‘ରୁଷଠାରୁ ତେଲ କିଣିବା ବନ୍ଦ କରିବ ଭାରତ’, ଡୋନାଲ୍ଡ ଟ୍ରମ୍ପଙ୍କ ବଡ଼ ଦାବି

ନୂଆଦିଲ୍ଲୀ: ରୁଷଠାରୁ ତେଲ କିଣିବା ପ୍ରସଙ୍ଗକୁ ନେଇ ଭାରତ ଓ ଆମେରିକା ମଧ୍ୟରେ ସମ୍ପର୍କ ଭଲ ନାହିଁ । ଏହାରି ଭିତରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଭାରତକୁ ନେଇ ପୁଣି ଏକ ବଡ଼ ବୟାନ ଦେଇଛନ୍ତି । ରୁଷଠାରୁ ଆଉ ତେଲ କିଣିବା ଭାରତ ବନ୍ଦ କରିବା ନେଇ ପ୍ରଧାନମନ୍ତ୍ରୀ ମୋଦୀ ଭରସା ଦେଇଥିବା ସେ ଦାବି କରିଛନ୍ତି । ଟ୍ରମ୍ପ ଏହାକୁ ଏକ ବଡ଼ ପଦକ୍ଷେପ ବୋଲି କହିଛନ୍ତି । ଏହା ରୁଷ ଉପରେ ଚାପ ପକାଇବା ଯୋଜନାର ଅଂଶ ବୋଲି ସେ କହିଛନ୍ତି । ତେବେ ଟ୍ରମ୍ପଙ୍କ ବୟାନ ଉପରେ ଭାରତ ସରକାରଙ୍କ ପକ୍ଷରୁ କୌଣସି ପ୍ରତିକ୍ରିୟା ଆସିନାହିଁ ।

ଓଭାଲ ଅଫିସରେ ସାମ୍ୱାଦିକଙ୍କ ପ୍ରଶ୍ନର ଜବାବରେ ଦେଇ ଟ୍ରମ୍ପ କହିଛନ୍ତି, "ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ତାଙ୍କର ଭଲ ବନ୍ଧୁ ଓ ଦୁହିଁଙ୍କ ମଧ୍ୟରେ ଉତ୍ତମ ସମ୍ପର୍କ ରହିଛି । ଭାରତ ଖୁବଶୀଘ୍ର ରୁଷଠାରୁ ତେଲ କିଣିବା ବନ୍ଦ କରିଦେବ ।" ସେ ଦାବି କରିଛନ୍ତି ଯେ ନିଜେ ପ୍ରଧାନମନ୍ତ୍ରୀ ମୋଦୀ ବ୍ୟକ୍ତିଗତ ଭାବେ ତାଙ୍କୁ ଏହି ଆଶ୍ୱାସନା ଦେଇଛନ୍ତି । ଟ୍ରମ୍ପ କହିଛନ୍ତି ଯେ ଭାରତର ଏହି ପଦକ୍ଷେପ ବହୁତ ବଡ଼ । ଏବେ ଚୀନ ମଧ୍ୟ ଏପରି କାମ କରୁ ବୋଲି ଆମେ ଚାହୁଁବୁ ।

ଭାରତରେ ଆମେରିକୀୟ ରାଷ୍ଟ୍ରଦୂତ ସର୍ଗିଓ ଗୋର ଓ ପ୍ରଧାନମନ୍ତ୍ରୀ ମୋଦୀଙ୍କ ବୈଠକ ଉପରେ ବି ଟ୍ରମ୍ପ ପ୍ରତିକ୍ରିୟା ଦେଇଛନ୍ତି । ସେ କହିଛନ୍ତି ଯେ ସେ (ପିଏମ୍ ମୋଦୀ) ଚମତ୍କାର ଓ ମହାନ ବ୍ୟକ୍ତି । ମୋଦୀ ମୋତେ ପସନ୍ଦ କରନ୍ତି ବୋଲି ସର୍ଗିଓ ମୋତେ କହିଛନ୍ତି । ମୁଁ ବର୍ଷ ବର୍ଷ ଧରି ଭାରତକୁ ଦେଖୁଛି । ପ୍ରଥମେ ପ୍ରତିବର୍ଷ ଜଣେ ନେତା ଆସୁଥିଲେ, କିଛି ମାସ ପାଇଁ, କିଛି ବର୍ଷ ଯାଏ ରହୁଥିଲେ । କିନ୍ତୁ ଏବେ ମୋର ବନ୍ଧୁ ଦୀର୍ଘ ସମୟ ଧରି କ୍ଷମତାରେ ଅଛନ୍ତି ଓ ମୋତେ ଭରସା ଦେଇଛନ୍ତି ଯେ ସେ ରୁଷଠାରୁ ତେଲ କିଣିବେନି । ଟ୍ରମ୍ପ ଆହୁରି କହିଛନ୍ତି ଯେ ଏହି ପରିବର୍ତ୍ତନ ତୁରନ୍ତ ଲାଗୁ ହେବ ନାହିଁ, କିନ୍ତୁ କିଛି ସମୟ ପରେ ଏହାର ପ୍ରଭାବ ଦେଖିବାକୁ ମିଳିବ ।

ତେବେ ଆମେରିକା ରାଷ୍ଟ୍ରପତିଙ୍କ ଏହି ଦାବି ଉପରେ ଭାରତ ସରକାରଙ୍କ ପକ୍ଷରୁ କୌଣସି ପ୍ରତିକ୍ରିୟା ଆସିନାହିଁ । ୱାଶିଂଟନ ସ୍ଥିତ ଭାରତୀୟ ଦୂତାବାସ ଏହି ମାମଲାରେ କୌଣସି ଜବାବ ଦେଇ ନାହିଁ । ଉଲ୍ଲେଖଯୋଗ୍ୟ ଯେ ରୁଷଠାରୁ ତେଲ କିଣିବାରେ ଚୀନ ପରେ ଭାରତ ହେଉଛି ଦ୍ୱିତୀୟ ସର୍ବବୃହତ ଆମଦାନକାରୀ । ୟୁକ୍ରେନ ଯୁଦ୍ଧକୁ ନେଇ ଅଗଷ୍ଟରେ ରୁଷ ଉପରେ ଚାପ ପକାଇବା ପ୍ରୟାସରେ ଆମେରିକା ରାଷ୍ଟ୍ରପତି ଟ୍ରମ୍ପ ଭାରତ ଉପରେ ୫୦ ପ୍ରତିଶତ ଟାରିଫ୍ ଲଗାଇଥିଲେ । ରୁଷଠାରୁ ତେଲ କିଣିବା ଉପରେ  ପ୍ରତିଶତ ଅତିରିକ୍ତ ଟାରିଫ ଏଥିରେ ସାମିଲ ଥିଲା । ଟ୍ରମ୍ପ ପ୍ରଶାସନର ଅଭିଯୋଗ ଯେ ରୁଷ ତେଲ କିଣି ଚୀନ ଓ ଭାରତ ୟୁକ୍ରେନ ଯୁଦ୍ଧକୁ ଫଣ୍ଡିଂ କରୁଛନ୍ତି ।