ରାଇଜିଂ ଏସିଆ କପ୍ : ସୁପର ଓଭରରେ ଜିତିଲା ପାକିସ୍ତାନ

ନୂଆଦିଲ୍ଲୀ, ୨୪/୧୧ : ଏସିଆ କପ୍ ରାଇଜିଂ ଷ୍ଟାର୍ସର ଚାମ୍ପିଅନ ହୋଇଛି ପାକିସ୍ତାନ । ଫାଇନାଲରେ ଦଳ ବାଂଲାଦେଶ-ଏକୁ ପରାସ୍ତ କରିଛି । ତେବେ ଫାଇନାଲ ଖୁବ ରୋମାଞ୍ଚକର ହୋଇଥିଲା । ମ୍ୟାଚର ଫଇସଲା ସୁପର ଓଭରରେ ହୋଇଥିଲା ।

ଦୋହାରେ ଖେଳାଯାଇଥିବା ମୁକାବିଲାରେ ଟସ୍ ଜିତି ପ୍ରଥମେ ବୋଲିଂ ନିଷ୍ପତ୍ତି ନେଇଥିଲା ବାଂଲାଦେଶ । ପ୍ରଥମେ ବ୍ୟାଟିଂ କରୁଥିବା ପାକିସ୍ତାନ-ଏ ମାତ୍ର ୧୨୫ ରନରେ ଅଟକି ଯାଇଥିଲା । ଏହାର ଜବାବରେ ବାଂଲାଦେଶ ମଧ୍ୟ ୧୨୫ ରନ୍ କରିପାରିଥିଲା । ସୁପର ଓଭରରେ ପାକିସ୍ତାନ ଆଗରେ ବାଂଲାଦେଶ ୭ ରନର ଟାର୍ଗେଟ୍ ରଖିଥିଲା । ଯାହାକୁ ବିନା କୌଣସି ଓ୍ୱିକେଟ୍ ହରାଇ ପାକିସ୍ତାନ ହାସଲ କରିନେଇଥିଲା ।

ତେବେ ୧୨୬ ରନର ଟାର୍ଗେଟକୁ ଚେଜ୍ କରୁଥିବା ବାଂଲାଦେଶ-ଏ ଆରମ୍ଭରୁ ଭଲ ଖେଳିଥିଲା । ପ୍ରଥମ ଓ୍ୱିକେଟ ଦଳ ୨୨ ରନରେ ହରାଇଥିଲା । କିନ୍ତୁ ଜୀସାନ୍ ଆଲମଙ୍କ ଓ୍ୱିକେଟ୍ ଯିବା ପରେ ଜଣଙ୍କ ପରେ ଜଣେ ବ୍ୟାଟର ପ୍ୟାଭିଲିୟନ ଫେରିଥିଲେ । ତାସ ଘର ଭଳି ବ୍ୟାଟିଂ ଲାଇନ୍ ଭୁଶୁଡି ପଡିଥିଲା । ୫୭ ରନରେ ଦଳ ୭ ଓ୍ୱିକେଟ୍ ହରାଇ ସଙ୍କଟରେ ପଡିଥିଲା । ଶେଷରେ ଦଳକୁ ୧୮ ବଲରେ ୩୦ ରନ୍ ଦରକାର ଥିଲା । ୧୯ ତମ ଓଭରରେ ଦଳର ବ୍ୟାଟର ୨୦ ରନ୍ ସ୍କୋର କରିଥିଲେ । କିନ୍ତୁ ଶେଷ ଓଭରରେ ଦଳ ୭ ରନ୍ କରିପାରିନଥିଲା ।

ସୁପର ଓଭରରେ ବାଂଲାଦେଶ ଟିମ୍ ବ୍ୟାଟିଂ ପାଇଁ ଆସିଥିଲା । ପ୍ରଥମ ବଲରେ ସିଙ୍ଗିଲ ଆସିଥିଲା । ଦ୍ୱିତୀୟ ବଲରେ ଓ୍ୱିକେଟ୍ ଏବଂ ତୃତୀୟ ବଲ ଓ୍ୱାଇଡ୍ ଥିଲା । ଚତୁର୍ଥ ବଲରେ ଜୀସାନ ବୋଲ୍ଡ ହୋଇଥିଲେ । ତେଣୁ ପାକିସ୍ତାନ-ଏକୁ ମାତ୍ର ୭ ରନର ବିଜୟ ଲକ୍ଷ୍ୟ ମିଳିଥିଲା । ଯାହାକୁ ବିନା କୌଣସି ଓ୍ୱିକେଟ୍ ହରାଇ ଦଳ ହାସଲ କରିନେଇଥିଲା ।