିବାରେ ଲାଗିଛି । ଆତଙ୍କବାଦୀଙ୍କ ବିରୋଧରେ କୌଣସି ମୁହୂର୍ତ୍ତରେ ଆକ୍ସନ ନେଇପାରନ୍ତି ସରକାର । ଏହା ପୂର୍ବରୁ ବିଭିନ୍ନ ରାଜ୍ୟକୁ ମକ୍ଡ୍ରିଲ୍ ନିର୍ଦ୍ଦେଶ ଦେଇଛି ଗୃହମନ୍ତ୍ରାଳୟ । ମେ’ ୭ ତାରିଖରେ ଦେଶର ପ୍ରାୟ ୨୪୪ ଜିଲ୍ଲାରେ ସିଭିଲ୍ ଡିଫେନ୍ସ ଅଭ୍ୟାସ ହେବ । ଏଥିରେ ଓଡ଼ିଶାର ୧୨ଟି ଜିଲ୍ଲା ମଧ୍ୟ ସାମିଲ୍ ରହିଛି । ତେବେ ଏହି ସିଭିଲ୍ ଡିଫେନ୍ସ ମକଡ୍ରିଲ୍ର ଉଦ୍ଦେଶ୍ୟ କ’ଣ ଆସନ୍ତୁ ଜାଣିବା ।
ନାଗରିକ ପ୍ରତିରକ୍ଷା ଜିଲ୍ଲା କ’ଣ ? କିପରି ହୁଏ ସିଭିଲ୍ ଡିଫେନ୍ସ ମକଡ୍ରିଲ୍ ? ଯୁଦ୍ଧ ବେଳେ ବ୍ଲାକଆଉଟ୍ ରଣନୀତି କ’ଣ ? କାହିଁକି ବଜାଯାଏ ସାଇରନ୍ ? ସିଭିଲ୍ ଡିଫେନ୍ସ ମକଡ୍ରିଲ୍ ଯୁଦ୍ଧ ରଣନୀତିର ପ୍ରଥମ ସୋପାନ । ଯୁଦ୍ଧ ବେଳେ ଆକାଶମାର୍ଗରୁ ମିସାଇଲ୍ ମାଡ଼ କିମ୍ବା ଏୟାର ଷ୍ଟ୍ରାଇକ୍ ହେଲେ ସାଧାରଣ ନାଗରିକ କିପରି ଏହାର ମୁକାବିଲା କରିବେ ଓ ନିଜ ଜୀବନକୁ ସୁରକ୍ଷିତ ରଖିପାରିବେ ତା’ର ଅଭ୍ୟାସ ହୋଇଥାଏ । ମଲଡ୍ରିଲ୍ରେ ବାସ୍ତବିକ୍ ପରିସ୍ଥିତି ଭଳି ଏୟାର ଷ୍ଟ୍ରାଇକ୍ର ସାଇରନ୍ ବାଜିଥାଏ । ସହରରେ ବିଦ୍ୟୁତ୍ ସରବରାହ ବନ୍ଦ କରି ବ୍ଲାକଆଉଟ୍ କରାଯାଏ । ନାଗରିକ ମାନଙ୍କୁ ସୁରକ୍ଷିତ ସ୍ଥାନକୁ ରେସକ୍ୟୁ କରିଥାନ୍ତି ଏମର୍ଜେନ୍ସି ଟିମ୍ । ଯୁଦ୍ଧ ପରିସ୍ଥିତିର ମୁକାବିଲା କରିବା ପାଇଁ ନାଗରିକଙ୍କୁ ସଚେତନ କରାଯାଇଥାଏ । ଏଥିରେ ଗୁରୁତ୍ବପୂର୍ଣ୍ଣ ଭୂମିକା ଗ୍ରହଣ କରିଥାନ୍ତି ରେସକ୍ୟୁ ଟିମ୍ ।
ସେହିପରି ନାଗରିକ ସୁରକ୍ଷା ଜିଲ୍ଲା କ’ଣ ? ଗୃହମନ୍ତ୍ରାଳୟ ରିପୋର୍ଟ ଅନୁଯାୟୀ, ଏହା ବିଭିନ୍ନ ରାଜ୍ୟରେ କିଛି ସ୍ବତନ୍ତ୍ର ଚିହ୍ନଟ ହୋଇଥିବା ଜିଲ୍ଲା । ଯେଉଁଠି ଯୁଦ୍ଧ ଆଶଙ୍କା କରିଥାନ୍ତି ସରକାର । ଯୁଦ୍ଧ ଭଳି ବିପର୍ଯ୍ୟୟ ସ୍ଥିତିରେ ଏହି ସବୁ ଜିଲ୍ଲାର ନାଗରିକଙ୍କ ସୁରକ୍ଷା, ସହୟତା ଓ ସ୍ବତନ୍ତ୍ର ପ୍ରଶିକ୍ଷଣ ବ୍ୟବସ୍ଥା କରାଯାଏ । ସେହିପରି ସିଭିଲ୍ ଡିଫେନ୍ସ ଜିଲ୍ଲାରେ ପ୍ରଶାସନ, ପୋଲିସ, ଅର୍ଦ୍ଧସାମରିକବଳ ଓ ସ୍ବୟଂ ସେବକ ସଂଘକୁ ଯୁଦ୍ଧ ଭଳି ସଂକଟ ସ୍ଥିତିର ମୁକାବିଲା ପାଇଁ ପ୍ରଶିକ୍ଷଣ ଦିଆଯାଇଥାଏ ।
କିପରି ହୁଏ ସିଭିଲ୍ ଡିଫେନ୍ସ ମକଡ୍ରିଲ୍ ? ଏଥିରେ କ’ଣ ସବୁ ପ୍ରଶିକ୍ଷଣ ଦିଆଯାଏ ? ମେ’ ୭ ତାରିଖରେ ଦେଶର ପ୍ରାୟ ୨୪୪ ଜିଲ୍ଲାରେ ନାଗରିକ ସୁରକ୍ଷା ଅଭ୍ୟାସ ହେବ । ଏଥିରେ ପବ୍ଲିକ୍ ଓ୍ବାର୍ଣ୍ଣଂ ସିଷ୍ଟମର ଯାଞ୍ଚ ହେବ । ସାଇରନ୍ ମାଧ୍ୟମରେ ସାଧାରଣ ଲୋକଙ୍କୁ ସତର୍କ କରାଯିବ । ସେହିପରି ଟେଲିଫୋନିକ୍ ଓ ରେଡିଓ ଲିଙ୍କ୍ର ପରୀକ୍ଷଣ କରାଯିବ । ଭାରତୀୟ ବାୟୁସେନା ସହ ହଟଲାଇନ୍ ଓ ରେଡିଓ ଯୋଗାଯୋଗର ମଧ୍ୟ ଯାଞ୍ଚ ହେବ । ସହରରେ ବ୍ଲାକଆଉଟ୍ ରଣନୀତି ପ୍ରସ୍ତୁତ କରାଯିବ । ଯୁଦ୍ଧ ସ୍ଥିତି ଭଳି ବିଜୁଳି ସରବରାହ ବନ୍ଦ କରି ବ୍ଲାକଆଉଟ୍ ପ୍ରକ୍ରିୟାର ଅଭ୍ୟାସ ହେବ । ଗୁରୁତ୍ୱପୂର୍ଣ୍ଣ ପ୍ରତିଷ୍ଠାନଗୁଡ଼ିକୁ ସମ୍ଭାବ୍ୟ ଆକ୍ରମଣରୁ ସୁରକ୍ଷିତ ରଖିବା ପାଇଁ କେମୋଫ୍ଲାଜ୍ ଅଭ୍ୟାସ ମଧ୍ୟ କରାଯିବ ।
ଏହା ସହିତ ଅଗ୍ନିଶମ ବାହିନୀ, ରେସକ୍ୟୁ ଟିମ୍, ରକ୍ଷଣାବେକ୍ଷଣ କର୍ମଚାରୀ ଏବଂ ସିଭିଲ୍ ୱାର୍ଡେନଙ୍କ ମୁତୟନ ଓ ସେମାନଙ୍କ କାର୍ଯ୍ୟକୁ ନିରୀକ୍ଷଣ କରିବେ ସୁରକ୍ଷା ଅଧିକାରୀ । ଜରୁରୀକାଳୀନ ପରିସ୍ଥିତିରେ ଲୋକଙ୍କୁ କିଭଳି ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯିବ, ଏହି ରଣନୀତିର ମଧ୍ୟ ପରୀକ୍ଷା ହେବ ।
ସିଭିଲ୍ ଡିଫେନ୍ସ ମକଡ୍ରିଲ୍ ବେଳେ ସାଧାରଣ ଲୋକଙ୍କୁ ଶାନ୍ତି ରକ୍ଷା କରିବା ପାଇଁ ଅପିଲ୍ କରାଯାଇଛି । ସ୍ଥାନୀୟ ପ୍ରଶାସନକୁ ସମସ୍ତ ନିର୍ଦ୍ଦେଶକୁ ପାଳନ ପାଇଁ କହିଛନ୍ତି ସୁରକ୍ଷା ଅଧିକାରୀ । ଏହା ସହିତ ଜରୁରୀ ସାମଗ୍ରୀ ଯଥା ପାନୀୟଜଳ, ଔଷଧ ଓ ଏମର୍ଜେନ୍ସି ଲାଇଟ୍ ପାଖରେ ରଖିବାକୁ କୁହାଯାଇଛି । ସୋସିଆଲ୍ ମିଡିଆ ଗୁଜବରୁ ଦୂରେଇ ରହିବାକୁ ନିର୍ଦ୍ଦେଶ ରହିଛି । ପହଲଗାମ ଆତଙ୍କବାଦୀ ଆକ୍ରମଣ ପରେ ଭାରତ ଓ ପାକସ୍ତାନ ମଧ୍ୟରେ ତିକ୍ତତା ବଢ଼ିବାରେ ଲାଗିଛି । ଦିନକୁ ଦିନ ଯୁଦ୍ଧ ଅଶଙ୍କା ବଢ଼ୁଥିବାରୁ ଗୃହମନ୍ତ୍ରାଳୟ ବିଭିନ୍ନ ନାଗରିକ ସୁରକ୍ଷା ଜିଲ୍ଲାକୁ ମକଡ୍ରିଲ୍ ପାଇଁ ନିର୍ଦ୍ଦେଶ ଦେଇଛନ୍ତି ।...
