୪୨ ବିଧାୟକଙ୍କୁ ନୋଟିସ୍ ଜାରି କରିଛନ୍ତି ପାଟନା ହାଇକୋର୍ଟ, ବିହାର ରାଜନୀତିରେ ହଲଚଲ

ପାଟନା ୨୧।୨: ପାଟନା ହାଇକୋର୍ଟ ବିହାର ବିଧାନସଭାର ୪୨ ଜଣ ଏମଏଲଏଙ୍କୁ ନୋଟିସ୍ ଜାରି କରିଛନ୍ତି। ଏଥିରେ ଉଭୟ ଶାସକ ଓ ବିରୋଧୀ ଦଳ ବିଧାୟକଙ୍କୁ ନୋଟିସ୍ ମିଳିଛି। ୨୦୨୫ ବିଧାନସଭା ନିର୍ବାଚନରେ ଏହି ବିଧାୟକମାନଙ୍କ ବିରୋଧରେ ଭୋଟ କିଣିବା, ମତଦାନରେ ଅନିୟମିତତା ସୃଷ୍ଟି କରିବା ଓ ପ୍ରାର୍ଥୀପତ୍ରରେ ଭୁଲ ସତ୍ୟପାଠ ଦାଖଲ କରିଥିବାର ଗୁରୁତର ଅଭିଯୋଗ ରହିଛି। ଏଣୁ କୋର୍ଟ ନୋଟିସ୍ ଜାରି କରିବା ପରେ ବିହାର ରାଜନୀତିରେ ହଟଚମଟ ସୃଷ୍ଟି ହୋଇଛି। କାରଣ ଯେଉଁମାନଙ୍କ ହାଇକୋର୍ଟଙ୍କ ନୋଟିସ୍ ମିଳିଛି ସେମାନଙ୍କ ମଧ୍ୟରେ ବିହାର ବିଧାନସଭାର ବାଚସ୍ପତି, ମନ୍ତ୍ରୀ ଓ ପ୍ରମୁଖ ନେତା ମଧ୍ୟ ଅଛନ୍ତି।

ଏହି ମାମଲାରେ ପାଟନା ହାଇକୋର୍ଟ ଫେବୃଆରୀ ୧୯ ତାରିଖରେ ପ୍ରାରମ୍ଭିକ ଶୁଣାଣି କରିଥିଲେ। ଏଥିରେ ନିର୍ବାଚନରେ ପରାଜିତ ପ୍ରାର୍ଥୀମାନେ ଜିତିଥିବା ପ୍ରାର୍ଥୀଙ୍କ ବିରୋଧରେ ପିଟିସନ ରୁଜୁ କରିଛନ୍ତି। ଅଭିଯୋଗକାରୀ ନିର୍ବାଚିତ ବିଧାୟକମାନେ ପଇସା ଦେଇ ଭୋଟ କ୍ରୟ କରିଥିବାର ଅଭିଯୋଗ ଆଣିଛନ୍ତି। ଏହା ଛଡା ଏହି ନିର୍ବାଚିତ ପ୍ରାର୍ଥୀମାନେ ସେମାନଙ୍କ ନିର୍ବାଚନୀ ଶପଥପାଠରେ ସେମାନଙ୍କ ସମ୍ପତ୍ତି ଓ ଅପରାଧିକ ରେକର୍ଡ ଲୁଚାଇଥିବାର ଗୁରୁତର ଅଭିଯୋଗ ଅଣାଯାଇଛି। ଶୁଣାଣି ପରେ କୋର୍ଟ ସମସ୍ତ ୪୨ ଜଣ ବିଧାୟକଙ୍କୁ ନୋଟିସ୍ ଜାରି କରିଛନ୍ତି ଓ ସେମାନଙ୍କୁ ଉତ୍ତର ରଖିବାକୁ ନିର୍ଦ୍ଦେଶ ଦେଇଛନ୍ତି। ଆଗାମୀ ଶୁଣାଣିରେ ବିଧାୟକଙ୍କ ସାକ୍ଷ ଓ ଜବାବ ଅନୁସାରେ ପରବର୍ତ୍ତି କାର୍ଯ୍ୟାନୁଷ୍ଠାନ ହେବ।

ହାଇକୋର୍ଟ ଯେଉଁ ବିଧାୟକଙ୍କୁ ନୋଟିସ୍ ଜାରି କରିଛନ୍ତି ସେମାନଙ୍କ ମଧ୍ୟରେ ବିଜେପିର ବିଧାନସଭା ବାଚସ୍ପତି ପ୍ରେମ କୁମାର ଥିବା ବେଳେ ଜେଡିୟୁର ଶକ୍ତି ଓ ଅର୍ଥମନ୍ତ୍ରୀ ବିଜେନ୍ଦ୍ର ଯାଦବ, ବିଜେପି ବିଧାୟକ ତଥା ପୂର୍ବତନମନ୍ତ୍ରୀ ଜୀବେଶ ମିଶ୍ର, ଜେଡିୟୁ ବିଧାୟକ ଚେତନ ଆନନ୍ଦ, ବିରୋଧୀ ଆରଜେଡି ବିଧାୟକ ଅମରେନ୍ଦ୍ର ପ୍ରସାଦ ଆଦି ଅଛନ୍ତି। ନୋଟିସ ଜାରି ହୋଇଥିବା ବିଧାୟକଙ୍କ ମଧ୍ୟରେ ଏନଡିଏର ୩୨ ଜଣ ବିଧାୟକ ଥିବାବେଳେ ମହାଗଠବନ୍ଧନର ୮-୧୦ ବିଧାୟକଙ୍କ ନାମ ରହିଛି। ହାଇକୋର୍ଟଙ୍କ ନୋଟିସ୍ ମିଳିବା ପରେ ଏହାକୁ ନେଇ ପାଟନା ବିଧାନସଭାରେ ପ୍ରବଳ ହଟ୍ଟଗୋଳ ହୋଇଛି।

ଏହି ମାମଲା ବିହାର ରାଜନୀତିକୁ ଏକ ଗୁରୁତ୍ୱପୂର୍ଣ୍ଣ ମୋଡ଼ ଦେବ ବୋଲି ଏବେ କୁହାଯାଉଛି। ଯଦି ମାମଲାର ଶୁଣାଣିରେ ବିଧାୟକଙ୍କ ସଦସ୍ୟତା ରଦ୍ଦ ହୁଏ ତେବେ ବିଧାନସଭା ଶକ୍ତିରେ ପରିବର୍ତ୍ତନ ଆସିବ ବୋଲି ଆଶଙ୍କା କରାଯାଉଛି। ଏବେ ସମସ୍ତଙ୍କ ନଜର ମାମଲାର ପରବର୍ତ୍ତି ଶୁଣାଣି ଉପରେ ରହିଛି। ହାଇକୋର୍ଟଙ୍କ ନିଷ୍ପତ୍ତି ଆଗକୁ ରାଜ୍ୟ ରଜନୀତିର ଭାଗ୍ୟ ନିର୍ଦ୍ଧାରଣ କରିବ ବୋଲି ଆକଳନ କରାଯାଉଛି।

ଏହା ବି ପଢନ୍ତୁ:-ଭାରତୀୟ ବଂଶୋଦ୍ଭବ ଓକିଲ ନୀଲ କତ୍ୟାଲ କିଏ? ଯାହାଙ୍କ ଆଗେ ଫେଲ୍ ହୋଇଗଲା ଟ୍ରମ୍ପଙ୍କ ସବୁ ଟାରିଫ୍ ପ୍ଲାନ୍​​​​​​​