ନୂଆଦିଲ୍ଲୀ ୧୦।୦୪: କେବେ ଖାଇଛନ୍ତି କି ସୁନାର ଆଇସ୍କ୍ରିମ୍ ? ଭାବୁଛନ୍ତି ନା ଆମେ କଣ କହୁଛୁ । ଆଜ୍ଞା ହଁ ଆପଣ ସତ ଶୁଣିଛନ୍ତି, ହାଇଦ୍ରାବାଦରେ ମିଳୁଛି ଏହି ସୁନାର ଆଇସ୍କ୍ରିମ୍ । ଏହାକୁ ‘ହୁବର ଆଣ୍ଡ ହଲି’ ନାମକ ଏକ ରେଷ୍ଟୁରାଣ୍ଟ ତିଆରି କରିଛି । ଯାହାକୁ ଲୋକେ ସୋସିଆଲ ମିଡିଆରେ ‘ଅମ୍ବାନୀ ଆଇସ୍କ୍ରିମ୍’ ବୋଲି କହୁଛନ୍ତି ।
କାରଣ ଏହି ଆଇସ୍କ୍ରିମ୍ ଉପରେ ଦିଆଯାଇଛି ସୁନାର ପ୍ରଲେପ । ସବୁଠାରୁ ଚର୍ଚ୍ଚାର ବିଷୟ ହେଉଛି ଏହାର ଦାମ୍ । ଏହା ଏତେ ଅଧିକ ଯେ ଶୁଣିବା ମାତ୍ରେ ଲୋକେ ଆଶ୍ଚର୍ଯ୍ୟ ହୋଇଯାଇଛନ୍ତି । ବାସ୍ତବରେ ଗୋଟିଏ ଆଇସ୍କ୍ରିମ୍ର ଦାମ୍ ୧୨୦୦ ଟଙ୍କା। । ତେବେ ସୋଶିଆଲ୍ ମିଡିଆରେ ଏହି ସୁନାର ଆଇସ୍କ୍ରିମ୍ ବେଶ୍ ଭାଇରାଲ୍ ହେଉଛି ।
ହାଇଦ୍ରାବାଦର ଜଣେ ଫୁଡ ଭ୍ଲଗର ଏହାର ଏକ ଭିଡିଓ ଇନଷ୍ଟାଗ୍ରାମରେ ସେୟାର କରିଛନ୍ତି । ଆଉ ଏହାକୁ ‘ସବୁଠାରୁ ମହଙ୍ଗା ଆଇସ୍କ୍ରିମ୍’ ବୋଲି ଘୋଷଣା କରିଛନ୍ତି। ସେ ଭିଡିଓର କ୍ୟାପସନ୍ରେ ଲେଖିଛନ୍ତି ମୋତେ କୁହନ୍ତୁ ଆପଣ କେବେ ଏହି ଆଇସ୍କ୍ରିମ୍ ଖୁଆଇବେ କି?
ଫୁଡିଦାକ୍ଷୀ ଇନ୍ଷ୍ଟାଗ୍ରାମ ଆକାଉଣ୍ଟରୁ ମାର୍ଚ୍ଚ ୬ରେ ଅପଲୋଡ୍ ହୋଇଥିବା ଏହି ରିଲକୁ ଏପର୍ଯ୍ୟନ୍ତ ୧ କୋଟିରୁ ଅଧିକ ଥର ଦେଖାଯାଇଥିବା ବେଳେ ପ୍ରାୟ ୪ ଲକ୍ଷ ଲୋକ ଏହାକୁ ଲାଇକ୍ କରିଛନ୍ତି। ଏହା ବ୍ୟତୀତ ଶହ ଶହ ୟୁଜର ସେମାନଙ୍କର ମତାମତ ଦେଇଛନ୍ତି। କିଛି ଲୋକ ଏହାକୁ ଅମ୍ବାନୀ ଆଇସକ୍ରିମ୍ ବୋଲି କହିଛନ୍ତି। ଯେତେବେଳେ କିଛି ଲୋକ ରେଷ୍ଟୁରାଣ୍ଟର ସୃଜନଶୀଳତାର ପ୍ରଶଂସା କରିଥିଲେ।
