ବାଲେଶ୍ଵର:  ସରକାରୀ ଅଧିକାରୀମାନଙ୍କର ଅମ୍ବର ଲାଇଟ୍ ମୋହ । ବାଲେଶ୍ବର ଜିଲ୍ଲାରେ ସରକାରୀ ବଡ଼ ବାବୁମାନେ ଏବେ ଅମ୍ବର ଲାଇଟ୍ ମାୟାରେ ପଡି ଯାଇଛନ୍ତି । ଗାଡି ଉପରେ ଲାଗୁଛି ଅରେଂଜ ଲାଇଟ୍। ଏହି ଲାଇଟ୍ ଲଗାଇବା ପାଇଁ ନିର୍ଦ୍ଧିଷ୍ଟ ସରକାରୀ ନିୟମ ଥିବା ବେଳେ  ଜିଲ୍ଲାର ବାବୁମାନେ ଏହାକୁ ଫୁ କରି ଉଡାଇ ଦେଇଛନ୍ତି । ଯେଉଁଆଡେ ଯେତେବେଳେ ଯାଉଛନ୍ତି ଏହି ଲାଇଟ୍ ଲଗାଇ ନିଜର ଥାଟ୍ ଦେଖାଉଛନ୍ତି। ବେଆଇନ ଭାବେ ଗାଡିରେ ଏହି ବତୀ ଲଗାଇଲେ ଫାଇନ୍ ଦେବାର ରହିଛି ନିୟମ । ହେଲେ ଯେଉଁଠି ଜିଲ୍ଲାପାଳ ଖୋଦ୍ ଆଇନ ମାନୁ ନାହାଁନ୍ତି, ତାଙ୍କୁ ଫାଇନ୍ କରିବ କିଏ  ?

ଜରୁରୀ କାଳୀନ ପରିସ୍ଥିତିରେ ସରକାରୀ ବାବୁମାନେ ତାଙ୍କ ସରକାରୀ ଗାଡି ଉପରେ ନାଲି, ନୀଳ ଏବଂ ଧଳା ଲାଇଟ ବ୍ୟବହାର କରିପାରିବାର ରହିଛି ନିୟମ । ତେବେ ଏହି ସବୁ ଲାଇଟ୍ କେଉଁ ବାବୁମାନେ ଆଉ କେଉଁ ପରିସ୍ଥିତିରେ ତାହା ମଧ୍ୟ ସ୍ପଷ୍ଟଭାବେ ଓଡ଼ିଶା ସରକାରଙ୍କ ସ୍ବତନ୍ତ୍ର ରିଲିଫ କମିଶନର ଗେଜେଟ୍ ନୋଟିଫିକେସନ୍‌ରେ ଉଲ୍ଲେଖ କରିଛନ୍ତି । ୨୦୨୦ ସେପ୍ଟେମ୍ବର ମାସରେ ଜାରି ହୋଇଥିବା ଏହି ନୋଟିଫିକେସନ୍ ଉପରେ ଟିକେ ନଜର ପକାନ୍ତୁ । ଏଥିରେ ଉଲ୍ଲେଖ ରହିଛି ଭୂମିକମ୍ପ, ବନ୍ୟା, ମାଟି ଧସିବା, ସୁନାମୀ, ନ୍ୟୁକ୍ଲିଅର, କେମିକାଲ କିମ୍ବା ବାୟୋଲୋଜିକାଲ ଡିଜାଷ୍ଟର ସମୟରେ ସରକାରୀ ଅଧିକାରୀ ଯେପରିକି ଜିଲ୍ଲାପାଳ, ଅତିରିକ୍ତ ଜିଲ୍ଲାପାଳ, ଉପଜିଲ୍ଲାପାଳ,ତହସିଲଦାର, ବିଡିଓ ଓ ମ୍ୟୁନିସପାଲ୍ କମିଶନର ଏହି ଲାଇଟ ତାଙ୍କ ଗାଡିରେ ବ୍ୟବହାର କରି ପାରିବେ।  

Also read: ପୁରୀ ବ୍ୟତୀତ ଅନ୍ୟ ସ୍ଥାନକୁ ‘ଜଗନ୍ନାଥ ଧାମ’ କରାଯାଇପାରିବନି: ଗଜପତି

ହେଲେ ଏହି ସମୟକୁ ଛାଡିଦେଲେ ସବୁ ସମୟରେ କିନ୍ତୁ ଏହି ଅଧିକାରୀମାନେ ସେମାନଙ୍କ ସରକାରୀ ଗାଡ଼ିରେ ଏହାକୁ ଲଗାଇ ବୁଲୁଛନ୍ତି । ଯାହାକୁ ନେଇ ଉଠିଛି ପ୍ରଶ୍ନ ।  ନିୟମକୁ ବାଲେଶ୍ବର ଜିଲ୍ଲାର ସରକାରୀ ଅଧିକାରୀମାନେ ମାନିବାକୁ ନାରାଜ । ଜିଲ୍ଲାରେ ମାଳ ମାଳ ଅମ୍ବର ଲାଇଟ ଗାଡି ଦେଖିବାକୁ ମିଳୁଛି । ଜିଲ୍ଲାର ସବୁ ବିଡିଓ, ତହସିଲଦାରଙ୍କ ଗାଡିରେ ଲାଗିଛି ଅମ୍ବର ଲାଇଟ। ଏହି ନିୟମ ବେଖାତିର କଲେ ୫ ଶହରୁ ୧ ହଜାର ଟଙ୍କା ପର୍ଯ୍ୟନ୍ତ ଫାଇନ୍ ଦେବାକୁ ପଡିବ ବୋଲି ୧୯୮୮ ମୋଟର ଭେହିକିଲ୍ ଆକ୍ଟର ୧୭୭ ଧାରାରେ ଉଲ୍ଲେଖ ଅଛି । ହେଲେ ଜିଲ୍ଲାପାଳ ବି ଏହି ନିୟମକୁ ମାନୁ ନାହାଁନ୍ତି । ତେଣୁ ତାଙ୍କ ପାଖରୁ ଫାଇନ୍ ଆଦାୟ କରିବ କିଏ ।