ନୂଆଦିଲ୍ଲୀ: ପହଲଗାମରେ ଆତଙ୍କବାଦୀ ଆକ୍ରମଣ ପରଠୁ ଭାରତ ଲଗାତାର ପାକିସ୍ତାନ ବିରୋଧରେ କଡ଼ା ପଦକ୍ଷେପ ନେଉଛି। ସିନ୍ଧୁ ଜଳ ଚୁକ୍ତି ରଦ୍ଦ ଆଉ ଅପରେସନ ସିନ୍ଦୂର ଭଳି ବଡ଼ ପଦକ୍ଷେପ ନେଇଛନ୍ତି ଭାରତ ସରକାର। ଖାଲି ଜବାବୀ ହମଲା ନୁହେଁ ସରକାର ପାକିସ୍ତାନ ଉପରେ ଡିଜିଟାଲ ଷ୍ଟ୍ରାଇକ୍ବି କରିଛନ୍ତି। ପୂର୍ବରୁ ଭାରତରେ ପାକିସ୍ତାନୀ ସେଲିବ୍ରିଟିଜ୍ଙ୍କ ସୋସିଆଲ ମିଡିଆ ଆକାଉଣ୍ଟ ବ୍ୟାନ କରାଯାଇଥିବାବେଳେ, ଗୁରୁବାର ବ୍ୟାନ ହୋଇଛି ପାକିସ୍ତାନର ସବୁ ମିଡିଆ କଣ୍ଟେଣ୍ଟ।
ସୂଚନା ଏବଂ ପ୍ରସାରଣ ମନ୍ତ୍ରଣାଳୟ ଓଟିଟି ପ୍ଲାଟଫର୍ମ୍ସ ଏବଂ ମିଡିଆ ଷ୍ଟ୍ରିମିଂ ପ୍ଲାଟଫର୍ମକୁ ଆଡଭାଇଜରୀ ଜାରି କରି ସବୁ ପାକିସ୍ତାନୀ କଣ୍ଟେଣ୍ଟକୁ ବ୍ୟାନ କରିବାକୁ କହିଛି। ଆଡଭାଇଜରୀରେ କୁହାଯାଇଛି, ‘ଜାତୀୟ ସୁରକ୍ଷାକୁ ଧ୍ୟାନରେ ରଖି ସବୁ ଓଟିଟି ପ୍ଲାଟଫର୍ମ୍ସ, ମିଡିଆ ଷ୍ଟ୍ରିମିଂ ପ୍ଲାଟଫର୍ମ୍ସ ଏବଂ ଡିଷ୍ଟ୍ରିବ୍ୟୁଟର ସଂସ୍ଥାଙ୍କୁ ପରାମର୍ଶ ଦିଆଯାଇଛି ଯେ, ସେମାନେ ପାକିସ୍ତାନରେ ନିର୍ମିତ ଓ୍ବେବ ସରିଜ, ଫିଲ୍ମ, ଗୀତ, ପଡକାଷ୍ଟ ଏବଂ ଅନ୍ୟ ଷ୍ଟ୍ରିମିଂ ମିଡିଆ କଣ୍ଟେଣ୍ଟ ଉପରେ ତୁରନ୍ତ ରୋକ୍ ଲଗାନ୍ତୁ।’’
ସେହିଭଳି ଆଡଭାଇଜରୀରେ ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣ ଉଲ୍ଲେଖ କରାଯାଇଛି। ଏଥିରେ କୁହାଯାଇଛି ଭାରତରେ ହୋଇଥିବା ଅନେକ ଆତଙ୍କବାଦୀ ଆକ୍ରମଣରେ ପାକିସ୍ତାନର ସଂପୃକ୍ତି ଥିବା ଜଣାପଡ଼ିଛି। ୨୦୨୫ ଏପ୍ରିଲ ୨୨ରେ ପହଲଗାମରେ ଆତଙ୍କବାଦୀମାନେ ଆକ୍ରମଣ କରିଥିଲେ, ଯେଉଁଥିରେ ନେପାଳୀ ନାଗରିକଙ୍କ ସମେତ ଅନେକ ଭାରତୀୟଙ୍କ ହତ୍ୟା କରାଯାଇଥିଲା। ଘଟଣାରେ ଅନେକ ଲୋକ ଆହତ ମଧ୍ୟ ହୋଇଛନ୍ତି।
ସୂଚନାଥାଉକି, ପହଲଗାମ ଆକ୍ରମଣର ଜବାବରେ ଭାରତ ମେ ୭ ତାରିଖ ରାତିରେ ପାକିସ୍ତାନର ୯ ଆତଙ୍କୀ ଠିକଣାରେ ମିସାଇଲ ମାଡ଼ କରିଛି। ଆକ୍ରମଣରେ ପ୍ରାୟ ୧୦୦ ଲୋକଙ୍କ ମୃତ୍ୟୁ ହୋଇଥିବା ସୂଚନା ଦିଆଯାଇଛି।
ସେହିଭଳି ଆକ୍ରମଣ ପରଠାରୁ ଉଭୟ ଦେଶ ମଧ୍ୟରେ ତିକ୍ତତା ବଢ଼ିଛି। ପାକିସ୍ତାନ ଭାରତର ଅନେକ ସହରରେ ଆକ୍ରମଣର ଚେଷ୍ଟା କରିଥିଲେବି ବିଫଳ ହୋଇଛି। ପାକିସ୍ତାନର ମିସାଇଲ ଡିଫେନ୍ସ ସିଷ୍ଟମକୁ ମଧ୍ୟ ଭାରତ ନଷ୍ଟ କରିଛି।
