ଭାରତୀୟ ମହିଳାଙ୍କୁ ଏୟାରପୋର୍ଟରେ ଅପମାନିତ କରିବା ଘଟଣା: ଅଭିଯୋଗକୁ ଖଣ୍ଡନ କଲା ଚୀନ, କହିଲା ଅରୁଣାଚଳ ପ୍ରଦେଶ ଆମର

ବେଜିଂ:ସାଂଘାଇର ପୁଡୋଙ୍ଗ ବିମାନବନ୍ଦରରେ ଅରୁଣାଚଳ ପ୍ରଦେଶର ଜଣେ ଭାରତୀୟ ମହିଳାଙ୍କୁ ହଇରାଣ କରାଯାଇଥିବା ଅଭିଯୋଗକୁ ଚୀନ ଖଣ୍ଡନ କରିଛି। ଓଲଟି ଏହି ଘଟଣାକୁ ଭିତ୍ତି କରି ଚୀନ ଭାରତର ଅରୁଣାଚଳ ପ୍ରଦେଶକୁ ଜାଙ୍ଗନାନ ବୋଲି କହିବା ସହ ନିଜର ଅଂଶ ବୋଲି ଦାବି କରିଛି। ଯଦିଓ ଭାରତ ଏହାକୁ ଅବିଚ୍ଛେଦିଅ ଅଙ୍ଗ ବୋଲି ବିଚାର କରିଥାଏ।

ଅରୁଣାଚଳ ପ୍ରଦେଶରେ ଜନ୍ମିତ ପେମା ୱାଙ୍ଗଜୋମ ଥୋଙ୍ଗଡକ ନାମକ ଜଣେ ମହିଳା ନଭେମ୍ବର ୨୧ ତାରିଖରେ ଲଣ୍ଡନରୁ ଜାପାନ ଯାଉଥିବା ସମୟରେ ତାଙ୍କୁ ଚୀନ ଅଧିକାରୀମାନେ ହଇରାଣ କରିଥିଲେ। ଜାପାନ ଯିବା ସମୟରେ ପେମାଙ୍କୁ ସାଂଘାଇର ପୁଡୋଙ୍ଗ ଏୟାରପୋର୍ଟରେ ଲେଓଭର(ଯାତ୍ରା ସମୟରେ ରହଣୀ) କରିବାକୁ ପଡ଼ିଥିଲା। ଏହି ସମୟରେ ଚୀନର ଇମିଗ୍ରେସନ ଅଧିକାରୀମାନେ ତାଙ୍କ ପାସ୍ପୋର୍ଟକୁ ଅବୈଧ କହିବା ସହିତ ତାଙ୍କୁ ନାନା ହଇରାଣ ହରକତ କରିଥିଲେ। ଅରୁଣାଚଳ ପ୍ରଦେଶ ଚୀନର ଅଂଶ, ତୁମେ ଚୀନ ପାସ୍ପୋର୍ଟ ଆବେଦନ କର ବୋଲି କହି ଉପହାସ କରିଥିଲେ ଚୀନ ଇମିଗ୍ରେସନ ଅଧିକାରୀ।

ଦୀର୍ଘ ୧୮ ଘଣ୍ଟା ଧରି ସେ ସମସ୍ୟାରେ ସମ୍ମୁଖୀନ ହୋଇଥିଲେ ପେମା। ଏହାପରେ ଚୀନରେ ଥିବା ଭାରତୀୟ ଦୂତାବାସଙ୍କ ହସ୍ତକ୍ଷେପ ପରେ ତାଙ୍କୁ ସୁରକ୍ଷିତ ଭାବେ ସେଠାରୁ ପଠାଯାଇଥିଲା। ଘଟଣାରେ ଭାରତ ସରକାରଙ୍କ ପକ୍ଷରୁ ଚୀନ ନିକଟରେ ଦୃଢ଼ ବିରୋଧ କରାଯାଇଥିଲା। ଏହାର ଉତ୍ତରରେ ଚୀନ ବୈଦେଶିକ ମନ୍ତ୍ରୀଣାଳୟ ଏହାର ବେପରୁଆ ଉତ୍ତର ରଖିଛି।

ଚୀନ ବୈଦେଶିକ ମନ୍ତ୍ରୀଣାଳୟ ପ୍ରବକ୍ତା ମାଓ ନିଙ୍ଗ ହାରାସମେଣ୍ଟ ଅଭିଯୋଗକୁ ଖଣ୍ଡନ କରିବା ସହିତ ଥୋଙ୍ଗଡକଙ୍କୁ କୌଣସି ବାଧ୍ୟତାମୂଳକ ପଦକ୍ଷେପ, ଅଟକ କିମ୍ବା ହଇରାଣର ଶିକାର ହୋଇନଥିଲେ ବୋଲି କହିଛନ୍ତି। ବର୍ଡର ଅଧିକାରୀମାନେ ଆଇନ ଅନୁସାରେ କାମ କରିଥିଲେ। ଏୟାରଲାଇନ୍ସ ପକ୍ଷରୁ ତାଙ୍କୁ ବିଶ୍ରାମ ସ୍ଥାନ ଦିଆଯିବା ସହିତ ଖାଦ୍ୟ ଓ ପାଣି ଯୋଗାଇ ଦିଆଯାଇଥିଲା ବୋଲି ସେ କହିଛନ୍ତି। ଏଥିସହିତ ମାଓ ଏହି ବାହାନାରେ ଚୀନର ଆଞ୍ଚଳିକ ଦାବିକୁ ମଧ୍ୟ ଦୋହରାଇ କହିଥିଲେ, "ଜାଙ୍ଗନାନ ହେଉଛି ଚୀନର ଅଞ୍ଚଳ। ଭାରତ ଦ୍ୱାରା ବେଆଇନ ଭାବରେ ପ୍ରତିଷ୍ଠିତ ତଥାକଥିତ ଅରୁଣାଚଳ ପ୍ରଦେଶକୁ ଚୀନ କେବେ ସ୍ୱୀକାର କରିନାହିଁ।"