ହରିୟାଣାର ପୂର୍ବତନ ମୁଖ୍ୟମନ୍ତ୍ରୀ ଭଜନ ଲାଲଙ୍କ ଝିଅ, ଜ୍ୱାଇଁ ଓ ନାତୁଣୀଙ୍କୁ ଗିରଫ ଲାଗି କୋର୍ଟଙ୍କ ଆଦେଶ

ଗୁରୁଗ୍ରାମ ୩୧।୧୦: ହରିୟାଣାର ପୂର୍ବତନ ମୁଖ୍ୟମନ୍ତ୍ରୀ ଭଜନ ଲାଲଙ୍କ ଝିଅ ରୋଶନୀ ବିଷ୍ଣୋଇ, ଜ୍ୱାଇଁ ଅନୂପ ବିଷ୍ଣୋଇ ଓ ନାତୁଣୀ ଶୁରଭୀ ବିଷ୍ଣୋଇଙ୍କୁ ଗିରଫ କରିବାକୁ ଗୁରୁଗ୍ରାମ କୋର୍ଟ ଶୁକ୍ରବାର ଆଦେଶ ଜାରି କରିଛନ୍ତି। ଏମାନେ ଗୁରୁଗ୍ରାମର ୨ ମୃତ ବ୍ୟକ୍ତିଙ୍କ ପ୍ଲଟ ବିକ୍ରି କରି ୪ କୋଟି ଟଙ୍କା ଠକେଇ କରିଥିବାର ଅଭିଯୋଗ ହୋଇଛି। ସେମାନେ ୨୦୧୬-୧୭ରେ ଏହି ପ୍ଲଟ ବିକ୍ରି କରିଥିଲେ। ଏଥିରୁ ଗୋଟିକୁ ସେମାନେ ୪୨ଲକ୍ଷ ଟଙ୍କାରେ ବିକ୍ରି କରିଥିବା ବେଳେ ଆଉ ଗୋଟିଏକୁ ୧ କୋଟି ୫୯ ଲକ୍ଷ ଟଙ୍କାରେ ବିକ୍ରି କରିଥିଲେ।

ଏହି ଜମି କାରବାରରେ ମଧ୍ୟସ୍ଥି ଥିବା ବିକାଶକୁ ପୋଲିସ ପୂର୍ବରୁ ଗିରଫ କରିଛି। ଏହି ମାମଲାରେ ପ୍ଲଟ ମାଲିକଙ୍କ ପୁଅ ଧର୍ମବୀର ପ୍ରଥମେ ଥାନାରେ ଏତଲା ଦେଇଥିଲେ। ତେବେ ମାମଲାରେ ପୋଲିସ କାର୍ଯ୍ୟାନୁଷ୍ଠାନ ନ କରିବାରୁ ଧର୍ମବୀର କୋର୍ଟଙ୍କ ଶରଣାପନ୍ନ ହୋଇଥିଲେ। ପରେ କୋର୍ଟଙ୍କ ଆଦେଶରେ ପୋଲିସ ଏତଲା ରୁଜୁ କରିଥିବା ବେଳେ ମାମଲା ହରିୟାଣାର ପ୍ରଭାବଶାଳୀ ପରିବାର ସହ ଜଡିତ ଥିବାରୁ ପୋଲିସ କାର୍ଯ୍ୟାନୁଷ୍ଠାନ କରୁନାହିଁ। ଏଣୁ ଏବେ କୋର୍ଟ ଅଭିଯୁକ୍ତଙ୍କୁ ଗିରଫ କରି ହାଜର କରିବାକୁ ପୋଲିସ କମିଶନରଙ୍କୁ ଆଦେଶ ଦେଇଛନ୍ତି।

ଉଲ୍ଲେଯୋଗ୍ୟ ଯେ ପଞ୍ଜାବ ଫାଜିଲ୍କା ଜିଲ୍ଲା ଗୁନ୍ନୋ ଗ୍ରାମର ବାସିନ୍ଦା ଧର୍ମବୀର ଗୁରୁଗ୍ରାମ ପୋଲିସରେ ଏହି ଅଭିଯୋଗ କରିଛନ୍ତି । ସେ ଅଭିଯୋଗ କରିଛନ୍ତି ଯେ ତାଙ୍କ ପିତା ସୁନିଲ ଓ କାକା ସନ୍ଦୀପ କୁମାରଙ୍କ ପ୍ଲଟ ଗୁରୁଗ୍ରାମର ସେକ୍ଟର ୨୩ ଓ ୨୩(ଏ)ରେ ଥିଲା। ତାଙ୍କ କାକାଙ୍କ ମୃତ୍ୟୁ ୧ ଜୁଲାଇ ୨୦୦୪ରେ ହୋଇଥିଲା। ତାଙ୍କ କାକାଙ୍କ ସଢୁ କେ.ଏଲ.ବିଷ୍ଣୋଇ ପ୍ରାୟତଃ ଘରକୁ ଯା ଆସ କରୁଥିଲେ। ସେ ଜାଣିଥିଲେ ସନ୍ଦୀପଙ୍କ ନାମରେ ଏକ ପ୍ଲଟ ଅଛି।

ବିକାଶ ବିଷ୍ଣୋଇ ତହସିଲ ଅଧିକାରୀଙ୍କ ସହ ମିଶି ସନ୍ଦୀପଙ୍କ ସ୍ଥାନରେ କୌଣସି ଅନ୍ୟ ବ୍ୟକ୍ତିକୁ ଛିଡା କରି ୨୮ ଏପ୍ରିଲ ୨୦୧୬ରେ ପ୍ଲଟର ପୋଜେସନ ସାର୍ଟିଫିକେଟ ହାସଲ କରିନେଇଥିଲା। ୧୯ ଫେବୃଆରୀ ୨୦୧୬ରେ ପ୍ଲଟ ନିମନ୍ତେ ଏନଓସି ଜାରି କରିବାକୁ ସନ୍ଦୀପଙ୍କ ନକଲୀ ସ୍ୱାକ୍ଷର କରାଯାଇଥିଲା। ହିସାରର ବିଜେପି ନେତା ତଥା ପୂର୍ବତନ ସାଂସଦ କୂଲଦୀପ ବିଷ୍ଣୋଇଙ୍କ ଭଉଣୀ, ଜ୍ୱାଇଁ ଓ ନାତୁଣୀ ଏହି ପ୍ଲଟ ଗୁଡିକୁ ନକଲୀ କାଗଜ ପତ୍ରରେ ବିକ୍ରି କରିଦେଇଥିଲେ।    

ଅଭିଯୁକ୍ତ ରୋଶନୀ ବିଜେପି ନେତା କୂଲଦୀପ ବିଷ୍ଣୋଇଙ୍କ ନିଜ ଭଉଣୀ। ତାଙ୍କ ଭିଣୋଇ ଅନୂପ ବିଷ୍ଣୋଇ ଜଣେ ବ୍ୟବସାୟୀ ଓ କୂଲଦୀପ ଭଜନ ଲାଲଙ୍କ ପୁଅ ଅଟନ୍ତି। କଂଗ୍ରେସ  ନେତା ଭଜନ ଲାଲ ୩ ଥର ହରିୟାଣାର ମୁଖ୍ୟମନ୍ତ୍ରୀ ଥିଲେ। ପରେ କୂଲଦୀପ ବିଷ୍ଣୋଇ ବିଜେପିରେ ସାମିଲ ହୋଇଯାଇଥିଲେ। ସେ ତାଙ୍କ ପୁଅ ଭବ୍ୟ ବିଷ୍ଣୋଇଙ୍କୁ ଗତ ବିଧାନସଭା ନିର୍ବାଚନରେ ବିଜେପି ଆଦମ ପୁରରୁ ପ୍ରାର୍ଥୀ କରିଥିଲା। ତେବେ ସେ ସେଠାରେ ନିର୍ବାଚନ ହାରି ଯାଇଛନ୍ତି।