ନୂଆଦିଲ୍ଲୀ ୦୭/୦୬: ଦେଶରେ କମିଛି ଅତି ଦାରିଦ୍ର୍ୟ ହାର । ଅତ୍ୟଧିକ ଦାରିଦ୍ର୍ୟ ସୀମାରେଖା ତଳେ ଥିବା ଲୋକଙ୍କ ସଂଖ୍ୟା କମିଛି । ୨୦୧୧-୧୨ରେ ଦାରିଦ୍ର୍ୟ ସୀମା ରେଖା ତଳେ ୨୭.୧ ପ୍ରତିଶତ ଲୋକ ଥିଲେ । ୨୦୨୨-୨୩ରେ ଏହି ସଂଖ୍ୟା ୫.୩ ପ୍ରତିଶତକୁ ହ୍ରାସ ପାଇଛି । ଅର୍ଥାତ ୧୧ ବର୍ଷରେ ତୀବ୍ର ବେଗରେ ୨୭.୧ ପ୍ରତିଶତରୁ ୫.୩ ପ୍ରତିଶତକୁ ଖସି ଆସିଛି । ୨୭ କୋଟି ଲୋକ ଅତି ଦାରିଦ୍ରରୁ ପାଇଛନ୍ତି ମୁକ୍ତି । ଗ୍ରାମାଞ୍ଚଳରେ ୧୮.୪ ପ୍ରତିଶତରୁ ୨.୮ ଓ ସହରାଞ୍ଚଳରେ ୧୦.୭ରୁ ୧.୧ ପ୍ରତିଶତକୁ ହ୍ରାସ ପାଇଛି ।
ବିଶ୍ବ ବ୍ୟାଙ୍କ ଦ୍ବାରା ପ୍ରକାଶିତ ରିପୋର୍ଟରୁ ଏନେଇ ସ୍ପଷ୍ଟ ହୋଇଛି । ଉତ୍ତରପ୍ରଦେଶ,ବିହାର,ମଧ୍ୟପ୍ରଦେଶ ଓ ପଶ୍ଚିମବଙ୍ଗର ଅନେକ ଲୋକଙ୍କ ଜୀବନ ଧାରଣର ମାନରେ ସୁଧାର ଆସିଥିବା ବିଶ୍ବବ୍ୟାଙ୍କ ରିପୋର୍ଟରୁ ଜଣାପଡିଛି । ବିଶ୍ବବ୍ୟାଙ୍କ ନିକଟରେ ଦାରିଦ୍ର୍ୟ ସୀମାରେଖା ହାର ଲାଗି ମାନକରେ ସଂଶୋଧନ ଆଣିଥିଲା । ଦୈନିକ ଆୟ ୨.୧୫ ଡଲାରକୁ ବଢାଇ ୩ ଡଲାର କରିଥିଲା । ଏହି ମାନଦଣ୍ଡ ଅନୁଯାୟୀ ଦେଶର ପ୍ରାୟ ୨୭ କୋଟି ଲୋକ ଦାରିଦ୍ର୍ୟ ସୀମା ରେଖାରୁ ଉପରକୁ ଉଠିଛନ୍ତି ।
