ଦିଲ୍ଲୀ ନିର୍ବାଚନ ପରେ ବିଜେପି ଖାତାରେ ୬୯୦୦ କୋଟି, କଂଗ୍ରେସ ପାଖରେ ମାତ୍ର ୫୩ କୋଟି; ବିଏସପି ବି ବହୁ ଆଗରେ

ନୂଆଦିଲ୍ଲୀ: ଚଳିତ ବର୍ଷ ଫେବ୍ରୁଆରୀରେ ହୋଇଥିଲା ଦିଲ୍ଲୀ ନିର୍ବାଚନ। ଏଥିରେ ବିଜୟୀ ହୋଇ ପ୍ରାୟ ୨୭ ବର୍ଷ ପରେ ଦିଲ୍ଲୀରେ ଶାସନକୁ ଫେରିଛି ବିଜେପି। ତେବେ ନିର୍ବାଚନ ସରିବା ପରେ କେଉଁ ଦଳକୁ କେତେ ଚାନ୍ଦା ମିଳିଛି ? ସେନେଇ ଏକ ତଥ୍ୟ ପ୍ରକାଶ ପାଇଛି। ବିଭିନ୍ନ ରାଜନୈତିକ ଦଳ ଦ୍ବାରା ଦିଆଯାଇଥିବା ତଥ୍ୟ ଆଧାରରେ ଏହି ରିପୋର୍ଟ ପ୍ରକାଶ କରିଛନ୍ତି ନିର୍ବାଚନ କମିଶନ।

ଜାତୀୟ ଗଣମାଧ୍ୟମର ରିପୋର୍ଟ ଅନୁସାରେ, ଦିଲ୍ଲୀ ବିଧାନସଭା ନିର୍ବାଚନ ପରେ କେନ୍ଦ୍ର ଏବଂ ଦିଲ୍ଲୀ ବିଜେପି ପାଖରେ ୬,୯୦୦ କୋଟି ଟଙ୍କାର ବ୍ୟାଙ୍କ ବାଲାନ୍ସ ରହିଛି। ସେହିଭଳି ମୁଖ୍ୟାଳୟ, ଦିଲ୍ଲୀ କଂଗ୍ରେସ ଏବଂ ଜିଲ୍ଲା ୟୁନିଟକୁ ମିଶାଇ କଂଗ୍ରେସ ପାଖରେ ମାତ୍ର ୫୩ କୋଟି ଟଙ୍କା ରହିଛି। ସେପଟେ ଆଉ ଏକ ଆଶ୍ଚର୍ଯ୍ୟ କଲାଭଳି ତଥ୍ୟ ହେଉଛି ବିଏସପିର ଜମା ପରିମାଣ ୫୮୦ କୋଟି ଟଙ୍କାରୁ ଅଧିକ ରହିଛି।

ଏହା ପରେ ଅକ୍ଟୋବର ୨୪ ତାରିଖରେ ନିର୍ବାଚନ କମିଶନରେ ଦାଖଲ କରାଯାଇଥିବା ତଥ୍ୟ ଅନୁସାରେ କଂଗ୍ରେସ, ୨୦୨୪-୨୫ରେ ୫୧୭ କୋଟି ଟଙ୍କା ଚାନ୍ଦା ପାଇଥିଲା। ଯାହା ୨୦ ହଜାର ଟଙ୍କାରୁ ଅଧିକ ବ୍ୟକ୍ତିଗତ ଚାନ୍ଦାରୁ ମିଳିଛି। ସୂଚନାଥାଉକି, ଦଳଗୁଡ଼ିକ ପାଇଁ ପାଣ୍ଠି ସଂଗ୍ରହର ବିଭିନ୍ନ ଉତ୍ସ ହେଉଛି ବ୍ୟକ୍ତିମାନଙ୍କ ଦ୍ବାରା ଚାନ୍ଦା, କର୍ପୋରେଟ୍ ଏବଂ ଟ୍ରଷ୍ଟ।

ଦିଲ୍ଲୀ ବିଧାନସଭା ନିର୍ବାଚନ ପରେ ଯେଉଁ ଦଳଗୁଡ଼ିକ ସେମାନଙ୍କର ବ୍ୟାଙ୍କ ବାଲାନ୍ସ ଘୋଷଣା କରିଛନ୍ତିସେଥିରେ ଆମ ଆଦମୀ ପାର୍ଟିର ୯.୯ କୋଟି ଟଙ୍କା, ସିପିଏମ ୪ କୋଟି ଟଙ୍କା, ସିପିଆଇ ୪୧ ଲକ୍ଷ ଟଙ୍କା ଏବଂ ବିଏସପି ପାଖରେ ୫୮୦ କୋଟି ଟଙ୍କା ବ୍ୟାଙ୍କ ବାଲାନ୍ସ ରହିଛି। ତେବେ ବିହାର ବିଧାନସଭା ନିର୍ବାଚନ ପରେ କୌଣସି ଦଳ ଚାନ୍ଦା ସମ୍ପର୍କରେ ନିର୍ବାଚନ କମିଶନଙ୍କୁ ଏଯାଏଁ ତଥ୍ୟ ଦେଇନାହାଁନ୍ତି।