ଆସେସକୁ କବଜା କଲା ଅଷ୍ଟ୍ରେଲିଆ, ଫେଲ୍ ମାରିଲା ଇଂଲଣ୍ଡର ବ୍ୟାଟିଂ ଏବଂ ବୋଲିଂ

କାନବେରା, ୨୧/୧୨: ଆସେସ୍ ଉପରେ ଅଷ୍ଟ୍ରେଲିଆର କବଜା । ୫ ମ୍ୟାଚ୍ ବିଶିଷ୍ଟ୍ ଆସେସ ଟେଷ୍ଟ ସିରିଜକୁ ଦଖଲ କରିଛି ଅଷ୍ଟ୍ରେଲିଆ । ଦଳ ତୃତୀୟ ମ୍ୟାଚକୁ ୮୨ ରନରେ ଜିତି ସିରିଜକୁ ଆଗୁଆ କବଜା କରିନେଇଛି । ଏହାସହ ୩-୦ରେ ଆଗୁଆ ରହିଛି । ଅନ୍ୟ ଦିଗରେ ଇଂଲଣ୍ଡର ଆସେସ ବିଜୟ ସ୍ୱପ୍ନ ଭାଙ୍ଗି ଯାଇଛି ।

ତୃତୀୟ ମ୍ୟାଚରେ ଅଷ୍ଟ୍ରେଲିଆ ଇଂଲଣ୍ଡକୁ ୪୩୫ ରନର ଟାର୍ଗେଟ୍ ଦେଇଥିଲା । ଜବାବରେ ଇଂଲଣ୍ଡ ୩୫୨ ରନରେ ଅଲଆଉଟ୍ ହୋଇଯାଇଥିଲା ।

ଅଷ୍ଟ୍ରେଲିଆର ଦମଦାର ବିଜୟ

ଅଷ୍ଟ୍ରେଲିଆ ପ୍ରଥମେ ବ୍ୟାଟିଂ କରି ପ୍ରଥମ ପାଳିରେ ୩୭୧ ରନ୍ କରିଥିଲା । ଉସମାନ ଖ୍ୱାଜାଙ୍କ ୮୨ ରନ୍ ଏବଂ ଆଲେକ୍ସ କେରୀଙ୍କ ୧୦୬ ରନ୍ ବଳରେ ଦଳକୁ ମଜବୁତ ସ୍ଥିତିରେ ପହଁଚାଇଥିଲା । ଜବାବରେ ଇଂଲଣ୍ଡ ୨୮୬ ରନରେ ଅଲଆଉଟ୍ ହୋଇଯାଇଥିଲା । ବେନ ଷ୍ଟୋକ୍ ୮୩ ରନ୍ ସ୍କୋର କରିଥିଲେ । ଦ୍ୱିତୀୟ ଇନିଂସରେ ଟ୍ରେଭିସ୍ ହେଡ୍ ୧୭୦ ରନ୍ ଏବଂ ଆଲେକ୍ସ କେରୀ ୭୨ ରନ୍ ସ୍କୋର କରିଥିଲେ । ଫଳରେ ୩୪୯ ରନ୍ କରିଥିଲା କଙ୍ଗାରୁ ଟିମ୍ । ଫଳରେ ଇଂଲଣ୍ଡକୁ ୪୩୫ ରନର ବିଜୟ ଲକ୍ଷ୍ୟ ମିଳିଥିଲା ।

ବ୍ୟାଟସମ୍ୟାନଙ୍କ ପରି ଅଷ୍ଟ୍ରେଲୀୟ ବୋଲରମାନେ ମଧ୍ୟ ଜବରଦସ୍ତ ପ୍ରଦର୍ଶନ କରିଥିଲେ । ମିଚେଲ ଷ୍ଟାର୍କ, ପ୍ୟାଟ୍ କମିନ୍ସ ଏବଂ ନାଥାନ ଲାୟନ ତିନୋଟି ଲେଖାଏଁ ଓ୍ୱିକେଟ୍ ନେଇଥିଲେ । ସେହିପରି ସ୍କଟ୍ ବୋଲାଣ୍ଡ୍ ଗୋଟିଏ ଓ୍ୱିକେଟ୍ ହାସଲ କରିଥିଲେ ।

୧୧ ଦିନରେ ଆସେସ ବିଜୟ

ଅଷ୍ଟ୍ରେଲିଆ ମାତ୍ର ୧୧ ଦିନରେ ହିଁ ସିରିଜ୍ ଜିତିନେଇଛି । ଦଳ ପ୍ରଥମ ଟେଷ୍ଟକୁ ମାତ୍ର ଦୁଇ ଦିନରେ ମୁକାବିଲା ଜିତିଥିଲା । ସେହିପରି ଦ୍ୱିତୀୟ ଏବଂ ତୃତୀୟ ମ୍ୟାଚ୍ ଜିତିବା ପାଇଁ ଦଳକୁ ୯ ଦିନ ଖେଳିବାକୁ ପଡିଥିଲା । ଅନ୍ୟ ଦିଗରେ ବ୍ୟାଜବଲ୍ ପାଇଁ ପ୍ରସିଦ୍ଧ ଥିବା ଇଂଲଣ୍ଡ ଟିମ୍ କିଛି କରିସ୍ମା କରିପାରିନଥିଲା । ଦଳର ବରିଷ୍ଠ ଖେଳାଳିମାନେ ସ୍କୋର କରିବାରେ ବିଫଳ ହୋଇଥିଲେ । ବୋଲରମାନେ ମଧ୍ୟ ସେତେଟା ପ୍ରଭାବୀ ହୋଇପାରିନଥିଲେ ।