ସମ୍ବଲପୁର: ସେୟାର ମାର୍କେଟରେ ଭଲ ଲାଭର ଲୋଭ ଦେଖାଇ ଲୋକଙ୍କ ଠାରୁ ଠକିନେଲେ ହଜାରେ କୋଟିରୁ ଅଧିକ ଟଙ୍କା। ଏଭଳି ଆଶ୍ଚର୍ଯ୍ୟକର ଘଟଣା ସାମ୍ନାକୁ ଆସିଛି ସମ୍ବଲପୁରରୁ। ନିର୍ଦ୍ଦିଷ୍ଟ ଜଣେ ବ୍ୟକ୍ତି ଏବଂ ତାଙ୍କ ସଂସ୍ଥା ସେୟାର ମାର୍କେଟରେ ଲୋଭ ଦେଖାଇ ଲୋକଙ୍କ ଠାରୁ କୋଟି କୋଟି ଟଙ୍କା ଠକି ନେଇଥିବା ଅଭିଯୋଗ ହୋଇଛି।
ସୂଚନା ଅନୁଯାୟୀ, ସମ୍ବଲପୁରର ସନ୍ତୋଷ କୁମାର ଆଚାର୍ଯ୍ୟ ନାମକ ଜଣେ ବ୍ୟକ୍ତି ଏବଂ ତାଙ୍କ କମ୍ପାନି MCX CT ଶତାଧିକ ଲୋକଙ୍କୁ ସେୟାର ମାର୍କେଟରେ ଭଲ ଲାଭର ଲୋଭ ଦେଖାଇ ୧୦୦୦ କୋଟିରୁ ୧୨୦୦ କୋଟି ଟଙ୍କା ଠକେଇ ନେଇଥିବା ଅଭିଯୋଗ ହୋଇଛି । ଏହି କମ୍ପାନି ଲକ୍ଷେ ଟଙ୍କାରେ ୫ ପ୍ରତିଶତ ଲାଭ ଦେବାର ଲୋଭ ଦେଖାଇ ଜିଲ୍ଲାର ୫୦୦ ଉର୍ଦ୍ଧ୍ବ ଲୋକଙ୍କ ଠାରୁ ଏହି ଠକେଇ କରିଛି। ବଡ଼ କଥା ହେଲା ଟଙ୍କା ନେବା ସମୟରେ ଏକ ବଣ୍ଡ୍ ଦେଇ ଏହି ଠକେଇ କରିଥିବା ଅଭିଯୋଗ କରିଛନ୍ତି ଠକାମୀର ଶିକାର ହୋଇଥିବା ଲୋକେ।
ଏହା ସହ ଠକାମୀର ଶିକାର ହୋଇଥିବା ଲୋକେ MCX କ୍ରାଇସିସ କମିଟି ନାଁରେ ଏକ ସଂଗଠନ ଗଠନ କରି ଧନୁପାଲିରେ ଏତଲା ଦେଇଛନ୍ତି । ରାଜ୍ୟ ବାହାରେ ରହୁଥିବା ଓଡ଼ିଆ ମଧ୍ୟ ଏହି ଠକେଇର ଶିକାର ହୋଇଥିବା ଜଣାପଡ଼ିଛି। ସିକିମ, ସ୍ବିଜରଲ୍ୟାଣ୍ଡ୍, ଛତିଶଗଡ଼, ଇନ୍ଦୋର, ପଶ୍ଚିମବଙ୍ଗରୁ ମଧ୍ୟ ଲୋକେ ଟଙ୍କା ନିବେଶ କରିଥିଲେ। ଆଉ ମ୍ୟାଚୁରିଟି ଟଙ୍କା ସମୟ ଆସିଥିଲେବି ଟଙ୍କା ନମିଳିବା ପରେ ଘଟଣା ସାମ୍ନାକୁ ଆସିଛି |
ଅଭିଯୋଗକାରୀ କହିଛନ୍ତି ଅନେକ ଲୋକ ଜମି ବିକି ଟଙ୍କା ଲଗାଇଥିଲେ, ପୁଣି କିଏ ପେନସନ୍ ଟଙ୍କା ଲଗାଇଥିଲେ । କିଛି ସରକାରୀ କର୍ମଚାରୀ ମଧ୍ୟ ଟଙ୍କା ଲଗାଇ ହଇରାଣରେ ପଡ଼ିଛନ୍ତି।
