ମୁମ୍ବାଇ: ଫର୍ମକୁ ଫେରିଲେ ହିଟମ୍ୟାନ୍। ରୋହିତ ଶର୍ମା ଓ ସୂର୍ଯ୍ୟକୁମାର ଯାଦବଙ୍କ ପ୍ରହାରରେ ଧରାଶାୟୀ ଚେନ୍ନାଇ ସୁପର କିଙ୍ଗ୍ସ। ମୁମ୍ବାଇର ଓ୍ଵାଙ୍ଖେଡ଼େ ଷ୍ଟାଡିୟମରେ ଖେଳା ଯାଇଥିବା ଆଇପିଏଲ୍ ୨୦୨୫ର ୩୮ତମ ମ୍ୟାଚ୍ରେ ମୁମ୍ବାଇ ଇଣ୍ଡିଆନ୍ସ ୯ ଓ୍ଵିକେଟ୍ରେ ଚେନ୍ନାଇ ସୁପର କିଙ୍ଗ୍ସକୁ ହରାଇଛି। ସହଜ ବିଜୟ ସହ ଚଳିତ ସିଜିନରେ ଚେପକ ପରାଜୟର ପ୍ରତିଶୋଧ ନେବା ସହ ହାର୍ଦ୍ଦିକ ପାଣ୍ଡିଆନଙ୍କ ମୁମ୍ବାଇ ଇଣ୍ଡିଆନ୍ସ ହ୍ୟାଟ୍ରିକ ବିଜୟ ହାସଲ କରିଛି। ପ୍ରଥମେ ବ୍ୟାଟିଂ କରିଥିବା ଚେନ୍ନାଇ ରବୀନ୍ଦ୍ର ଜାଡ଼େଜାଙ୍କ ୫୩ ରନ ଓ ଶିବମ ଦୁବେଙ୍କ ୫୦ ରନ ବଳରେ ନିର୍ଦ୍ଧାରିତ ଓଭରରେ ୫ ଓ୍ଵିକେଟ୍ ହରାଇ ୧୭୬ ରନ କରିଥିଲା। ଜବାବରେ ମୁମ୍ବାଇ ଇଣ୍ଡିଆନ୍ସ ରୋହିତ ଶର୍ମାଙ୍କ ଅପରାଜିତ ୭୬ ରନ ଓ ସୂର୍ଯ୍ୟକୁମାର ଯାଦବଙ୍କ ୬୮ ରନ ବଳରେ ଏକ ଓ୍ଵିକେଟ୍ ହରାଇ ୧୫.୪ ଓଭରରେ ମ୍ୟାଚ୍କୁ ଜିତି ନେଇଛି। ୮ ମ୍ୟାଚ୍ରୁ ୪ ବିଜୟ ସହ ମୁମ୍ବାଇ ପଏଣ୍ଟ ଟେବୁଲର ଷଷ୍ଠକୁ ଉଠିଛି। ଚେନ୍ନାଇ ଷଷ୍ଠ ପରାଜୟ ସହ ଦଶମ ସ୍ଥାନକୁ ଖସି ଆସିଛି।
୧୭୬ ରନର ବିଜୟ ଲକ୍ଷ୍ୟ ପିଛା କରିଥିବା ମୁମ୍ବାଇକୁ ଦୁଇ ଓପନର ରୋହିତ ଶର୍ମା ଓ ରିୟାନ ରିକଲଟନ ଦମଦାର ବ୍ୟାଟିଂ କରିଥିଲେ। ପ୍ରଥମ ଓ୍ଵିକେଟ୍ରେ ୬୩ ରନ ଯୋଡ଼ି ବିଜୟ ପାଇଁ ମୂଳଦୁଆ ପକାଇଥିଲେ। ରିକଲଟନ ୨୪ ରନ କରି ଆଉଟ୍ ହୋଇଥିଲେ। ଏହା ପରେ ରୋହିତ ଓ ସୂର୍ଯ୍ୟକୁମାର ଯାଦବ ମୋର୍ଚ୍ଚା ସମ୍ଭାଳିଥିଲେ। ଆଉ ନିଜର ପୁରୁଣା ଫର୍ମରେ ନଜର ଆସିଲେ ରୋହିତ ଓ ସୂର୍ଯ୍ୟକୁମାର।
ଉଭୟ ଚେନ୍ନାଇ ବୋଲରଙ୍କୁ ନିର୍ମମ ପ୍ରହାର କରି ମ୍ୟାଚ୍କୁ ଏକତରଫା କରିଥିଲେ। ଦୁଇ ବ୍ୟାଟର ନିଜର ନିଜର ଅର୍ଦ୍ଧଶତକ ପୂରା କରିଥିଲେ। ରୋହିତ ଓ ସୂର୍ଯ୍ୟ ଅବିଭାବଜିତ ଦ୍ଵିତୀୟ ଓ୍ଵିକେଟ୍ରେ ୧୧୪ ରନ ଯୋଡ଼ି ଦଳକୁ ୯ ଓ୍ଵିକେଟ୍ରେ ଏକତରଫା ବିଜୟ ଦେଇଛନ୍ତି। ୧୭୬ ରନର ବିଜୟ ଲକ୍ଷ୍ୟ ମୁମ୍ବାଇ ସାମ୍ନାରେ ଫିକା ପଡ଼ି ଯାଇଛି। ରୋହିତ ୪୫ ବଲ୍ରୁ ୪ ଚୌକା ଓ ୬ ଛକା ସହ ୭୬ ରନ ଓ ସୂର୍ଯ୍ୟକୁମାର ୩୦ ବଲ୍ରୁ ୬ ଚୌକା ଓ ୫ ଛକା ସହ ଅପରାଜିତ ୬୮ ରନ କରିଥିଲେ।
