ଚୋର ସନ୍ଦେହରେ ଦୁଇ ଜଣକୁ ହତ୍ୟା ଘଟଣା, ଗ୍ୟାରେଜ ମାଲିକ ସହ ୨ କର୍ମଚାରୀ ଗିରଫ

ଚୌଦ୍ବାର: ଚୋର ସନ୍ଦେହରେ ଦୁଇ ଜଣକୁ ଜଘନ୍ୟ ହତ୍ୟାକାଣ୍ଡ ଘଟଣାରେ ୩ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କଲା ଟାଙ୍ଗୀ ପୋଲିସ। ଗତ ୩୧ ତାରିଖରେ କଟକ ଟାଙ୍ଗୀ ଥାନା ଅନ୍ତର୍ଗତ ୧୬ ନଂ ଜାତୀୟ ରାଜପଥ ନିର୍ଗୁଣ୍ଡୀ ନିକଟରେ ଥିବା ପୋକଲିନ ଗ୍ୟାରେଜରେ ଦୁଇ ଯୁବକଙ୍କୁ ବିଭତ୍ସ ହତ୍ୟା ହୋଇଥିଲା। ମୃତ ଯୁବକ ଦୁହେଁ ହେଲେ ଚୌଦ୍ୱାର ପୌରପାଳିକା ୧୭ ନଂ. ୱାର୍ଡ ନୂଆସାହିରେ ଭଡ଼ାରେ ରହୁଥିବା ମହମ୍ମଦ ସୋହେବ (୨୧) । ତଦନ୍ତକ୍ରମେ ଗ୍ୟାରେଜ ମାଲିକ ସହ ଦୁଇ କର୍ମଚାରୀକୁ ଗିରଫ କରିଛି ଟାଙ୍ଗୀ ପୋଲିସ । ଗିରଫ ଅଭିଯୁକ୍ତ ହେଲେ ଗ୍ୟାରେଜ ମାଲିକ ଦିଲ୍ଲୀପ କୁମାର ନାୟକ, ସିକ୍ୟୁରିଟି ଗାର୍ଡ ଜ୍ଞାନ ରଞ୍ଜନ ମହାନ୍ତି ଓ ଗ୍ୟାରେଜ କର୍ମଚାରୀ ମିଥୁନ କୁମାର ସିଂ । ଏହି ଘଟଣାରେ ଆଉ ୫ ରୁ ୬ ଜଣ ଅପରାଧୀ ସାମିଲ ଥିବାବେଳେ ତାଙ୍କୁ ଖୁବ୍ ଶୀଘ୍ର ଧରାଯିବ ସହ ଘଟଣାର ପର୍ଦାଫାଶ କରାଯିବ ବୋଲି କହିଛନ୍ତି ଚୌଦ୍ବାର ଏସଡିପିଓ ଉମାକାନ୍ତ ନାୟକ ।

ବୁଧବାର ପୋଲିସ ଦେଇଥିବା ସୂଚନା ଅନୁସାରେ, ୪ ଦିନ ତଳେ ଗ୍ୟାରେଜ୍ରୁ ଦେଢ଼ ଲକ୍ଷରୁ ଅଧିକ ଟଙ୍କାର ସାମଗ୍ରୀ ଚୋରି ହୋଇଥିଲା । ତେବେ ମଙ୍ଗଳବାର ରାତିରେ ୪ ଜଣ କର୍ମଚାରୀ ଗ୍ୟାରେଜରେ ଶୋଇଥିଲେ । ବିଳମ୍ବିତ ରାତିରେ ସୋହେବ ଓ ପ୍ରଶାନ୍ତ ଆକ୍ଟିଭାରେ ଗ୍ୟାରେ ଆସିଥିଲେ । କର୍ମଚାରୀମାନେ ସେମାନଙ୍କୁ ଚୋର ସନ୍ଦେହ କରି ଦୁଇ ଜଣଙ୍କୁ କାବୁ କରିବା ସହ ପିଟିଥିଲେ । ଏପରିକି ଦୁଇ ଜଣଙ୍କ ପ୍ୟାଣ୍ଟ୍ ସାର୍ଟ ଖୋଲି ଅର୍ଦ୍ଧଉଲଗ୍ନ କରି ଶୀତରେ ଗ୍ୟାରେଜ୍ ସମ୍ମୁଖ ଏକ ଖୁଣ୍ଟରେ ପ୍ଲାଷ୍ଟିକ୍ ଦଉଡ଼ିରେ ବାନ୍ଧି ଗୋଡ଼ ଭାଙ୍ଗି ଦେଇଥିଲେ । ସେତିକିରେ ମନ ଶାନ୍ତି ହୋଇ ନଥିଲା ଯେ, ଏକ ବଡ଼ ହାମର୍ରେ ଶରୀରର ବିଭିନ୍ନ ସ୍ଥାନକୁ ପିଟିଥିଲେ । ଫଳରେ ଉଭୟଙ୍କର ମୃତ୍ୟୁ ଘଟିଥିଲା । ପ୍ରଶାନ୍ତଙ୍କ ମୃତଦେହ ବାହାରେ ପଡ଼ିଥିବାବେଳେ ସୋହେବଙ୍କ ମୃତଦେହକୁ ଘର ଭିତରେ ପକାଇ କବାଟ ବନ୍ଦ କରି ଦିଆଯାଇଥିଲା । ଅଭିଯୁକ୍ତଙ୍କୁ ଚିହ୍ନଟ କରି ଦୃଢ଼ କାର୍ଯ୍ୟାନୁଷ୍ଠାନ ନେବାକୁ ଅଞ୍ଚଳବାସୀ ଅଡ଼ି ବସିଥିଲେ । ଦୋଷୀମାନଙ୍କୁ ତୁରନ୍ତ ଗିରଫ କରାଯିବ ବୋଲି ପ୍ରତିଶ୍ରୁତି ଦେବା ପରେ ଉତ୍ତେଜନା ପ୍ରଶମିତ ହୋଇଥିଲା ।

ସୂଚନାଥାଉକି, ସୋହେବ ମଙ୍ଗୁଳିସ୍ଥିତ ଏକ ମେଡିସିନ୍ ଗୋଦାମରେ ରାତିରେ କାର୍ଯ୍ୟ କରୁଥିବା ବେଳେ ପ୍ରଶାନ୍ତ ସହ ସାଙ୍ଗ ହୋଇ ବିଭିନ୍ନ ସମୟରେ ବୁଲାବୁଲି କରନ୍ତି । ସାଇଣ୍ଟିଫିକ୍ ଟିମ୍ ହତ୍ୟାକାଣ୍ଡସ୍ଥଳରୁ ଏକ ଲୁହା ହାମର୍, ଦୁଇ ହଳ ପ୍ୟାଣ୍ଟ୍ ସାର୍ଟ, ହଳେ ଜୋତା, ହେଲମେଟ୍ ଓ ଆକ୍ଟିଭା ଗାଡ଼ିକୁ ଜବତ କରିଛି । ପୁଲିସ ଗ୍ୟାରେଜ୍ରେ ଲାଗିଥିବା ସିସିଟିଭି ସହ ଆଖପାଖରେ ଲାଗିଥିବା ସିସିଟିଭି ଫୁଟେଜକୁ ଯାଞ୍ଚ୍ କରି ସମ୍ପର୍କୀୟମାନଙ୍କୁ ପଚରାଉଚରା କରୁଛି । ଅଭିଯୁକ୍ତମାନଙ୍କ ସମ୍ପର୍କରେ କିଛି ସୁରାକ୍ ମିଳିଥିବା କୁହାଯାଉଛ।