ନୂଆଦିଲ୍ଲୀ: ଆମ ଆଦମୀ ପାର୍ଟିର ଟାଣୁଆ ନେତା ତଥା ପୂର୍ବତନ ମନ୍ତ୍ରୀ ସୌରଭ ଭରଦ୍ୱାଜଙ୍କ ଘରେ ଇଡିର ଚଢଉ। ତାଙ୍କ ବାସଭବନ ସମେତ ୧୩ଟି ସ୍ଥାନରେ ଚଢଉ ଚାଲିଛି। ଦିଲ୍ଲୀର ଦୁର୍ନୀତି ନିବାରଣ ଶାଖା (ଏସିବି) ଜୁନ୍ ମାସରେ ପୂର୍ବତନ ସ୍ୱାସ୍ଥ୍ୟମନ୍ତ୍ରୀ ସୌରଭ ଭରଦ୍ୱାଜ ଏବଂ ସତ୍ୟେନ୍ଦ୍ର ଜୈନଙ୍କ ବିରୋଧରେ ମାମଲା ରୁଜୁ କରିଥିଲା। ଏଥିରେ ଆପ ସରକାର ସମୟରେ ସ୍ୱାସ୍ଥ୍ୟ ଭିତ୍ତିଭୂମି ସହିତ ଜଡିତ ପ୍ରକଳ୍ପରେ ବଡ଼ ଧରଣର ଦୁର୍ନୀତି ହୋଇଥିବା ଅଭିଯୋଗ ହୋଇଥିଲା। ପରେ ଇଡି ଏହି ମାମଲାରେ ଏଣ୍ଟ୍ରି ମାରିଥିଲା।
ଦୁଇ ସ୍ୱାସ୍ଥ୍ୟମନ୍ତ୍ରୀ ସୌରଭ ଭରଦ୍ୱାଜ ଏବଂ ସତ୍ୟେନ୍ଦ୍ର ଜୈନ ୫,୫୯୦ କୋଟି ଟଙ୍କାର ଦୁର୍ନୀତି ଏବେ ତଦନ୍ତାଧୀନ। ଇଡି ଅନୁଯାୟୀ, ୨୦୧୮-୧୯ରେ ଆମ ଆଦମୀ ପାର୍ଟି ସରକାର ୨୪ଟି ହସ୍ପିଟାଲ ପ୍ରକଳ୍ପକୁ ଅନୁମୋଦନ କରିଥିଲା। ଛଅ ମାସ ମଧ୍ୟରେ ଆଇସିୟୁ ହସ୍ପିଟାଲ ପ୍ରସ୍ତୁତ କରିବାର ଯୋଜନା ଥିଲା, କିନ୍ତୁ ଦାବି କରାଯାଉଛି ଯେ କାମ ଏପର୍ଯ୍ୟନ୍ତ ସମ୍ପୂର୍ଣ୍ଣ ହୋଇନାହିଁ, ଯେତେବେଳେ ୮୦୦ କୋଟି ଟଙ୍କାରୁ ଅଧିକ ଖର୍ଚ୍ଚ ହୋଇଛି। ଏପର୍ଯ୍ୟନ୍ତ କେବଳ ୫୦% କାମ ସମ୍ପୂର୍ଣ୍ଣ ହୋଇଛି।
EDର ଅଭିଯୋଗ ଦିଲ୍ଲୀ ସରକାରଙ୍କ ଲୋକନାୟକ ହସ୍ପିଟାଲର ନିର୍ମାଣ ଖର୍ଚ୍ଚ ୪୮୮ କୋଟି ଟଙ୍କାରୁ ବୃଦ୍ଧି ପାଇ ୧,୧୩୫ କୋଟି ଟଙ୍କା ହୋଇଛି। ଏଜେନ୍ସି ଅଭିଯୋଗ କରିଛି ଯେ ଉପଯୁକ୍ତ ଅନୁମୋଦନ ବିନା ଅନେକ ହସ୍ପିଟାଲରେ ନିର୍ମାଣ କାର୍ଯ୍ୟ ଆରମ୍ଭ କରାଯାଇଥିଲା। ଏହାର ବିବୃତ୍ତିରେ, ACB କହିଛି ଯେ ୨୦୧୮-୧୯ ବର୍ଷରେ ହସ୍ପିଟାଲ ପ୍ରକଳ୍ପଗୁଡ଼ିକୁ ମଞ୍ଜୁର କରାଯାଇଥିଲା, ଯେଉଁଥିରେ ୧୧ଟି ଗ୍ରୀନଫିଲ୍ଡ ଏବଂ ୧୩ଟି ବ୍ରାଉନଫିଲ୍ଡ ପ୍ରକଳ୍ପ ଅନ୍ତର୍ଭୁକ୍ତ ଥିଲା।
ACB ଦ୍ୱାରା ପଞ୍ଜିକୃତ ମାମଲାରେ କୁହାଯାଇଛି ଯେ ସହର ସାରା ହସ୍ପିଟାଲ, ପଲିକ୍ଲିନିକ୍ ଏବଂ ICU ଭିତ୍ତିଭୂମି ନିର୍ମାଣରେ ବିଶାଳ ଅନିୟମିତତା, ଅନାବଶ୍ୟକ ବିଳମ୍ବ ଏବଂ ବ୍ୟାପକ ପରିମାଣରେ ପାଣ୍ଠିର ଅପବ୍ୟବହାର ସାମ୍ନାକୁ ଆସିଛି। ରିପୋର୍ଟ ଅନୁଯାୟୀ, ଶହ ଶହ କୋଟି ଟଙ୍କାର ଖର୍ଚ୍ଚ ବୃଦ୍ଧି ରେକର୍ଡ କରାଯାଇଛି ଏବଂ ନିର୍ଦ୍ଧାରିତ ସମୟସୀମା ମଧ୍ୟରେ ଗୋଟିଏ ବି ପ୍ରକଳ୍ପ ସମ୍ପୂର୍ଣ୍ଣ ହୋଇନାହିଁ।
