ଭୁବନେଶ୍ୱର ୧୨/୦୭: ରାଜଧାନୀରେ ବଢୁଛି କୁକୁର ବିଲେଇଙ୍କ ଦୌରାତ୍ମ୍ୟ । ଦୈନିକ କ୍ୟାପିଟାଲ ହସ୍ପିଟାଲକୁ ଆସୁଛନ୍ତି ଏକାଧିକ ରୋଗୀ । ସହରର ମୁଖ୍ୟ ରାସ୍ତାରୁ ନେଇ ଛକ, ବଜାର ଓ ଗାଁରେ କୁକୁର, ବିଲେଇ କାମୁଡାର ଶିକାର ହେଉଛନ୍ତି ଲୋକେ । ଦିନ ଅପେକ୍ଷା ରାତିରେ ଏମାନେ ଅଧିକ ହିଂସ୍ର ହେଉଛନ୍ତି । କେବଳ ବୁଲା କୁକୁର ନୁହେଁ ପୋଷା କୁକୁର ଓ ବିଲେଇମାନେ ମଧ୍ୟ କାମୁଡ଼ୁଛନ୍ତି ।
ଫଳରେ କ୍ୟାପିଟାଲ ହସ୍ପିଟାଲରେ ରୋଗୀଙ୍କ ସଂଖ୍ୟା ବଢୁଛି । ତଥ୍ୟ କହୁଛି, ଗତ ଚାରିମାସରେ ରାଜଧାନୀ ସମେତ ଉପକଣ୍ଠ ଅଞ୍ଚଳର ୪ହଜାର ଲୋକ ବୁଲା କୁକୁର, ପୋଷା କୁକୁର ଓ ବିଲେଇଙ୍କ ଆକ୍ରମଣର ଶିକାର ହୋଇଛନ୍ତି । ଏମାନେ ସମସ୍ତେ କ୍ୟାପିଟାଲ ହସ୍ପିଟାଲକୁ ଆସି ଆଣ୍ଟି-ରାବିଜ୍ ଟିକା ନେଇଛନ୍ତି । ଏହି ଚାରିମାସରେ ୧୭,୦୨୨ରୁ ଅଧିକ ଆଣ୍ଟି-ରାବିଜ୍ ଟିକା ଦିଆଗଲାଣି । କୁକୁର କାମୁଡ଼ାର ଶିକାର ହୋଇ ଏବେ ପ୍ରତିଦିନ ୩୦ରୁ ୩୫ଜଣ ରୋଗୀ ହସ୍ପିଟାଲକୁ ଆସି ଟିକା ନେଉଛନ୍ତି । ଯାହା ଏକ ଚିନ୍ତାର ବିଷୟ ପାଲଟିଛି ।
ହସ୍ପିଟାଲରେ ପର୍ଯ୍ୟାପ୍ତ ଭ୍ୟାକସିନ୍ ମହଜୁଦ ରହିଥିବା କର୍ତ୍ତୃପକ୍ଷ କହିଛନ୍ତି । ସେପଟେ ସହରରେ କୁକୁର କାମୁଡ଼ା, କୁକୁର ବନ୍ଧ୍ୟାକରଣ ଓ ଟିକାକରଣ ସମ୍ପର୍କିତ ଅଭିଯୋଗ ପାଇଁ ଭୁବନେଶ୍ୱର ମହାନଗର ନିଗମ(ବିଏମ୍ସି) ପକ୍ଷରୁ ୧୯୨୯ ଟୋଲଫ୍ରି ନମ୍ବର ଜାରି କରାଯାଇଛି । ହେଲେ ଅଧିକାଂଶ ସମୟରେ ଏହି ନମ୍ବରରୁ କଲ୍ କଲେ କୌଣସି ଉତ୍ତର ମିଳୁନଥିବା ଅଭିଯୋଗ ହୋଇଛି ।
ସୋଆ ଭେଟେରନାରୀ ମହାବିଦ୍ୟାଳୟର ବରିଷ୍ଠ ପ୍ରଫେସର ଡ. ବୀରକିଶୋର ପରିଡ଼ା କହିଛନ୍ତି, ସ୍ୱାଭାବିକ ଭାବରେ ବର୍ଷା ଋତୁରୁ ଶୀତ ପର୍ଯ୍ୟନ୍ତ କୁକୁର କାମୁଡ଼ାର ପରିମାଣ ବଢିଥାଏ । ଏବେ କୁକୁରମାନଙ୍କ ବ୍ରିଡିଂ ସମୟ । ଏହି ସମୟରେ ସେମାନଙ୍କ ସେକ୍ସୁଆଲ ଆନ୍ଞ୍ଜାଇଟି ରହିଥାଏ । ହଠାତ୍ କିଛି ବିପଦର ଆଶଙ୍କା ପାଇଲେ କୁକୁରମାନେ ହିଂସ୍ର ହୋଇଯାଆନ୍ତି । ଶୀତଦିନରେ କୁକୁର ଛୁଆ ଜନ୍ମ ନିଅନ୍ତି । ସେ ସମୟରେ ମଧ୍ୟ ଜଗିରଖି ଚଳିବାକୁ ପଡ଼ିବ । କାରଣ ମା’ କୁକୁର ମଧ୍ୟ କାମୁଡିବାକୁ ଗୋଡାଏ ।
ଏହି ସମୟରେ ଯଦି କୁକୁର କାମୁଡେ ତେବେ ୯୦ରୁ ୯୫% ଜଳାନ୍ତକ ହେବାର ଆଶଙ୍କା ରହିଥାଏ । ତେଣୁ ଏଥିପ୍ରତି ସଚେତନ ହେବା ସହ ଘରେ ଥିବା ପୋଷା କୁକୁର ଓ ବିଲେଇଙ୍କୁ ଧାର୍ଯ୍ୟ ସମୟରେ ଟିକାକରଣ କରିବା ଆବଶ୍ୟକ ବୋଲି ସେ କହିଛନ୍ତି । କ୍ୟାପିଟାଲ ହସ୍ପିଟାଲ ନିର୍ଦ୍ଦେଶକ ଡା. ରୁପଭାନୁ ମିଶ୍ର କହିଛନ୍ତି, କେବଳ ବୁଲା କୁକୁର କାମୁଡୁଥିବା ଲୋକେ ଆସି ଟିକା ନେଉଛନ୍ତି ତାହା ନୁହେଁ । ସେମାନଙ୍କ ମଧ୍ୟରେ ବିଲେଇ ଓ ପୋଷା କୁକୁର କାମୁଡ଼ା ଓ ଆଞ୍ଚୁଡା ଜନିତ ସଂଖ୍ୟା ରହିଥାଏ ।
ପ୍ରକାଶ ଥାଉକି, ରାଜ୍ୟରେ କୁକୁର କାମୁଡ଼ା ମାମଲା ଗତ ୪ବର୍ଷରେ ସଙ୍ଗୀନ ରହିଛି । ବିଧାନସଭା ତଥ୍ୟ କହୁଛି, ୨୦୨୧ରେ ୫୯୦୮୫, ୨୦୨୨ରେ ୬୪୬୪୨, ୨୦୨୩ରେ ୨ଲକ୍ଷ ୬୦ହଜାର ଓ ୨୦୨୪ରେ ୨ଲକ୍ଷ ୪୩ହଜାର ବ୍ୟକ୍ତିଙ୍କୁ କୁକୁର କାମୁଡ଼ିଛି । ୨୦୨୩ରେ ସର୍ବାଧିକ କୁକୁର କାମୁଡ଼ା ମାମଲାରେ ଦେଶର ୧୦ ରାଜ୍ୟ ମଧ୍ୟରେ ଓଡ଼ିଶା ରହିଛି । ଏବେ ଆଣ୍ଟିରାବିଜ୍ ଟିକା ସମସ୍ତ ୟୁପିଏଚସି, ୟୁସିଏଚସି, ପିଏଚ୍ସି, ସିଏଚ୍ସି, ଏସଡିଏଚ, ଡିଏଚ୍ଏଚ ଓ ମେଡିକାଲ କଲେଜ ହସ୍ପିଟାଲରେ ଉପଲବ୍ଧ ।
