ଧର୍ମେନ୍ଦ୍ରଙ୍କୁ କାହିଁକି ଦିଆଗଲାନି ‘ରାଷ୍ଟ୍ରୀୟ ମର୍ଯ୍ୟାଦା’ ? ଚୁପଚାପ୍‌ କରି ଦିଆଗଲା ଅନ୍ତିମ ସଂସ୍କାର

ନୂଆଦିଲ୍ଲୀ ୨୬।୧୧; ବଲିଉଡ ହି-ମ୍ୟାନ୍ ଧର୍ମେନ୍ଦ୍ରଙ୍କ ପରଲୋକ ପରେ ପରିବାର ସହ ପ୍ରଶଂସକ ଶୋକରେ ବୁଡି ରହିଛନ୍ତି। ପ୍ରାୟ ଛଅ ଦଶନ୍ଧି ଧରି ଚଳଚ୍ଚିତ୍ର ଜଗତରେ ଜଣେ ଷ୍ଟାର ଭାବରେ ରାଜତ୍ୱ କରିଥିବା ଧର୍ମେନ୍ଦ୍ରଙ୍କର ସୋମବାର, ନଭେମ୍ବର ୨୪ ତାରିଖରେ ୮୯ ବର୍ଷ ବୟସରେ ଦେହାନ୍ତ ହୋଇଥିଲା। ମୁମ୍ବାଇର ପବନ ହଂସ ଶ୍ମଶାନରେ ତାଙ୍କର ଶେଷକୃତ୍ୟ ସରିଛି, ଯେଉଁଠାରେ ତାଙ୍କ ବଡ଼ ପୁଅ ସନି ଦେଓଲ ଅନ୍ତିମ ସଂସ୍କାର କରିଥିଲେ। ଦେଓଲ ପରିବାର ସହିତ, ଅମିତାଭ ବଚ୍ଚନ, ସଲମାନ ଖାନ, ଆମିର ଖାନ ଏବଂ ଅଭିଷେକ ବଚ୍ଚନଙ୍କ ଭଳି ବହୁ ବଲିଉଡ ଷ୍ଟାର ଅଶ୍ରୁଳ ଶ୍ରଦ୍ଧାଞ୍ଜଳି ପ୍ରଦାନ କରିଥିଲେ। କୋଟି କୋଟି ହୃଦୟରେ ରାଜ କରୁଥିବା ଧର୍ମେନ୍ଦ୍ରଙ୍କ ଏପରି ଅନ୍ତିମ ଯାତ୍ରା ହେବ ବୋଲି କେହି କଳ୍ପନା କରିନଥିଲେ। ୩୦୦ ରୁ ଅଧିକ ଫିଲ୍ମ କରିସାରିଥିବା ଓ ପଦ୍ମଭୂଷଣ ସମ୍ମାନ ପାଇଥିବା ଧର୍ମେନ୍ଦ୍ରଙ୍କୁ ଚୁପଚାପ୍ ଭାବରେ ତାଙ୍କର ଅନ୍ତିମ ସଂସ୍କାର କରାଯିବା ସମସ୍ତଙ୍କୁ ଆଶ୍ଚର୍ଯ୍ୟ କରିଛି।

ଧରମ ପାଜୀଙ୍କ ପ୍ରଶଂସକମାନେ ଅତି କମରେ ତାଙ୍କୁ ଶେଷ ଶ୍ରଦ୍ଧାଞ୍ଜଳି ଦେଇପାରିଥାନ୍ତେ। ତାଙ୍କ ଅନ୍ତିମ ସଂସ୍କାର ପାଇଁ ସାରା ସହର ରାସ୍ତାରେ ଭିଡ଼ ଜମାଇଥାନ୍ତା। କିନ୍ତୁ ତାହା ହୋଇନଥିଲା। ଧର୍ମେନ୍ଦ୍ର ପଞ୍ଚଭୂତରେ ବିଲୀନ ହେବା ସମୟରେ ତାଙ୍କ ମୃତ୍ୟୁର ଖବର ପ୍ରକାଶ ପାଇଲା। ଧର୍ମେନ୍ଦ୍ରଙ୍କ ମୃତ୍ୟୁ ଖବର ପ୍ରସାରିତ ହେବା ବେଳକୁ ତାଙ୍କ ପାର୍ଥିବ ଶରୀର ପଞ୍ଚଭୂତରେ ମିଶି ସାରିଥିଲା। ରାଷ୍ଟ୍ରୀୟ ମର୍ଯ୍ୟାଦା କାହିଁକି ଦିଆଗଲା ନାହିଁ ତାହାକୁ ନେଇ ବଡ ପ୍ରଶ୍ନ ଉଠିଛି । କୁହାଯାଉଛି କି କାହିଁକି ଏତେ ଶୀଘ୍ର ଧର୍ମେନ୍ଦ୍ରଙ୍କ ଅନ୍ତିମ ସଂସ୍କାର କରାଯାଇଥିଲା? ଅପରାହ୍ନ ୧ଟାରେ, ଖବର ପ୍ରକାଶିତ ହେଲା ଯେ ଧର୍ମେନ୍ଦ୍ର ଗୁରୁତର ଅବସ୍ଥାରେ ଅଛନ୍ତି। ତାଙ୍କ ଘର ବାହାରେ ଏକ ଆମ୍ବୁଲାନ୍ସ ଦେଖିବାକୁ ମିଳିଥିଲା, ପରେ ସୁରକ୍ଷା ବୃଦ୍ଧି କରାଯାଇଥିଲା, ଏବଂ ବ୍ୟାରିକେଡ୍ ଲଗାଯାଇଥିଲା। ତା'ପରେ ପାର୍ଲେ ଶ୍ମଶାନରେ ସୁରକ୍ଷା ବୃଦ୍ଧି କରାଯିବା ସହ, ଅନ୍ତିମ ସଂସ୍କାର ଚୁପଚାପ୍‌ରେ କରାଯାଇଥିଲା। ଦେହାନ୍ତ ହେବାର କୌଣସି ସୂଚନା ଦିଆଯାଇନଥିଲା । 

କହିବାକୁ ଗଲେ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ କିମ୍ବା ଗୃହ ମନ୍ତ୍ରଣାଳୟ ନିଷ୍ପତ୍ତି ନିଅନ୍ତି ମୃତକ ଏହି ସମ୍ମାନ ପାଇବାକୁ ଯୋଗ୍ୟ କି ନାହିଁ। ନିଷ୍ପତ୍ତି ନିଆଯିବା ପରେ, ସରକାର ତୁରନ୍ତ ଏକ ସରକାରୀ ନିର୍ଦ୍ଦେଶ ଏବଂ ବିଜ୍ଞପ୍ତି ଜାରି କରନ୍ତି। ଏହା ପରେ, ସ୍ଥାନୀୟ ଜିଲ୍ଲା ପ୍ରଶାସନ, କଲେକ୍ଟର ଏବଂ ପୋଲିସକୁ ତ୍ରିରଙ୍ଗା, ଗାର୍ଡ ଅଫ୍ ଅନର ଏବଂ ରାଷ୍ଟ୍ରୀୟ ସମ୍ମାନ ଦେବା ପାଇଁ ପ୍ରସ୍ତୁତ ହେବାକୁ ନିର୍ଦ୍ଦେଶ ଦିଆଯାଏ। ପ୍ରୋଟୋକଲ୍ ଟିମ୍ ମଧ୍ୟ ପରିବାର ସହିତ ଯୋଗାଯୋଗ କରନ୍ତି। ରାଷ୍ଟ୍ରୀୟ ମର୍ଯ୍ୟାଦା ସହ ଅନ୍ତିମ ସଂସ୍କାର କରିବାକୁ ହେଲେ ପରିବାରକୁ ସମୟ ଏବଂ ସ୍ଥାନ ପାଇଁ ସମ୍ମତି ପ୍ରଦାନ କରିବାକୁ ପଡିଥାଏ।ଧର୍ମେନ୍ଦ୍ରଙ୍କ କ୍ଷେତ୍ରରେ ଟିକେ ଭିନ୍ନ ଥିଲା, ପରିବାର ଗତକାଲି ତାଙ୍କ ମୃତ୍ୟୁ ଖବରକୁ ଗୁପ୍ତ ରଖିଥିଲେ ଏବଂ ତୁରନ୍ତ ଅନ୍ତିମ ସଂସ୍କାର ପାଇଁ ପ୍ରସ୍ତୁତି ଆରମ୍ଭ କରିଥିଲେ। ସମୟ ପୂର୍ବରୁ ମୃତ୍ୟୁର ଖବର ନମିଳିବା ଏବଂ ପର୍ଯ୍ୟାପ୍ତ ସମୟ ନ ଥିବାରୁ ରାଷ୍ଟ୍ରୀୟ ମର୍ଯ୍ୟାଦାର ସୁଯୋଗ ମିଳିପାରିନଥିଲା। ତେବେ ଏହା ଉପରେ ଧର୍ମେନ୍ଦ୍ରଙ୍କ ପରିବାର ପକ୍ଷରୁ କୌଣସି ପ୍ରତିକ୍ରିୟା ମିଳିପାରିନି।