ଏବେ ପୁଣି ବଦଳିବ ଆପଣଙ୍କ ଆଧାର, ରହିବନି ନାମ କି ଠିକଣା, ଥିବ କେବଳ ଫଟୋ ଓ QR

ନୂଆଦିଲ୍ଲୀ ୧୯।୧୧: ଆଜି ଆଧାର କେତେ ଜରୁରି ଆପଣ ଜାଣି ସାରିବେଣି। ବିନା ଆଧାରରେ ଏବେ ଆପଣଙ୍କ ବ୍ୟାଙ୍କ କାମ ହୋଇ ପାରୁନାହିଁ। ଏଣୁ ଏହା ଏକ ଜରୁରି ଡକ୍ୟୁମେଣ୍ଟ ହୋଇଥିବା ବେଳେ ଏହାର ଭୁଲ ଉପଯୋଗ ବିପଦ ମଧ୍ୟ ରହୁଛି। ଏହି ବିପଦକୁ ଅନୁମାନ କରି ଆପଣଙ୍କ ଆଧାରକୁ ଆହୁରି ସୁରକ୍ଷିତ କରିବା ପାଇଁ ସରକାର ପୁଣି ଥରେ ଏଥିରେ ପରିବର୍ତ୍ତନ କରିବାକୁ ଯାଉଛନ୍ତି। ଆସିବାକୁ ଥିବା ନୂଆ ଆଧାର କାର୍ଡରେ କେବଳ ଆପଣଙ୍କ ଫଟୋ ଓ ଏକ କ୍ୟୁଆର ରହିବ।

ଏଥିରେ ପୂର୍ବ ଭଳି ଲିଖିତ ଆପଣଙ୍କ ନାମ, ଠିକଣା ଓ ଆଧାରକାର୍ଡ ନମ୍ବର ହଟାଇ ଦିଆଯିବ। ୟୁନିକ୍ ଆଇଡେଣ୍ଟିଫିକେସନ ଅଥରିଟି ଅଫ ଇଣ୍ଡିଆ (ୟୁଆଇଡିଏଆଇ) ଲୋକଙ୍କ ସମ୍ପର୍କିତ ସୂଚନାର ଦୂରୁପଯୋଗ ରୋକିବା ପାଇଁ ଓ ଅଫଲାଇନ ଭେରିଫିକେସନକୁ ହତୋତ୍ସାହିତ କରିବା ପାଇଁ କାର୍ଡଧାରୀଙ୍କ ଫଟୋ ଓ କ୍ୟୁଆର କୋଡ ସହିତ ଆଧାରକାର୍ଡ ଜାରି କରିବାକୁ ବିଚାର କରୁଛନ୍ତି। ଆଧାର ଉପରେ ଆୟୋଜିତ ଏକ ସମ୍ମିଳନୀରେ ୟୁଆଇଡିଏଆଇ ମୁଖ୍ୟକାର୍ଯ୍ୟକାରୀ ଅଧିକାରୀ (ସିଇଓ) ଭୁବନେଶ କୁମାର କହିଛନ୍ତି ଯେ ପ୍ରାଧିକରଣ ଡିସେମ୍ବରରେ ଏକ ନୂଆ ନିୟମ ଆଣିବା ପାଇଁ ବିଚାର କରୁଛନ୍ତି।

ଏହା ଦ୍ୱାରା ହୋଟେଲ,କାର୍ଯ୍ୟକ୍ରମ ଆୟୋଜକ ଓ ଏହିଭଳି ସଂସ୍ଥାଙ୍କ ଦ୍ୱାରା ହେଉଥିବା ଭେରିଫିକେସନକୁ ହତୋତ୍ସାହିତ କରାଯାଇ ପାରିବ ଓ ଏହା ସହିତ ବ୍ୟକ୍ତିଙ୍କ ଗୋପନୀୟତା ବଜାୟ ରଖି ଆଧାରର ଆୟୁ ଭେରିଫିକେସନ ପ୍ରକ୍ରିୟାକୁ ବଢା ଯାଇ ପାରିବ। କୁମାର କହିଛନ୍ତି ଯେ ‘ଏହା ଉପରେ ବିଚାର କରାଯାଉଛି ଯେ କାର୍ଡରେ ଅନ୍ୟ ବିବରଣୀ କାହିଁକି ରହିବ?ଏଥିରେ କେବଳ ଫଟୋ ଓ କ୍ୟୁଆର କୋଡ ରହିଲେ ବି ଚଳିବ। ଯଦି ଆମେ ଅଧିକ ସୂଚନା ଛାପିବା ତେବେ ଲୋକେ ଏହାକୁ ହିଁ ମାନିବେ ଓ ଯେଉଁମାନେ ଏହାର ଦୂରୁପଯୋଗ ଜାଣି ଗଲେଣି ସେମାନେ ଦୂରୁପଯୋଗ ଜାରି ରଖିବେ’। ଏହାର ଅର୍ଥ ହେଉଛି ଏବେ ଆଧାରକାର୍ଡରେ କେବଳ ଏକ ଫଟୋ ଓ କ୍ୟୁଆର କୋଡ ରହିବ ଓ ଏହାର ଦୂରୁପଯୋଗ ହୋଇ ପାରିବନି।

ଆଧାର ଅଧିନିୟମ ଅନୁସାରେ କୌଣସି ବ୍ୟକ୍ତିଙ୍କ ଆଧାର ନମ୍ବର ଅଥବା ବାୟୋମେଟ୍ରିକ ସୂଚନା ଅଫଲାଇନ ଭେରିଫିକେସନ ନିମନ୍ତେ ଏକତ୍ର, ଉପଯୋଗ ଅଥବା ସଂଗୃହୀତ କରାଯାଇ ପାରିବ ନାହିଁ। ଏହା ସତ୍ତ୍ୱେ କେତେକ ସଂସ୍ଥା ଆଧାର କାର୍ଡର ଫଟୋ କପି ଏକତ୍ର କରି ଷ୍ଟୋର ମଧ୍ୟ କରୁଛନ୍ତି। ଏଣୁ ଏପରି ଆଧାରର ଠକେଇ ଅଥବ ଭୁଲ ପ୍ରୟୋଗର ସମ୍ଭାବନା ରହୁଛି। ଏଣୁ ଏଥିରୁ ବର୍ତ୍ତିବା ପାଇଁ ଆଧାରର ସମସ୍ତ ସୂଚନା ଏବେ ଗୋପନୀୟ କରିବାକୁ ଯୋଜନା କରାଯାଉଛି। ଏହା ଦ୍ୱାରା ଅଫଲାଇନ ଭେରିଫିକେସନ ଉପରେ ରୋକ ଲାଗିବା ସହିତ ଲୋକଙ୍କ ସୂଚନାର ତ୍ରୁଟିପୂର୍ଣ୍ଣ ଉପଯୋଗକୁ ରୋକା ଯାଇ ପାରିବ।