ବ୍ରହ୍ମପୁର: ଆସନ୍ତା ୨୬ ତାରିଖରେ ରିଲିଜ ହେବ ତେଜସ୍ୱିନୀ ଚଳଚ୍ଚିତ୍ର। ଗଞ୍ଜାମ ଜିଲ୍ଲା କୁକୁଡ଼ାଖଣ୍ଡି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ସ୍ୱାସ୍ଥ୍ୟକର୍ମୀ କେ.କୃଷ୍ଣା କୁମାରୀଙ୍କ ସଂଘର୍ଷମୟ ଜୀବନୀ ଉପରେ ଆଧାରିତ ଚଳଚ୍ଚିତ୍ର ତେଜସ୍ବିନୀ । କୃଷ୍ଣା କୁମାରୀ ନିଜର ନିଷ୍ଠାପର ସେବା ଓ ସେବା ପ୍ରତି ତାଙ୍କର ଜୀବନ ଉତ୍ସର୍ଗୀକୃତ କରିଥିବା ଯୋଗୁଁ ୨୦୧୭ ମେ ମାସରେ ଦିଲ୍ଲୀରେ ତତ୍କାଳୀନ ରାଷ୍ଟ୍ରପତି ପ୍ରଣବ ମୁର୍ଖାଜୀଙ୍କ ଠାରୁ ଫ୍ଲୋରେନ୍ସ ନାଇଟ ଏଙ୍ଗେଲ ପୁରସ୍କାର ପାଇଥିଲେ ।
ଏହି ପୁରସ୍କାର ପାଇବା ସମ୍ପର୍କରେ ଜାଣିବାକୁ ପାଇଥିଲେ ଚଳଚ୍ଚିତ୍ର ନିର୍ଦ୍ଧେଶକ କୁନାଲ ପଟ୍ଟନାୟକ । କୃଷ୍ଣାଙ୍କ ସଂର୍ଘର୍ଷପୂର୍ଣ୍ଣ ଜୀବନ କାହାଣୀ ସାଙ୍ଗକୁ ତାଙ୍କ ସେବାକୁ ନେଇ ଏକ ଚଳଚ୍ଚିତ୍ର କରିବା ମନସ୍ତ କରିଥିଲେ ସେ । ଏହାପରେ ତେଜସ୍ବିନୀ ନାମକ ଏକ ଚଳଚ୍ଚିତ୍ର କରିବା ସହିତ ସେଥିରେ କୃଷ୍ଣା କୁମାରୀଙ୍କ ଜୀବନ କାହାଣୀ ସହ ୧୬ଟି ସଚେତନତା ବାର୍ତ୍ତାକୁ ଅନ୍ତର୍ଭୁକ୍ତ କରି ଚଳଚ୍ଚିତ୍ର ନିର୍ମାଣ କରିଛନ୍ତି ।
ଏହି ଚଳଚ୍ଚିତ୍ରଟି ୪୦ଟି ଦେଶରେ ପ୍ରଦର୍ଶିତ ହୋଇ ୫ଟି ଆଓ୍ବାର୍ଡ଼ ମଧ୍ୟ ପାଇସାରିଛି । ଏହି ଚଳଚ୍ଚିତ୍ରରେ ନିଜେ କୃଷ୍ଣା ଓ ବେଶ ନାମାଦୀମୀ ଅଭିନେତା, ଅଭିନେତ୍ରୀ ମାନଙ୍କୁ ନେଇ ନିର୍ମିତ ହୋଇଛି । ଆସନ୍ତା ୨୬ ତାରିଖରେ ବ୍ରହ୍ମପୁରରେ ଏହି ତେଜସ୍ବିନୀ ଚଳଚ୍ଚିତ୍ର ପ୍ରିମିୟର ହେବାକୁ ଥିବା ବେଳେ ସିନେମା ହଲ୍କୁ ଆସି ଚଳଚ୍ଚିତ୍ର ଦେଖିବାକୁ ଲୋକଙ୍କୁ ଅନୁରୋଧ କରିଛନ୍ତି କୃଷ୍ଣା କୁମାରୀ । ଏହି ଚଳଚ୍ଚିତ୍ର କେବଳ କୃଷ୍ଣାଙ୍କ ଜୀବନୀ ନୁହେଁ ବରଂ ଏଥିରେ ରହିଥିବା ୧୬ଟ ସଚେତନତା ବାର୍ତ୍ତା ସମାଜରେ ପରିବର୍ତ୍ତନ ଆଣିବାରେ ସହାୟକ ହୋଇପାରିବ ବୋଲି କୃଷ୍ଣା ଆଶା ରଖିଥିବା କହିଛନ୍ତି । ଆଉ ଏହି ତେଜସ୍ବିନୀ ନିଶ୍ଚିତ ଭାବେ ଲୋକଙ୍କ ଦ୍ବାରା ଆଦୃତ ହେବ ବୋଲି କହିଛନ୍ତି କୃଷ୍ଣା କୁମାରୀ ।
