ନୂଆଦିଲ୍ଲୀ: ପଦାକୁ ଆସିଲା ୟୁରୋପୀୟ ସଂଘର ଦୋମୁହାଁ ଚେହେରା। ଗୋଟିଏ ପଟେ ୟୁକ୍ରେନରେ ଚାଲିଥିବା ଯୁଦ୍ଧ ପାଇଁ ରୁଷ ବିରୁଦ୍ଧରେ ନିରନ୍ତର ଆକ୍ରମଣ ପାଇଁ ୟୁକ୍ରେନ୍କୁ ଉସକାଉଛି। ୟୁକ୍ରେନକୁ ଅସ୍ତ୍ରଶସ୍ତ୍ର ଦେଇ ମଧ୍ୟ ସାହାଯ୍ୟ କରୁଛି। ଏପଟେ ଆତଙ୍କୀ ଦେଶ ପାକିସ୍ତାନକୁ ସମର୍ଥନ କରି ଭାରତକୁ ଶାନ୍ତି ଓ ଆଲୋଚନା କରିବାକୁ ପାଠ ପଢ଼ାଉଛି।
ଜମ୍ମୁ-କାଶ୍ମୀରର ପହଲଗାମ ଆକ୍ରମଣ ପରେ, ୟୁରୋପ ଭାରତକୁ ଶାନ୍ତିର ବାର୍ତ୍ତା ପାଇଁ କହୁଛି। ୟୁରୋପୀୟ ସଂଘର ଉପାଧ୍ୟକ୍ଷ ଏବଂ ବୈଦେଶିକ ବ୍ୟାପାର ସଂଘର ଉଚ୍ଚ ପ୍ରତିନିଧି କାଜା କାଲାସ ଭାରତକୁ ପାକିସ୍ତାନ ସହିତ ଆଲୋଚନା କରିବାକୁ ପରାମର୍ଶ ଦେଇଛନ୍ତି। ୟୁରୋପୀୟ ସଂଘର ଏହି ମନ୍ତବ୍ୟ ପରେ ଦୁଇ ବର୍ଷ ପୂର୍ବେ ଭାରତର ବୈଦେଶିକ ମନ୍ତ୍ରୀ ଏସ ଜୟଶଙ୍କର ଦେଇଥିବା ବୟାନ ପୁଣି ଭାଇରାଲ ହୋଇଛି, ଯେଉଁଥିରେ ସେ ୟୁରୋପକୁ ଆଇନା ଦେଖାଇଥିଲା ଭାରତ।
ୟୁରୋପୀୟ ସଂଘର ବୈଦେଶିକ ବ୍ୟାପାର ଏବଂ ସୁରକ୍ଷା ନୀତିର ଉଚ୍ଚ ପ୍ରତିନିଧି କାଜା କାଲାସ ଗୁରୁବାର ଭାରତୀୟ ବୈଦେଶିକ ବ୍ୟାପାର ମନ୍ତ୍ରୀ ଏସ ଜୟଶଙ୍କର ଏବଂ ତାଙ୍କ ପାକିସ୍ତାନୀ ପ୍ରତିପକ୍ଷ ଇସାକ ଦାରଙ୍କ ସହ କଥା ହୋଇଥିଲେ। କାଲାସ ସୋସିଆଲ ମିଡିଆ ପ୍ଲାଟଫର୍ମ X ରେ ଲେଖିଛନ୍ତି, 'ଭାରତ ଏବଂ ପାକିସ୍ତାନ ମଧ୍ୟରେ ବଢ଼ୁଥିବା ଉତ୍ତେଜନା ଚିନ୍ତାଜନକ। ପରିସ୍ଥିତିରେ ଉନ୍ନତି ଆଣିବା ପାଇଁ ମୁଁ ଉଭୟ ପକ୍ଷକୁ ସଂଯମତା ଅବଲମ୍ବନ କରିବାକୁ ଏବଂ ଆଲୋଚନାରେ ସାମିଲ ହେବାକୁ ଅନୁରୋଧ କରୁଛି। ଚାପ ବୃଦ୍ଧି କରିବାରେ କୌଣସି ଲାଭ ନାହିଁ। ମୁଁ ଆଜି ଡକ୍ଟର ଜୟଶଙ୍କର ଏବଂ ଇଶାକ ଦାରଙ୍କ ସହ କଥା ହୋଇ ଏହା କହିଛି।
ଯେତେବେଳେ ୟୁରୋପୀୟ ସଂଘ ପାକିସ୍ତାନକୁ ଦାୟୀ କରିବା ଉଚିତ ଏବଂ ଆତଙ୍କବାଦୀଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଚାପ ପକାଇବା ଉଚିତ, ସେତେବେଳେ ଏହା ଭାରତକୁ ଶାନ୍ତିର ବାର୍ତ୍ତା ଦେଉଛି। ଭାରତୀୟ ବୈଦେଶିକ ମନ୍ତ୍ରୀ ଜୟଶଙ୍କର ଦୁଇ ବର୍ଷ ପୂର୍ବରୁ ୟୁରୋପକୁ ତାର ପ୍ରକୃତ ଚେହେରା ଦେଖାଇ ଦେଇଥିଲେ। ଜୁନ୍ ୨୦୨୨ରେ ସ୍ଲୋଭାକିଆରେ ଏକ ସମ୍ମିଳନୀରେ ଜୟଶଙ୍କର କହିଥିଲେ ଯେ 'ୟୁରୋପକୁ ଏହି ମାନସିକତାରୁ ବାହାରି ଆସିବାକୁ ପଡିବ ଯେ ଏହାର ସମସ୍ୟାଗୁଡ଼ିକ ସମଗ୍ର ବିଶ୍ୱର ସମସ୍ୟା, କିନ୍ତୁ ବିଶ୍ୱର ସମସ୍ୟା ୟୁରୋପର ସମସ୍ୟା ନୁହେଁ।'
ପ୍ରକୃତରେ, ସେହି ସମୟରେ ୟୁକ୍ରେନ ଯୁଦ୍ଧରେ ରୁଷକୁ ବିରୋଧ କରିବା ପାଇଁ ଭାରତ ଉପରେ ଚାପ ପକାଇବାକୁ ଚେଷ୍ଟା କରାଯାଉଥିଲା, କିନ୍ତୁ ଭାରତ ମନା କରିଦେଇଥିଲା। ଯଦି ଚୀନ୍ ସହିତ ସମସ୍ୟା ବୃଦ୍ଧି ପାଏ, ତେବେ ୟୁକ୍ରେନ୍ ଉପରେ ଭାରତର ଦୃଷ୍ଟିକୋଣ ବିଶ୍ୱ ସମର୍ଥନ ହାସଲ କରିବା ପାଇଁ କଷ୍ଟକର ହୋଇପାରେ ବୋଲି ୟୁରୋପର ମତକୁ ଜୟଶଙ୍କର ପ୍ରତ୍ୟାଖ୍ୟାନ କରିଥିଲେ।
