ନୂଆଦିଲ୍ଲୀ: ଆମେରିକାରେ ଟ୍ରମ୍ପ ଆସିବା ପରେ ଘଡ଼ିକେ ଘୋଡ଼ା ଛୁଟୁଛି। କେତେବେଳେ ଶୁଳ୍କ ଲାଗୁ କରୁଛନ୍ତି ତ ଆଉ କେତେବେଳେ ଶୁଳ୍କ ଛାଡ଼। ଶୁ୍କ୍ରବାର ବିଳମ୍ବିତ ରାତିରେ ଟ୍ରମ୍ପ ସ୍ମାର୍ଟଫୋନ୍, ଲ୍ୟାପଟପ, ଆଇପ୍ୟାଡ୍ ଓ ସେମିକଣ୍ଡକ୍ଟର ଭଳି ଇଲେକ୍ଟ୍ରିକ ସାମଗ୍ରୀ ଉପରେ ପାଲଟା ଶୁଳ୍କ ଲାଗିବ ନାହିଁ ବୋଲି ଘୋଷଣା କରିଥିଲେ। ହେଲେ ଏବେ ପୁଣି ଏହିସବୁ ସାମଗ୍ରୀ ଉପରେ ଶୁଳ୍କ ଲାଗୁ କରାଯିବ ବୋଲି ଟ୍ରମ୍ପ ସରକାର ସୂଚନା ଦେଇଛନ୍ତି।
ଏନେଇ ଆମେରିକାର ବାଣିଜ୍ୟ ସଚିବ ହାୱାର୍ଡ ଲୁଟନିକ୍ ରବିବାର ଏବିସି ନ୍ୟୁଜ୍କୁ ପ୍ରତିକ୍ରିୟା ଦେଇ ଏସମ୍ପର୍କରେ ଖୁଲାସା କରିଛନ୍ତି। ସେ କହିଛନ୍ତି ଯେ ସ୍ମାର୍ଟଫୋନ୍, କମ୍ପ୍ୟୁଟର ଏବଂ ଅନ୍ୟ କିଛି ଇଲେକ୍ଟ୍ରୋନିକ୍ସ ସାମଗ୍ରୀ ପାଇଁ ଅଲଗା ଭାବରେ ଶୁଳ୍କ ଲଗାଯିବ। ଏବଂ ସେମିକଣ୍ଡକ୍ଟରଗୁଡ଼ିକ ପାଇଁ ମଧ୍ୟ ଅଲଗା ଭାବେ ଶୁଳ୍କ ଲାଗୁ କରାଯିବ। ଏବଂ ଏହା ଗୋଟିଏ ମାସ ମଧ୍ୟରେ ଲାଗୁ ହେବ ବୋଲି ସେ କହିଛନ୍ତି।
ପଢନ୍ତୁ- ଲାଭର ଲୋଭରେ ଜନତାଙ୍କୁ ଭୁଲି ଗଲେ କି ତୈଳ କମ୍ପାନୀ ? ୫ ବର୍ଷ ହେଲା ଲାଭ ଖାଉଛନ୍ତି, ହେଲେ କମୁନି ତେଲ ଦର
ତେବେ ଶୁକ୍ରବାର ବିଳମ୍ବିତ ରାତିରେ ଟ୍ରମ୍ପ ସରକାର ଶୁଳ୍କ ମୁକ୍ତ କରିବା ଘୋଷଣା ନେଇ ସ୍ପଷ୍ଟୀକରଣ ଦେଇଛନ୍ତି ଲୁଟନିକ। ସେ କହିଛନ୍ତି ଯେ ଏପ୍ରିଲ୍ ୨ ତାରିଖରେ ଘୋଷଣା କରାଯାଇଥିବା ବିଭିନ୍ନ ଇଲେକ୍ଟ୍ରୋନିକ୍ ଉପକରଣଗୁଡ଼ିକୁ ଶୁଳ୍କରୁ ମୁକ୍ତ କରିବା ପାଇଁ ପ୍ରଶାସନର ନିଷ୍ପତ୍ତି କେବଳ ଏକ ଅସ୍ଥାୟୀ ଆଶ୍ୱସ୍ତି ଥିଲା। ତେବେ ଛାଡ଼ ହୋଇଥିବା ସାମଗ୍ରୀଗୁଡ଼ିକ "ସେମିକଣ୍ଡକ୍ଟର ଶୁଳ୍କ" ଅଧୀନରେ ରହିବେ,ଆଉ ଏହି ସେମିକଣ୍ଡକ୍ଟର ଟ୍ୟାକ୍ସ ସମ୍ଭବତଃ ଗୋଟିଏ କିମ୍ବା ଦୁଇ ମାସ ମଧ୍ୟରେ ଆସିପାରେ ବୋଲି ଲୁଟନିକ କହିଛନ୍ତି।
ଲୁଟନିକ କହିଛନ୍ତି ଯେ ଆମକୁ ଚିପ୍ସ ଏବଂ ଫ୍ଲାଟ ପ୍ୟାନେଲ ଦରକାର। ଆମକୁ ଏହି ଜିନିଷଗୁଡ଼ିକ ଆମେରିକାରେ ତିଆରି କରିବାକୁ ପଡିବ। ଆମ ପାଇଁ କାମ କରୁଥିବା ସମସ୍ତ ଜିନିଷ ପାଇଁ ଆମେ ଦକ୍ଷିଣପୂର୍ବ ଏସିଆ, ବିଶେଷକରି ଚୀନ ଉପରେ ନିର୍ଭର କରିପାରିବୁ ନାହିଁ। କେବଳ ସେତିକି ନୁହେଁ, ଫାର୍ମସୁଟିକଲ ଉପରେ ମଧ୍ୟ ଶୁଳ୍କ ଲାଗୁ ହେବ ବୋଲି ଲୁଟନିକ କହିଛନ୍ତି।
