୧୧ ମିନିଟ୍‌ରେ ଆର୍ଜେଣ୍ଟିନାକୁ ଧୂଳି ଚଟାଇଲା ଭାରତ, ହକି ବିଶ୍ଵକପରେ ଜିତିଲା କାଂସ୍ୟ ପଦକ

ନୂଆଦିଲ୍ଲୀ: ଶେଷ ୧୧ ମିନିଟରେ ଦନାଦନ ୪ ଗୋଲ୍ ଦେଇ ଭାରତ ୨୦୨୧ର ଚାମ୍ପିଅନ ଆର୍ଜେଣ୍ଟିନାକୁ ହରାଇ ଜୁନିୟର ପୁରୁଷ ହକି ବିଶ୍ଵକପରେ କାଂସ୍ୟ ପଦକ ଜିତିଛି। ଏହି ମ୍ୟାଚ୍ରେ ଭାରତ ୨୦୨୧ର ଚାମ୍ପିଅନ ଆର୍ଜେଣ୍ଟିନାକୁ ୪-୨ରେ ହରାଇ ୯ ବର୍ଷ ପରେ ଜୁନିୟର ବିଶ୍ଵକପ୍ ହକିରେ ପଦକ ନିଜ ନାଁରେ କରିଛି। ଏହା ପୂର୍ବରୁ ଭାରତ ୨୦୦୧ରେ ହୋବାର୍ଟ ଓ ୨୦୧୬ ଲକ୍ଷ୍ନୌରେ ଚାମ୍ପିଅନ ହୋଇଥିଲା। ଗତ ଦୁଇ ଥର ଦଳ କାଂସ୍ୟ ପଦକ ମୁକାବିଲାରେ ହାରି ଚତୁର୍ଥ ସ୍ଥାନରେ ରହିଥିଲା। ଭାରତ ପକ୍ଷରୁ ଅଙ୍କିତ ପାଲ୍(୪୯ ତମ ମିନିଟ୍), ମନମୀତ ସିଂ(୫୨ତମ), ଶାରଦାନନ୍ଦ ତିଓ୍ଵାରୀ(୫୭ତମ) ଓ ଅନମୋଲ ଇକ୍କା(୫୮ତମ) ମିନିଟ୍ ଗୋଲ୍ ଦେଇଥିଲେ। ଆର୍ଜେଣ୍ଟିନା ପାଇଁ ନିକୋଲାସ ରୋଡ୍ରିଗେଜ(୫ମ) ଓ ସାଣ୍ଟିୟାଗୋ ଫର୍ଣ୍ଣାଡିଜ(୪୪ତମ) ମିନିଟରେ ଗୋଲ୍ ସ୍କୋର କରିଥିଲେ।