ନୂଆଦିଲ୍ଲୀ: ପାକିସ୍ତାନକୁ ସବୁଆଡ଼ୁ ଏକ ଘରକିଆ କରିବାକୁ ଲାଗିପଡ଼ିଛି ଭାରତ। ବିଭିନ୍ନ ଦେଶରୁ କୂଟନୈତିକ ଘେରାବନ୍ଦୀ କରିବାକୁ ଚେଷ୍ଟା କରୁଥିବା ବେଳେ ଆର୍ଥିକ କ୍ଷେତ୍ରରେ ମଧ୍ୟ ପାକିସ୍ତାନକୁ ଦୁର୍ବଳ କରିବା ପାଇଁ ଉଦ୍ୟମ ଜାରି ରହିଛି। ଏନେଇ କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ଏସୀୟ ବିକାଶ ବ୍ୟାଙ୍କ (ଏଡିବି) ସଭାପତିଙ୍କୁ ଭେଟି ପାକିସ୍ତାନର ପାଣ୍ଠି ହ୍ରାସ କରିବାକୁ ଦାବି କରିଛନ୍ତି।
ସରକାରୀ ସୂତ୍ରରୁ ମିଳିଥିବା ଖବର ଅନୁସାରେ, ନିର୍ମଳା ସୀତାରମଣ ଏଡିବି ସଭାପତି ମାସାଟୋ କାଣ୍ଡାଙ୍କୁ ଭେଟିବା ସହିତ ଇଟାଲୀ ଅର୍ଥମନ୍ତ୍ରୀ ଜିଆନକାର୍ଲୋ ଜିଓର୍ଗେଟିଙ୍କୁ ମଧ୍ୟ ଭେଟି ସମାନ ଦାବି ଜଣାଇଛନ୍ତି। ନଗଦ ଅଭାବରେ ଯୁଝୁଥିବା ପାକିସ୍ତାନର ଅର୍ଥନୀତି ଭୁଶୁଡ଼ି ପଡ଼ିଛି। ସେ ଫିଲିପାଇନ୍ସରେ ଥିବା ଆଞ୍ଚଳିକ ବିକାଶ ବ୍ୟାଙ୍କ ଏଡିବିର ପାଣ୍ଠି ଉପରେ ବହୁଳ ଭାବରେ ନିର୍ଭର କରୁଛି।
ପଢନ୍ତୁ- ଭାରତକୁ ଆଘାତ ଦେବାକୁ ସାହସ କରୁଥିବା ଲୋକଙ୍କ ଉଚିତ ଜବାବ ଦେବା ମୋର ଦାୟିତ୍ୱ: ରାଜନାଥ ସିଂହ
ଆନ୍ତର୍ଜାତୀୟ ମୁଦ୍ରା ପାଣ୍ଠି (IMF) ର ସହାୟତା ସହିତ ଏହି ବ୍ୟାଙ୍କ ଜଳବାୟୁ ସ୍ଥିରତା ଠାରୁ ଆରମ୍ଭ କରି ଆର୍ଥିକ ଭିତ୍ତିଭୂମି ପର୍ଯ୍ୟନ୍ତ ବିଭିନ୍ନ କ୍ଷେତ୍ରରେ ଏସୀୟ ଦେଶଗୁଡ଼ିକୁ ଆର୍ଥିକ ସହାୟତା ପ୍ରଦାନ କରିଥାଏ। ତେବେ ଭାରତର କଥା ରଖି ଯଦି ଏଡିବି ପାକିସ୍ତାନ ପାଣ୍ଠି ରୋକିଦିଏ ତେବେ ପାକିସ୍ତାନ ଆର୍ଥିକ ସ୍ଥିତି ଆହୁରି ଦୁର୍ବଳ ହୋଇଯିବାର ଆଶଙ୍କା ରହିଛି।
ଭାରତର ଏହି ପଦକ୍ଷେପକୁ ପାକିସ୍ତାନ ଉପରେ ଆର୍ଥିକ ଆକ୍ରମଣ ବୋଲି କୁହାଯାଉଛି। କେବଳ ସେତିକି ନୁହେଁ, ଅନ୍ତର୍ଜାତୀୟ ମୁଦ୍ରାପାଣ୍ଠି ଦ୍ୱାରା ପାକିସ୍ତାନକୁ ଦିଆଯାଇଥିବା ୭ ବିଲିୟନ ଡଲାରର ସହାୟତା ପ୍ୟାକେଜ ଉପରେ ମଧ୍ୟ ଭାରତ ଆପତ୍ତି ଉଠାଇପାରେ ବୋଲି କୁହାଯାଉଛି। ଆଇଏମ୍ଏଫ୍ ପାକିସ୍ତାନକୁ ୩ ବର୍ଷ ପାଇଁ ଏହି ଆର୍ଥିକ ସହାୟତା ଦେଇଛି, ଯାହା ଜୁଲାଇ ୨୦୨୪ ଚୂଡ଼ାନ୍ତ ହୋଥିଲା।
ସେହିପିର ଭାରତ ପାକିସ୍ତାନକୁ ଆହୁରି ଦୁର୍ବଳ କରିବା ପାଇଁ ଫାଇନାନ୍ସିଆଲ୍ ଆକ୍ସନ୍ ଟାସ୍କ ଫୋର୍ସ (FATF)ର ଗ୍ରେ ତାଲିକାରେ ପୁଣିଥରେ ଫେରାଇ ଆଣିବା ପାଇଁ ପ୍ରୟାସ ଆରମ୍ଭ କରିପାରେ। ଯଦି ପାକିସ୍ତାନ ଏଫ୍ଏଟିଏଫର ଗ୍ରେ ଲିଷ୍ଟକୁ ଆସିଯାଏ ତେବେ ଏହାର ଅର୍ଥନୀତି, ଅନ୍ତର୍ଜାତୀୟ ସମ୍ପର୍କ ଏବଂ ଆର୍ଥିକ କ୍ଷେତ୍ରକୁ ଆହୁରି ଚାପ ପଡ଼ିବ। ଏଥିପାଇଁ ୟୁରୋପୀୟ ରାଷ୍ଟ୍ରଗୁଡ଼ିକ ସହିତ ମଧ୍ୟ ଯୋଗାଯୋଗ କରୁଥିବା ସରକାରୀ ସୂତ୍ରରୁ ସୂଚନା ମିଳିଛି।
ପଢ଼ନ୍ତୁ- ସିନ୍ଧୁ ପରେ ଚେନ୍ନାବ... ପାକିସ୍ତାନକୁ ଆଉ ଏକ ଝଟକା; ଦୁଇଟି ହାଇଡ୍ରୋ-ପାଓ୍ବାର ପ୍ରକଳ୍ପ କାମ ଆରମ୍ଭ
