ବାଲେଶ୍ୱର ୧୭।୭: ଫକୀରମୋହନ କଲେଜ ଛାତ୍ରୀଙ୍କ ଆତ୍ମାହୁତି ଘଟଣାକୁ ନେଇ ଗୋଟିଏ ପରେ ଗୋଟିଏ ଗୁମର ଖୋଲିବାରେ ଲାଗିଛି । ଏଭଳି ସ୍ଥିତିରେ ସୌମ୍ୟାଶ୍ରୀଙ୍କ ଜଣେ ସାଙ୍ଗ କିଛି ରହସ୍ୟ ଉନ୍ମୋଚନ କରିଥିବା ସୂଚନା ରହିଛି । ତାଙ୍କ ଅନୁସାରେ, ଘଟଣାଦିନ ପେଟ୍ରୋଲ କେଉଁଠୁ ଆସିଥିଲା ଯଦି ଜଣାପଡ଼ିବ, ଅଧା ତଦନ୍ତ ସରିଯିବ । ଆଜି କେବଳ ସେ ଜଳିନି ଆମେ ବି ଜଳୁଛୁ । ଆମେ ସେ ପର୍ଯ୍ୟନ୍ତ ଜଳିବୁ ଯେପର୍ଯ୍ୟନ୍ତ ଠିକ୍ରେ ତଦନ୍ତ ନ ହୋଇଛି ବୋଲି ସେ କହିଛନ୍ତି । ସେ ଆହୁରି ମଧ୍ୟ କହିଛନ୍ତି, ସୌମ୍ୟାଶ୍ରୀ ବାରମ୍ବାର ବିଭିନ୍ନ ସ୍ଥାନରେ ତା’ର ଦୁଃଖ କହିଛି । ତା’ପରେ ବି କିଛି ପିଲା ତାକୁ ଖରାପ ମନ୍ତବ୍ୟ ଦେଇ ଟ୍ୱିଟ୍ କରିଥିଲେ, ସମାଲୋଚନା କରୁଥିଲେ । ଯେଉଁଦିନ ଘଟଣା ଘଟିଲା ଆମେ ଉପସ୍ଥିତ ନଥିଲୁ । ତା’ ସହିତ ପ୍ରିନ୍ସିପାଲଙ୍କ ଅଫିସକୁ ଯାଇନଥିଲୁ । ଆମର ସେଦିନ ପରୀକ୍ଷା ଥିଲା । ୧୦ଟା ବେଳେ ପରୀକ୍ଷା ସରିଯାଇଥିଲା । ୧୨ଟା ପର୍ଯ୍ୟନ୍ତ ଆମେ ଅପେକ୍ଷା କରିଥିଲୁ, କିନ୍ତୁ ସେତେବେଳ ପର୍ଯ୍ୟନ୍ତ ପ୍ରିନ୍ସିପାଲ ତାକୁ ଡାକି ନଥିଲେ । ଯେତେବେଳେ ଆମେ ଘରକୁ ପଳେଇଥିଲୁ, ସେତେବେଳେ ତାକୁ ଡାକି କଥାବାର୍ତ୍ତା ହୋଇଥିଲେ । ପ୍ରିନ୍ସିପାଲ ତାକୁ ଅଭିଯୋଗର ପ୍ରମାଣ ଦେବାକୁ କହିଥିଲେ । ଯଦି ଘଟଣା ଘଟିବା ସମୟରେ ଆମେ ସେଠାରେ ଥାଆନ୍ତୁ, ହୁଏତ ଏପରି ଘଟି ନଥାନ୍ତା । ପ୍ରମାଣ ଦେଇ ନପାରିଲେ ତୁମ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ସୌମ୍ୟାଶ୍ରୀଙ୍କୁ ପ୍ରିନ୍ସିପାଲ କହିଥିଲେ । ସେ ପ୍ରମାଣ କେଉଁଠୁ ଆଣିଥାନ୍ତା ? ଏଚ୍ଓଡିଙ୍କ ସପକ୍ଷରେ ପାଖାପାଖି ୧୦୦ ପିଲା ପ୍ରିନ୍ସିପାଲଙ୍କୁ ଲିଖିତ ଜଣାଇଥିଲେ । ୨ରୁ୩ ଶହ ପିଲା ମଧ୍ୟ ଏଚ୍ଓଡିଙ୍କୁ ସମର୍ଥନ କରୁଥିଲେ । ଯଦି ସେହି ସମୟରେ ସମସ୍ତେ ଆମ ସହିତ ଲଢ଼ିଥାନ୍ତେ, ଏଚ୍ଓଡିଙ୍କୁ ତୁରନ୍ତ ହଟା ଯାଇଥାନ୍ତା, ହୁଏତ ସୌମ୍ୟାଶ୍ରୀ ଆଜି ବଞ୍ଚିଯାଇଥାନ୍ତା । ବଞ୍ଚିଥିଲା ବେଳେ ଯେଉଁମାନେ ଟାହିଟାପରା କରୁଥିଲେ, ତା’ ମୃତ୍ୟୁ ପରେ ନ୍ୟାୟ ପାଇଁ ଚିତ୍କାର କରୁଛନ୍ତି । ସୌମ୍ୟାଶ୍ରୀ ସପକ୍ଷରେ ମାତ୍ର ୧୦ ଜଣ ଥିଲୁ, କିନ୍ତୁ ବିପକ୍ଷରେ ଥିଲେ ୨୦୦ରୁ ୩୦୦ ପିଲା । ସେମାନଙ୍କର ଛି’ଛାକର ଏବଂ ସୋସିଆଲ ମିଡିଆରେ କଟୁ ଟିପ୍ପଣୀକୁ ସହିନପାରି ଶେଷରେ ସୌମ୍ୟାଶ୍ରୀ ଜୀବନ ହାରିଦେଲା ବୋଲି ତାଙ୍କ ସାଙ୍ଗ କହିଛନ୍ତି ।
You Can Read:
