ବର୍ଷା ଆଣିଲା ଡେଙ୍ଗୁ ଭୟ । ସହରାଞ୍ଚଳରେ ମଶା ଉତ୍ପାତ ଚରମ ସୀମାରେ ପହଞ୍ଚିଛି । ମଶା କାମୁଡ଼ାରେ କଲବଲ ହେଉଛନ୍ତି ଲୋକେ । ଆଉ ଡେଙ୍ଗୁ ଜ୍ୱରରେ ଥରୁଛନ୍ତି ରୋଗୀ । ଜ୍ୱର ହେଲା ମାତ୍ରେ ଲୋକ ଭୟରେ ହସ୍ପିଟାଲ୍କୁ ଡେଙ୍ଗୁ ପରୀକ୍ଷା ପାଇଁ ଧାଉଁଛନ୍ତି । ଏପଟେ ରାଜ୍ୟରେ ଡେଙ୍ଗୁ ରୋଗୀଙ୍କ ସଂଖ୍ୟା ୨ହଜାର ମୁହାଁ ହେବାକୁ ଗଲାଣି । ବର୍ତ୍ତମାନ ୧୬୪୦ ଜଣ ରୋଗୀ ଚିହ୍ନଟ ହେଲେଣି ।
ଡେଙ୍ଗୁ ମଶା ଖୋର୍ଦ୍ଧା ଜିଲ୍ଳାରେ ଆତଙ୍କ ସୃଷ୍ଟି କରିଛି । ଖୋର୍ଦ୍ଧାରେ ୪୫୦, ସୁନ୍ଦରଗଡ଼ରେ ୩୬୦, ବଲାଙ୍ଗିରରେ ୧୨୦ ଓ କଟକ ୨୭୦ ଚିହ୍ନଟ ହେଲେଣି । ରାଜଧାନୀର ଗଳିକନ୍ଦିରେ ମଶା । ଘରେ ବାହାରେ ଶାନ୍ତିରେ ଶୁଆଇ ବସେଇ ଦେଉନାହାନ୍ତି । ବର୍ତ୍ତମାନ ସୁଦ୍ଧା ୩୭୯ ରୋଗୀ ଚିହ୍ନଟ ହେଲେଣି । ଚଳିତ ମାସରେ ୧୦୬ ରୋଗୀ ଚିହ୍ନଟ ହେଲେଣି । ଦିନକରେ ୨୬ ଚିହ୍ନଟ ହୋଇଛନ୍ତି । ବର୍ତ୍ତମାନ ଖଣ୍ଡଗିରି ଅଞ୍ଚଳରେ ସ୍ଥିତି ସଙ୍ଗିନ ରହିଛି । ସେଠାରେ ବର୍ତ୍ତମାନ ସୁଦ୍ଧା ୩୨ ରୋଗୀ ଚିହ୍ନଟ ହେଲେଣି । ବରମୁଣ୍ଡାରେ ୧୭, ଆଇଆରସି ଭିଲେଜ୍ରେ ୧୬, ସହିଦନଗରରେ ୨୪, ନନ୍ଦନବିହାରରେ ୧୭ ଓ ପଥରଗାଡ଼ିଆରେ ୧୯ ରୋଗୀ ଚିହ୍ନଟ ହେଲେଣି । ସେହିପରି କ୍ୟାପିଟାଲ୍ ହସ୍ପିଟାଲ୍ରେ ୨୧୭ ପରୀକ୍ଷାରୁ ୧୧ଜଣ ରୋଗୀ ଚିହ୍ନଟ ହୋଇଛନ୍ତି । ଜନସ୍ୱାସ୍ଥ୍ୟ ନିର୍ଦ୍ଦେଶକ ଡା. ନୀଳକଣ୍ଠ ମିଶ୍ର କହିଛନ୍ତି, ଗତ ବର୍ଷ ତୁଳନାରେ ଚଳିତ ବର୍ଷ ରୋଗୀଙ୍କ ସଂଖ୍ୟା ବଢ଼ିନି । ଏବେ ରାଜ୍ୟରେ ଦୈନିକ ୫୦ରୁ ୧୦୦ ଭିତରେ ଚିହ୍ନଟ ହେଉଛନ୍ତି । ଗତବର୍ଷ ୨୯ହଜାର ଡେଙ୍ଗୁ ପରୀକ୍ଷା ହୋଇଥିଲା ।
ହେଲେ ଏବର୍ଷ ବର୍ତ୍ତମାନ ସୁଦ୍ଧା ୫୬ହଜାର ପରୀକ୍ଷା ହେଲାଣି । ଗତ ବର୍ଷ ତୁଳନାରେ ଡେଙ୍ଗୁ ପରୀକ୍ଷା ବଢ଼ିଛି । ହେଲେ ରୋଗୀଙ୍କ ସଂଖ୍ୟା ସେତେ ବଢ଼ିନି । ରାଜ୍ୟର ୪୦ ସ୍ଥାନରେ ଡେଙ୍ଗୁ ପରୀକ୍ଷା କରାଯାଉଛି । ଖୋର୍ଦ୍ଧା ଓ ରାଉରକେଲାରେ ରୋଗୀ ସଂଖ୍ୟା ଅଧିକ ରହିଛି ବୋଲି ସେ କହିଛନ୍ତି । ଅନ୍ୟପଟରେ ରାଜ୍ୟ ସ୍ୱାସ୍ଥ୍ୟ ବିଭାଗ ଡେଙ୍ଗୁ ନିୟନ୍ତ୍ରଣ ଓ ପ୍ରତିକାର ପାଇଁ ଜିଲ୍ଲା ଅଧିକାରୀଙ୍କୁ ଚିଠି ଲେଖି ନିର୍ଦ୍ଦେଶ ଦେଇଛି ।
