ପାସପୋର୍ଟ Rankingରେ ୧୦ ସ୍ଥାନ ଉପରକୁ ଉଠିଲା ଭାରତ, ଜାଣନ୍ତୁ ହେନଲେ ଇଣ୍ଡେକ୍ସରେ ଏବେ କେଉଁଠି?

ନୂଆଦିଲ୍ଲୀ ୧୩।୨: ଅନ୍ତର୍ଜାତୀୟ ସ୍ତରରେ ବଢୁଥିବା ଭାରତର ପ୍ରତିଷ୍ଠା ଏବେ ପାସପୋର୍ଟର ଶକ୍ତିରେ ସାମ୍ନାକୁ ଆସିଛି। ବିଶ୍ୱରେ ପାସପୋର୍ଟ ଶକ୍ତି ମାପୁଥିବା ବୈଶ୍ୱିକ ସୂଚକାଙ୍କ ହେନଲେ ପାସପୋର୍ଟ ଇଣ୍ଡେକ୍ସରେ ଭାରତ ଚଳିତବର୍ଷ ୧୦ଟି ପାହଚ ଉପରକୁ ଉଠିଛି। ପୂର୍ବରୁ ଭାରତ ୮୫ତମ ସ୍ଥାନରେ ଥିଲା। ଏବେ ୭୫ ତମ ସ୍ଥାନକୁ ପହଞ୍ଚିଛି। ଏହି ସୁଧାରର ଅର୍ଥ କେବଳ ରାଙ୍କିଙ୍ଗରେ ପରିବର୍ତ୍ତନ ନୁହେଁ ବରଂ ସାଧାରଣ ଭାରତୀୟ ଯାତ୍ରୀଙ୍କ ନିମନ୍ତେ ବାସ୍ତବିକ ସୁବିଧା। ତାଜା ତଥ୍ୟ ଅନୁସାରେ ଭାରତୀୟ ନାଗରିକ ଏବେ ୫୬ଟି ଦେଶକୁ ଭିସା ମୁକ୍ତ ଅଥବା ଭିସା ଅନ ଆରାଇଭଲ ସୁବିଧା ପାଇ ପାରିବେ।

ଏହି ସୂଚକାଙ୍କର ଆଧାର ପାସପୋର୍ଟଧାରୀ କେତେ ଦେଶକୁ ଭିସା ମୁକ୍ତ ଯାତ୍ରା କରିପାରିବେ। ଏଥିରେ ରାଙ୍କ ଯେତେ ଭଲ ରହିବ ସେହି ଦେଶର ନାଗରିକ ସେତେ ଅଧିକ ଦେଶକୁ ନିର୍ବାଧରେ ଯାତ୍ରା କରିପାରିବେ। ଭାରତ ଏବେ ଯେଉଁ ସ୍ଥିତିକୁ ପହଞ୍ଚି ୨୦୦୬ ମସିହାରେ ସେହି ସ୍ଥିତିରେ ଥିଲା। ହେଲେ ଏବେକା ଉପଲବ୍ଧି ବାସ୍ତବିକ୍ ଉତ୍ସାହଜନକ। ତେବେ ଐତିହାସିକ ରୂପେ ଦେଖିଲେ ଭାରତୀୟ ପାସପୋର୍ଟର ପ୍ରଦର୍ଶନ ଅନେକ ବାର ତଳ ଉପର ହୋଇଛି।

ଏହା ପୂର୍ବରୁ ୨୦୦୬ ମସିହାରେ ଭାରତ ହେନଲେ ଇଣ୍ଡେକ୍ସରେ ୭୧ତମ ସ୍ଥାନକୁ ପହଞ୍ଚିଥିଲା, ଯାହା ଏପର୍ଯ୍ୟନ୍ତ ସର୍ବୋଚ୍ଚ ରାଙ୍କିଙ୍ଗ ହୋଇ ରହିଛି। ଗତ କିଛି ବର୍ଷରେ ଭାରତ ପ୍ରଥମେ ୮୦ତମ ଓ ପରେ ୮୫ ତମ ସ୍ଥାନକୁ ଓହ୍ଲାଇଯାଇଥିଲା। ଏଥିରେ ଏବେ ହୋଇଥିବା ସୁଧାରକୁ ସକରାତ୍ମକ ସଂକେତ ରୂପେ ଦେଖା ଯାଉଛି। ବୈଶ୍ୱିକ ସୂଚୀର ଶୀର୍ଷ ସ୍ଥାନରେ ଏବେବି ସିଙ୍ଗାପୁର ରହିଛି। ସିଙ୍ଗାପୁର ନାଗରିକ ବିନା ଭିସାରେ ୧୯୨ ଗନ୍ତବ୍ୟରେ ଯାଇ ପାରୁଛନ୍ତି।

ଏହା ପଛକୁ ଦ୍ୱିତୀୟ ସ୍ଥାନରେ ଜାପାନ ଓ ଦକ୍ଷିଣ କୋରିଆ ମିଳିତ ରହିଛନ୍ତି। ତୃତୀୟ ସ୍ଥାନରେ ୟୁଏଇ ଓ ସ୍ୱିଡେନ ମିଳିତ ଥିବା ବେଳେ ୟୁରୋପର କେତେକ ଦେଶ ଯେପରି ଫ୍ରାନ୍ସ, ଜର୍ମାନୀ, ଇଟାଲୀ, ସ୍ପେନ ଓ ସ୍ୱିଜରଲ୍ୟାଣ୍ଡ ଶୀର୍ଷ ଶ୍ରେଣୀରେ ରହିଛନ୍ତି।

ଏହା ବି ପଢନ୍ତୁ:-