ନୂଆଦିଲ୍ଲୀ: CISFରେ ପ୍ରଥମ ମହିଳା କମାଣ୍ଡୋ ୟୁନିଟ୍ ଆରମ୍ଭ ହୋଇଛି। ଏହି ସ୍ୱତନ୍ତ୍ର ମହିଳା ସ୍କ୍ୱାଡ୍ ଦେଶର ବିମାନବନ୍ଦର ଏବଂ ଅନ୍ୟାନ୍ୟ ସମ୍ବେଦନଶୀଳ ପ୍ରତିଷ୍ଠାନରେ ସୁରକ୍ଷା ଦାୟିତ୍ୱ ପାଇଁ ନିୟୋଜିତ ହେବେ। ଏବେ ମହିଳା କମାଣ୍ଡୋମାନଙ୍କୁ ମଧ୍ୟପ୍ରଦେଶର ବାରୱାହାରେ ଅବସ୍ଥିତ ଆଞ୍ଚଳିକ ତାଲିମ କେନ୍ଦ୍ର (RTC)ରେ ସ୍ୱତନ୍ତ୍ର ତାଲିମ ଦିଆଯାଉଛି। ଆଠ ସପ୍ତାହର କମାଣ୍ଡୋ ପାଠ୍ୟକ୍ରମ ବିଶେଷ ଭାବରେ ମହିଳା ସୁରକ୍ଷା କର୍ମୀଙ୍କ ପାଇଁ ଡିଜାଇନ୍ କରାଯାଇଛି। ଏହାର ଲକ୍ଷ୍ୟ-ସେମାନଙ୍କୁ ଉଚ୍ଚ ସୁରକ୍ଷା ପ୍ରତିଷ୍ଠାନ ଏବଂ ପ୍ଲାଣ୍ଟଗୁଡ଼ିକରେ ନିୟୋଜିତ କରି କ୍ୱିକ୍ ରିଆକ୍ସନ୍ ଟିମ୍ (QRT) ଏବଂ ସ୍ପେଶାଲ୍ ଟାସ୍କ ଫୋର୍ସ (STF)ର ଦାୟିତ୍ୱ ପାଇଁ ପ୍ରସ୍ତୁତ କରିବା।
ଏହି କାର୍ଯ୍ୟକ୍ରମରେ ଅସ୍ତ୍ରଶସ୍ତ୍ର ବ୍ୟବହାର ପାଇଁ ତାଲିମ, ଲାଇଭ୍-ଫାୟାର ଡ୍ରିଲ୍, ଦୌଡ଼, ରାପେଲିଂ ସାମିଲ କରାଯାଇଛି। ଏହାକୁ ଜଙ୍ଗଲରେ ବଞ୍ଚିବାର କଳା, ଚ୍ୟାଲେଞ୍ଜିଂ ପରିସ୍ଥିତିରେ ଶୀଘ୍ର ନିଷ୍ପତ୍ତି ନେବାର କ୍ଷମତା ଏବଂ ଦଳଗତ ଭାବେ ତାଲିମ ଦେବା ପାଇଁ ସ୍ୱତନ୍ତ୍ର ଭାବରେ ଡିଜାଇନ୍ କରାଯାଇଛି। ଏଥିରେ ୪୮ ଘଣ୍ଟାର ସେଲ୍ଫ ଫ୍ରାକ୍ଟିସ୍ ମଧ୍ୟ ରହିଛି। ଅଧିକାରୀଙ୍କ ଅନୁଯାୟୀ, ଦେଶର ବିଭିନ୍ନ ବିମାନବନ୍ଦରରେ ବର୍ତ୍ତମାନ ନିୟୋଜିତ ପ୍ରଥମ ମହିଳା ଟିମ୍ ଅଗଷ୍ଟ ୧୧ରୁ ତାଲିମ ନେଉଛନ୍ତି। ଏହା ଅକ୍ଟୋବର ୪ ପର୍ଯ୍ୟନ୍ତ ଜାରି ରହିବ। ଏହା ପରେ ଦ୍ୱିତୀୟ ଟିମ୍ ଅକ୍ଟୋବର ୬ ରୁ ନଭେମ୍ବର ୨୯ ପର୍ଯ୍ୟନ୍ତ ଏହି ତାଲିମରେ ଅଂଶଗ୍ରହଣ କରିବେ।
CISF କହିଛି ଯେ ପ୍ରାରମ୍ଭରେ ଏହି ସ୍ୱତନ୍ତ୍ର ତାଲିମ କାର୍ଯ୍ୟକ୍ରମରେ ଅତି କମରେ ୧୦୦ ଜଣ ମହିଳା କର୍ମଚାରୀଙ୍କୁ ସାମିଲ କରାଯିବ। ଏହି ମହିଳାମାନେ ବିଭିନ୍ନ ବିମାନ ସୁରକ୍ଷା ଗୋଷ୍ଠୀ (ASG) ଏବଂ CISF ୟୁନିଟରୁ ଆସିବେ। ବାହିନୀର ଉଦ୍ଦେଶ୍ୟ ହେଉଛି ଏହି ମହିଳା ତାଲିମ କାର୍ଯ୍ୟକ୍ରମଗୁଡ଼ିକୁ ଏହାର ନିୟମିତ ତାଲିମ ଗଠନର ଏକ ସ୍ଥାୟୀ ଅଂଶ କରିବା। ତାଲିମ ସମାପ୍ତ ହେବା ପରେ, ଏହି ମହିଳା କର୍ମଚାରୀମାନଙ୍କୁ ପ୍ରଥମେ ବିମାନବନ୍ଦରରେ ନିୟୋଜିତ କରାଯିବ ଏବଂ ତା’ପରେ ସେମାନଙ୍କୁ ଅନ୍ୟ ସମ୍ବେଦନଶୀଳ ପ୍ରତିଷ୍ଠାନରେ ମଧ୍ୟ ଦାୟିତ୍ୱ ଦିଆଯିବ।
ସ୍ୱରାଷ୍ଟ୍ର ମନ୍ତ୍ରଣାଳୟ ଦ୍ୱାରା ନିର୍ଦ୍ଧାରିତ ୧୦% ମହିଳା ପ୍ରତିନିଧିତ୍ୱର ଲକ୍ଷ୍ୟକୁ ସଫଳତାର ସହ ହାସଲ କରିବା ପାଇଁ କେନ୍ଦ୍ରୀୟ ଶିଳ୍ପ ସୁରକ୍ଷା ବଳ (CISF) ମହିଳାମାନଙ୍କ ନିଯୁକ୍ତି ବୃଦ୍ଧି କରୁଛି। ବର୍ତ୍ତମାନ, CISFରେ ମହିଳାଙ୍କ ସଂଖ୍ୟା ୧୨ ହଜାରରୁ ଅଧିକ। ୨୦୨୬ ସୁଦ୍ଧା, ଏଥିରେ ୨୪୦୦ ଅଧିକ ମହିଳା କର୍ମଚାରୀଙ୍କୁ ନିଯୁକ୍ତି ଦିଆଯିବ। ଭବିଷ୍ୟତରେ, ନିଯୁକ୍ତି ପ୍ରକ୍ରିୟା ଏପରି ଭାବରେ ସଂଗଠିତ କରାଯିବ ଯେ ବାହିନୀରେ ମହିଳାଙ୍କ ଅଂଶଗ୍ରହଣ ନିରନ୍ତର ସର୍ବନିମ୍ନ ୧୦% ରହିବ।
