ବିଶ୍ୱ ପର୍ଯ୍ୟଟନ କ୍ଷେତ୍ରରେ ଆସିଛି ବଡ଼ ସୁଧାର, ୨୦୨୪ରେ ୧୪୦ କୋଟି ଲୋକ ବୁଲିଛନ୍ତି ଦୁନିଆ

Published By : Prameya-News7 Bureau | January 21, 2025 IST

ନୂଆଦିଲ୍ଲୀ: କରୋନା ମହାମାରୀ ଲୋକଙ୍କ ସ୍ୱାସ୍ଥ୍ୟ ସହ ଆର୍ଥିକ ମୋର୍ଚ୍ଚାରେ ବଡ଼ କ୍ଷତି ପହଞ୍ଚାଇଥିଲା । ହୋଟେଲ ଉଦ୍ୟୋଗ ଏବଂ ପର୍ଯ୍ୟଟନ ଉଦ୍ୟୋଗ ଅଧିକ ପ୍ରଭାବିତ ହୋଇଥିଲା । କିନ୍ତୁ ଏବେ ଏହି ସବୁ କ୍ଷେତ୍ର ଗତ ଧରିବାରେ ଲାଗିଛି । ଜାତିସଂଘର ସୂଚନା ଅନୁସାରେ ଗତ ବର୍ଷ ଅର୍ଥାତ୍ ୨୦୨୪ରେ ଗ୍ଲୋବାଲ୍ ଟୁରିଜିମ୍ ଅର୍ଥାତ୍ ବୈଶ୍ୱିକ ପର୍ଯ୍ୟଟନରେ ସୁଧାର ଆସିଛି । ଏହାସହ ଏହି ସଂଖ୍ୟା ୨୦୧୯ ଅର୍ଥାତ୍ କରୋନା ପୂର୍ବବର୍ତ୍ତୀ ସ୍ତରକୁ ଛୁଇଁ ସାରିଛି ।

୨୦୨୩ ମସିହାରେ ୧୩୦ କୋଟି ଅନ୍ତରାଷ୍ଟ୍ରୀୟ ପର୍ଯ୍ୟଟକ ବିଭିନ୍ନ ସ୍ଥାନକୁ ଯାତ୍ରା କରିଥିଲେ । ସେହିପରି ୨୦୨୪ରେରେ ବୈଶ୍ୱିକ ପର୍ଯ୍ୟଟନରେ ଯେଉଁ ସୁଧାର ଆସିଛି, ତାହା ଅନେକ ବିନ୍ଦୁରୁ ଆସିଛି । ଗତ ବର୍ଷ କେବଳ ପର୍ଯ୍ୟଟକଙ୍କ ସଂଧ୍ୟା ବଢିନି ବରଂ ପର୍ଯ୍ୟଟନ ସ୍ଥଳରୁ ହେଉଥିବା ଆୟ ମଧ୍ୟ ୨୦୧୯କୁ ପଛରେ ପକାଇଛି ।

ରିପୋର୍ଟ ଅନୁସାରେ ୨୦୨୩ ତୁଳନାରେ ୨୦୨୪ରେ ପର୍ଯ୍ୟଟକଙ୍କ ସଂଖ୍ୟାରେ ୧୧ ପ୍ରତିଶତ ବୃଦ୍ଧି ଘଟିଛି । ୨୦୨୫ରେ ଜାନୁଆରୀରେ ବି ଏହା ଜାରି ରହିଛି । ଗତ ବର୍ଷ ୟୁରୋପକୁ ସୁବୁଠୁ ଅଧିକ ୭୫ କୋଟି ପର୍ଯ୍ୟଟକ ବୁଲିବାକୁ ଆସିଥିଲେ । ଏଥିରୁ ପଶ୍ଚିମ, ଦକ୍ଷିଣ ଏବଂ ଉତ୍ତର ୟୁରୋପର ଦେଶରେ ପର୍ଯ୍ୟଟକଙ୍କ ସଂଖ୍ୟା ଅଧିକ ରହିଛି । ସେଣ୍ଟ୍ରାଲ୍ ଏବଂ ପୂର୍ବ ୟୁରୋପରେ ରୁଷ-ୟୁକ୍ରେନ ଯୁଦ୍ଧ ଯୋଗୁଁ ପର୍ଯ୍ୟଟନ କ୍ଷେତ୍ର ପ୍ରଭାବିତ ରହିଛି । ଗତ ୟୁରୋପ ଯାତ୍ରା କରିଥିବା ପର୍ଯ୍ୟଟକଙ୍କ ସଂଖ୍ୟା ୨୦୨୩ ତୁଳନାରେ ୫ ପ୍ରତିଶତ ଅଧିକ ଥିଲା ।

ଏସିଆ-ପ୍ରଶାନ୍ତ ଦେଶରେ ପର୍ଯ୍ୟଟକଙ୍କ ସଂଖ୍ୟାରେ ପ୍ରାୟ ୩୩ ପ୍ରତିଶତ ଅଧିକ ରହିଛି । ଅର୍ଥାତ୍ ୨୦୨୩ ତୁଳନାରେ ଏକ-ତୃତୀୟାଂଶ ଅଧିକ ଲୋକ ଏଠାକୁ ଆସିଛନ୍ତି । ମୋଟ ୩୨ କୋଟି ଲୋକ ଏସିଆ-ପ୍ରଶାନ୍ତ କ୍ଷେତ୍ରର ଯାତ୍ରା କରିଛନ୍ତି । ଏହି ଅଞ୍ଚଳରେ ପର୍ଯ୍ୟଟକଙ୍କ ସଂଖ୍ୟା ୨୦୧୯ ତୁଳନାରେ ୮୭ ପ୍ରତିଶତ ଯାଏ ପହଞ୍ଚିପାରିଛି । 

 

News7 Is Now On WhatsApp Join And Get Latest News Updates Delivered To You Via WhatsApp

Copyright © 2024 - Summa Real Media Private Limited. All Rights Reserved.