ନୂଆଦିଲ୍ଲୀ: ପହଲଗାମ୍ ଆତଙ୍କବାଦୀ ଆକ୍ରମଣ ଜବାବରେ ଭାରତ ଅପରେସନ୍ ସିନ୍ଦୂର କରି ପାକିସ୍ତାନର ଅଣ୍ଟା ଭାଙ୍ଗିଥିଲା । ପାକିସ୍ତାନ ଓ ପିଓକେରେ ଥିବା ୧୦୦ରୁ ଅଧିକ ଆତଙ୍କବାଦୀ ଭାରତର ରକେଟ୍ ମାଡ଼ରେ ନିପାତ ହୋଇଥିଲେ । ଏହାସହ ପାକିସ୍ତାନର ଅନେକ ଗୁରୁତ୍ୱପୂର୍ଣ୍ଣ ଏୟାରବେସ୍ ମଧ୍ୟ ନଷ୍ଟ କରିଥିଲା । ବାୟୁସେନା ଉପମୁଖ୍ୟ ନର୍ମଦେଶ୍ୱର ତିୱାରୀ ଅପରେସନ୍ ସିନ୍ଦୂରକୁ ନେଇ ଏକ ବଡ଼ ଖୁଲାସା କରିଛନ୍ତି । ସେ କହିଛନ୍ତି ଯେ ଏହି ଅପରେସନରେ ଭାରତ ୫୦ରୁ ବି କମ୍ ହତିଆର ପ୍ରୟୋଗ କରିଥିଲା । କମ ଅତିଆର ପ୍ରୟୋଗରେ ହିଁ ପାକିସ୍ତାନ ମାଟି କାମୁଡ଼ିଥିଲା ଓ ଅସ୍ତ୍ରବିରତି ପାଇଁ ନେହୁରା ହୋଇଥିଲା । 

ଏନଡିଟିଭିକୁ ସାକ୍ଷାତକାରରେ ଏୟାର ମାର୍ଶଲ ନର୍ମଦେଶ୍ୱର ତିୱାରୀ କହିଛନ୍ତି ଯେ ପାକିସ୍ତାନକୁ ଅସ୍ତ୍ରବିରତି ଟେବୁଲ୍ ଯାଏ ଆଣିବା ପାଇଁ ଭାରତୀୟ ବାୟୁସେନାକୁ ୫୦ରୁ କମ୍ ହତିଆର୍ ମାଡ଼ କରିବାକୁ ପଡ଼ିଥିଲା । ସେ କହିଛନ୍ତି, ବିକଳ୍ପ ସୂଚୀରେ ଆମ ପାଖରେ ବଡ଼ ସଂଖ୍ୟାରେ ଟାର୍ଗେଟ୍ ସେଟ୍ସ ଥିଲା ଓ ୯ ଠିକଣାକୁ ଟାର୍ଗେଟ୍ କରାଯାଇଥିଲା । ଆମ ପାଇଁ ମୁଖ୍ୟ କଥା ହେଉଛି ୫୦ରୁ କମ୍ ହତିଆର ପ୍ରୟୋଗରେ ହିଁ ଅସ୍ତ୍ରବିରତି ହୋଇଥିଲା । ତେଣୁ ଏହା ଏକ ଗୁରୁତ୍ୱପୂର୍ଣ୍ଣ ବିଷୟ । 

ସେ କହିଛନ୍ତି, କୌଣସି ଯୁଦ୍ଧକୁ ଆରମ୍ଭ କରିବା ସହଜ ହୋଇଥାଏ, କିନ୍ତୁ ତାହାକୁ ଶେଷ କରିବା ସହଜ ନୁହେଁ । ଏହି କଥାକୁ ଧ୍ୟାନରେ ରଖିବା ଜରୁରି ହୋଇଥାଏ, ଫଳରେ ଆମ ସେନା ସକ୍ରିୟ ରହିବେ, ମୁତୟନ ରହିବେ ଓ ଯେକୌଣସି ସ୍ଥିତି ପାଇଁ ପ୍ରସ୍ତୁତ ରହିବେ । ସେ ଅପରେସନ ସିନ୍ଦୂରର ସଫଳାର ଶ୍ରେୟ ଭାରତର IACCSକୁ ଦେଇଛନ୍ତି, ଯାହା ଆକ୍ରାମକ ଓ ପ୍ରତିରକ୍ଷା ଉଭୟ ଅଭିଯାନ ପାଇଁ ମେରୁଦଣ୍ଡ ହୋଇଛି । ଏହି ସିଷ୍ଟମ ଭାରତକୁ କଡ଼ା ଦେବାରେ ସକ୍ଷମ କରିଛି ଓ ଏହି କାରଣରୁ ପାକିସ୍ତାନ ଅସ୍ତ୍ରବିରତି ପାଇଁ ଅନୁରୋଧ କରିଥିଲା ।