ଭୁବନେଶ୍ୱର ୩୦।୭: ରାଜ୍ୟରେ ନକଲି ଡାକ୍ତରଙ୍କ ଉତ୍ପାତ ବଢ଼ିଚାଲିଛି । କାର୍ଯ୍ୟାନୁଷ୍ଠାନ ଭୟ ନଥିବାରୁ ସେମାନଙ୍କ ଚେର କୋଣ ଅନୁକୋଣରେ ଲମ୍ବି ଚାଲିଛି । ସେମାନଙ୍କ ପାଖରେ ଚିକିତ୍ସା ହୋଇ ରୋଗୀ ଭଲ ହେବା ପରିବର୍ତ୍ତେ କଷ୍ଟ ବଢ଼ିଯାଉଛି । ଭୁଲ ଚିକିତ୍ସା ପାଇଁ ଜୀବନ ମଧ୍ୟ ଯାଉଛି । ଏଳଭି ସମ୍ବେଦଶୀଳ ଘଟଣାରେ ସ୍ୱାସ୍ଥ୍ୟ ବିଭାଗ ନିରବ ରହିବା ସମସ୍ତଙ୍କୁ ଆଶ୍ଚର୍ଯ୍ୟ କରିଛି । ରାଜ୍ୟରେ ନକଲି ଡାକ୍ତରଙ୍କୁ ଧରିବା ପାଇଁ ୨୦୨୪ ଏପ୍ରିଲ୍ ୨୪ରେ ‘ଆଣ୍ଟି କ୍ୱାକେରୀ ସେଲ’ ଗଠନ ହୋଇଛି । ହେଲେ ଏହି ସେଲ୍ କେବଳ କାଗଜକଲମରେ ସୀମିତ ହୋଇରହିଛି । ଆଦିବାସୀ ବହୁଳ ଜିଲ୍ଲା ଗ୍ରାମାଞ୍ଚଳରେ ନକଲି ଡାକ୍ତରଙ୍କ ଉତ୍ପାତ ବଢ଼ିଚାଲିଛି । ବର୍ତ୍ତମାନ ବଲାଙ୍ଗିର ଜିଲ୍ଲା ତୁରେକେଲା ଅଞ୍ଚଳରୁ ଏଭଳି ସଙ୍ଗିନ ଅଭିଯୋଗ ଆସିଛି । ତୁରେକେଲା ଥାନା ମହୁଲପାଟି ଗାଁର ଭବାନୀ ପୁଟା ଗୋଡ଼ ହାତ ଯନ୍ତ୍ରଣା ପାଇଁ ନକଲି ଡାକ୍ତରଙ୍କ ପାଖକୁ ଚିକିତ୍ସା ପାଇଁ ଯାଇଥିଲେ । ସେ କି ଇଞ୍ଜେକ୍ସନ ଦେଲେ ଯେ ଭବାନୀଙ୍କ ଜୀବନ ଚାଲିଗଲା । ଭବାନୀଙ୍କ ମୃତ୍ୟୁ ପରେ ସଂପୃକ୍ତ ନକଲି ଡାକ୍ତର ଫେରାର୍ ହୋଇଯାଇଛନ୍ତି । ଭବାନୀଙ୍କ ପରିବାର ଲୋକେ ଥାନାରେ ଅଭିଯୋଗ କରିଛନ୍ତି । ସେହିପରି ଜୁନ୍ ୬ରେ ଗଞ୍ଜାମ ଜିଲ୍ଲା ଆର୍ଯ୍ୟପଲ୍ଲୀ ଗାଁରେ ପଶ୍ଚିମବଙ୍ଗର ନକଲି ଡାକ୍ତର ଧରାପଡ଼ିଥିଲେ । ସେ ନକଲି କ୍ଲିନିକ୍ ଚଳାଇଥିଲେ । ଭୁଲ ଚିକିତ୍ସା ଯୋଗୁ ରୋଗୀଙ୍କ ଯନ୍ତ୍ରଣା ବଢ଼ିଯାଇଥିଲା । ଅନ୍ୟ ଏକ ସ୍ଥାନରେ ମଧ୍ୟ ରୋଗୀଙ୍କ ଜୀବନ ଯାଇଥିଲା । ଗତବର୍ଷ ନବରଙ୍ଗପୁର ରାଇଘର ତୁମୁଡ଼ି ଓ କୁମୁଲି ଗାଁରେ ନକଲି ଡାକ୍ତରଙ୍କ ପାଇଁ ୨ଜଣଙ୍କ ଜୀବନ ଯାଇଥିଲା । ସେହିପରି ୨୦୨୩ରେ କଳାହାଣ୍ଡିରେ ମଧ୍ୟ ଜଣେ ମହିଳାଙ୍କ ଜୀବନ ଯାଇଥିବା ଅଭିଯୋଗ ଥିଲା । ପ୍ରତି ଜିଲ୍ଲାରେ ଏଭଳି ଅଭିଯୋଗ ନିୟମିତ ଜାରି ରହିଛି । ନକଲି ଡାକ୍ତରଙ୍କ ପ୍ରାଦୁର୍ଭାବକୁ ନେଇ ଆଇନଜୀବୀ ରାଧାକାନ୍ତ ତ୍ରିପାଠୀ ମଧ୍ୟ ଏନ୍ଏଚ୍ଆରସିରେ ଅଭିଯୋଗ କରିଥିଲେ । ସେ ଦର୍ଶାଇ ଥିଲେ ଗଞ୍ଜାମ, କୋରାପୁଟ, ମାଲକାନଗିରି, ନବରଙ୍ଗପୁର, ଗତପତି ଓ ରାୟଗଡ଼ାରେ ନକଲି ଡାକ୍ତରଙ୍କ ସଂଖ୍ୟା ବଢ଼ି ବଢ଼ି ଚାଲିଛି । ହାଇକୋର୍ଟଙ୍କ ନିର୍ଦ୍ଦେଶକ୍ରମେ ସ୍ୱାସ୍ଥ୍ୟ ବିଭାଗ ଜିଲ୍ଲାସ୍ତରୀୟ ‘ଆଣ୍ଟି-କ୍ୱାକେରୀ’ ସେଲ୍ ଗଠନ କରିଛି । ଏଥିରେ ଜିଲ୍ଲାସ୍ତରୀୟ ୫ ଜଣିଆ ସେଲ୍ରେ ଜିଲ୍ଲାପାଳଙ୍କ ପ୍ରତିନିଧି, ଏସ୍ପିଙ୍କ ପ୍ରତିନିଧି, ସିଡିଏମ୍, ପିଏଚ୍ଓ, ଜିଲ୍ଲା ନ୍ୟାୟିକ ସେବା ପ୍ରାଧିକରଣର ପ୍ରତିନିଧି ଏବଂ ଭାରତୀୟ ମେଡିକାଲ ଆସୋସିଏସନ୍ର ଜଣେ ପ୍ରତିନିଧି ସଦସ୍ୟ ରହିଛନ୍ତି । ପ୍ରତି ୧୫ ଦିନରେ ଥରେ ସେଲ୍ ଜିଲ୍ଲାରେ ନକଲି ଡାକ୍ତରଙ୍କ ଉପରେ କାର୍ଯ୍ୟାନୁଷ୍ଠାନ ସମ୍ପର୍କିତ ରିପୋର୍ଟ ସ୍ୱାସ୍ଥ୍ୟ ବିଭାଗକୁ ପ୍ରଦାନ କରିବେ । ହେଲେ ଏହି ସେଲ୍ କାର୍ଯ୍ୟକାରିତା ନେଇ ପ୍ରଶ୍ନବାଚୀ ସୃଷ୍ଟି ହୋଇଛି । ଯଦି କୌଣସି ସ୍ଥାନରେ ନକଲି ଡାକ୍ତରଙ୍କ ଚିକିତ୍ସା ସମ୍ପର୍କରେ ସୂଚନା ମିଳେ, ସେଲ୍ ତୁରନ୍ତ ଚଢ଼ାଉ କରିବ । ଲୋକେ ଅଭିଯୋଗ କଲେ ମଧ୍ୟ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ସାମାଜିକ ଗଣମାଧ୍ୟମରୁ ଜଣାପଡ଼ିଲେ ବି ସେଲ୍ ପଦକ୍ଷେପ ନେବ । କିନ୍ତୁ ପଦକ୍ଷେପ କିଛି ନିଆ ଯାଉନଥିବା ଅଭିଯୋଗ ହୋଇଛି । ସୂଚନାଯୋଗ୍ୟ, ରାଜ୍ୟରେ ନକଲି ଡାକ୍ତରଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ୨୦୧୯ରେ ‘ଓଡ଼ିଶା ଷ୍ଟେଟ୍ ଲିଗାଲ୍ ସର୍ଭିସେସ ଅଥୋରିଟି’ ପକ୍ଷରୁ ଉଚ୍ଚ ନ୍ୟାୟାଳୟରେ ମାମଲା ରୁଜୁ ହୋଇଥିଲା । ଏହାର ଶୁଣାଣି କରି ୧୨ ଡିସେମ୍ବର ୨୦୨୨, ୨୨ ଜୁନ୍ ୨୦୨୩ ଓ ୨୭ ଫେବ୍ରୁଆରୀ ୨୦୨୪ରେ ସ୍ୱାସ୍ଥ୍ୟ ବିଭାଗ ପ୍ରମୁଖ ଶାସନ ସଚିବଙ୍କୁ ରିପୋର୍ଟ ତଲବ କରିଥିଲେ । ସଚିବ ଓଡ଼ିଶା କାଉନସିଲ୍ ଅଫ୍ ମେଡିକାଲ ରେଜିଷ୍ଟ୍ରେସନ୍ (ଓସିଏମ୍ଆର)ରେ ୩୫ ହଜାର ଏଲୋପାଥିକ୍ ଡାକ୍ତର ପଞ୍ଜିକୃତ ହୋଇଥିବା ଜଣାଇଥିଲେ ।
'ବିଜୟ ମୋର ନୁହେଁ ଗେରୁଆର ବିଜୟ', ମାଲେଗାଓଁ ମାମଲାରେ...
