ନୂଆଦିଲ୍ଲୀ: ସ୍ୱରର ଯାଦୁରେ ଶ୍ରୋତାଙ୍କ ହୃଦୟରେ ରାଜ୍ କରୁଛନ୍ତି ବଲିଉଡ୍ର ପ୍ରଖ୍ୟାତ ଗାୟକ ଉଦିତ ନାରାୟଣ। ତାଙ୍କର କଣ୍ଠରୁ ଅନେକ ଗୀତ ଫିଲ୍ମ ଇଣ୍ଡଷ୍ଟ୍ରିରେ ସ୍ୱତନ୍ତ୍ର ସ୍ଥାନ ସୃଷ୍ଟି କରିଛି। କିନ୍ତୁ ନିକଟରେ ଉଦିତ୍ଙ୍କ ଏକ ଭିଡିଓକୁ ନେଇ ଏବେ ସବୁଠି ଚର୍ଚ୍ଚା। ଉଦିତ ନାରାୟଣ ତାଙ୍କର ଏକ କନସର୍ଟ ସମୟରେ ମହିଳା ପ୍ରଶଂସକଙ୍କୁ ଓଠରେ ଚୁମ୍ବନ ଦେଇଥିଲେ। ଏହି ଭିଡିଓ ସାମ୍ନାକୁ ଆସିବା ମାତ୍ରେ ସୋସିଆଲ ମିଡିଆରେ ତାଙ୍କୁ ଟ୍ରୋଲ୍ କରିବା ଆରମ୍ଭ କରିଦେଇଛନ୍ତି। କିନ୍ତୁ ଉଦିତଙ୍କ ପାଇଁ ଏହା ପ୍ରଥମ ଥର ନୁହେଁ, ଏହା ପୂର୍ବରୁ ମଧ୍ୟ ଗାୟକଙ୍କୁ ଅନେକ ପ୍ରସଙ୍ଗ ପାଇଁ ଟ୍ରୋଲ୍ କରାଯାଇଛି, ଯାହା ମଧ୍ୟରୁ ଗୋଟିଏ ତାଙ୍କ ବ୍ୟକ୍ତିଗତ ଜୀବନ ସହିତ ଜଡିତ।
ଆପଣ ଜାଣନ୍ତି କି ଉଦିତ ନାରାୟଣ ଦୁଇ ଥର ବିବାହ କରିଛନ୍ତି। ସେ ଦ୍ୱିତୀୟ ଥର ଲୁଚିକରି ବିବାହ କରିଥିଲେ। ଧରାପଡ଼ିବା ପରେ ଉଦିତ ପ୍ରଥମ ପତ୍ନୀଙ୍କୁ ଚିହ୍ନି ନ ଥିବା କହିଥିଲେ। ଏହି ଘଟଣା କୌଣସି ଫିଲ୍ମ ଡ୍ରାମା ଠାରୁ ବି କମ୍ ନୁହେଁ।
ବିହାରର ସୁପୌଲ ଜିଲ୍ଲାର ବୈସିରେ ଉଦିତଙ୍କ ଜନ୍ମ। ସେ ୧୯୮୪ ମସିହାରେ ରଞ୍ଜନା ଝାଙ୍କୁ ବିବାହ କରିଥିଲେ। ଏହାର ଠିକ୍ ଗୋଟିଏ ବର୍ଷ ପରେ ଉଦିତ ମୁମ୍ବାଇ ଚାଲିଆସିଥିଲେ। ମୁମ୍ବାଇରେ କିଛି ଦିନ ସଂଘର୍ଷ କରିବା ପରେ ନିଜର ପରିଚୟ ସୃଷ୍ଟି କଲେ। ସେହି ସମୟରେ ଦୀପାଙ୍କ ସହ ଉଦିତଙ୍କ ସାକ୍ଷାତ ହୋଇଥିଲା। ଉଭୟ ପରସ୍ପରର ପ୍ରେମରେ ପଡ଼ିଗଲେ। ୧୯୮୫ ମସିହାରେ ଉଦିତ ତାଙ୍କର ପତ୍ନୀ ରଞ୍ଜନାଙ୍କୁ ଛାଡପତ୍ର ନ ଦେଇ ଦୀପାଙ୍କୁ ବିବାହ କରିଥିଲେ। ଦୁଇ ବର୍ଷ ପରେ ତାଙ୍କର ପୁଅ ଆଦିତ୍ୟ ନାରାୟଣ ଜନ୍ମ ହୋଇଥିଲେ।
କିନ୍ତୁ ଭାଣିଜୀ ବାହାଘର ସମୟରେ ସବୁ କିଛି ପୋଲ୍ ଖୋଲିଗଲା। ବିବାହରେ ଯୋଗଦେବା ପାଇଁ ଦ୍ୱିତୀୟ ପତ୍ନୀ ଦୀପାଙ୍କ ସହ ପାଟନା ଯାଇଥିଲେ। ବିବାହରୁ ଫେରିବା ପରେ ସେ ହୋଟେଲ ରୁମରେ ଶୋଇବାକୁ ପ୍ରସ୍ତୁତ ହେଉଥିଲେ। ଠିକ ସେତିକି ବେଳେ ପ୍ରାୟ ୧୦୦ରୁ୧୫୦ ଲୋକ ହୋଟେଲ ବାହାରେ ଏକାଠି ହୋଇ ହୋହାଲ୍ଲା କରିଥିଲେ। ସେମାନେ ଉଦିତ ନାରାୟଣଙ୍କ ବିରୋଧରେ ଗୁରୁତର ଅଭିଯୋଗ ଆଣିଥିଲେ।
ପରିସ୍ଥିତି ବିଗିଡିବା ଦେଖି ହୋଟେଲ କର୍ମଚାରୀ ଉଦିତ ନାରାୟଣଙ୍କ ନିକଟକୁ ଆସି ଲୋକଙ୍କ ଅଭିଯୋଗ ବିଷୟରେ କହିଥିଲେ। କର୍ମଚାରୀ କହିଥିଲେ - କିଛି ଲୋକ ଆସିଛନ୍ତି, ସେମାନଙ୍କ ସହ ରଞ୍ଜନା ଝା ନାମକ ଜଣେ ମହିଳା ଅଛନ୍ତି ଯିଏ ଆପଣଙ୍କର ପତ୍ନୀ ବୋଲି ଅଭିଯୋଗ କରୁଛନ୍ତି। ଏପରିକି ତାଙ୍କର ବିବାହ ଫଟୋ ଓ ଅନ୍ୟ ପ୍ରମାଣପତ୍ର ଦେଖାଉଛନ୍ତି। କିନ୍ତୁ ଏହାକୁ ଉଡ଼ାଇ ଦେଇଥିଲେ ଉଦିତ।
ରଞ୍ଜନା ଏସବୁ ବିଷୟରେ ଜାଣିବା ପରେ ଆଇନଗତ କାର୍ଯ୍ୟାନୁଷ୍ଠାନ ନେବାକୁ ନିଷ୍ପତ୍ତି ନେଇଥିଲେ। ମହିଳା ଆୟୋଗରେ ଅଭିଯୋଗ କରିଥିଲେ। ମାମଲା କୋର୍ଟରେ ପହଞ୍ଚିଲା। ରଂଜନାଙ୍କୁ ସମର୍ଥନ କରି ନେପାଳ ରେଡିଓ ଉଦିତ ନାରାୟଣଙ୍କ ଗୀତକୁ ମଧ୍ୟ ବ୍ୟାନ୍ କରିଥିଲା। ଶେଷରେ ରଞ୍ଜନାଙ୍କୁ ପ୍ରଥମ ପତ୍ନୀ ଭାବରେ ଗ୍ରହଣ କରିବାକୁ ବାଧ୍ୟ ହୋଇଥିଲେ ଉଦିତ। କୋର୍ଟରେ ଏହା ପ୍ରମାଣିତ ହେବା ପରେ, ପ୍ରଥମ ପତ୍ନୀଙ୍କୁ ଭରଣପୋଷଣ ଦେବାକୁ ଉଦିତଙ୍କୁ ନିର୍ଦ୍ଦେଶ ଦେଇଥିଲେ କୋର୍ଟ।