ଲାଲକିଲ୍ଲାରେ କାର୍ ବିସ୍ଫୋରଣ; ଦିଲ୍ଲୀ ସହ ଦୋହଲିଗଲା ସାରା ଦେଶ, ଅତୀତରେ ଘଟିଛି ଏମିତି ବିସ୍ଫୋରଣ

ନୂଆଦିଲ୍ଲୀ : ସୋମବାର ସନ୍ଧ୍ୟାରେ ଲାଲକିଲ୍ଲା ମେଟ୍ରୋ ଷ୍ଟେସନର ଗେଟ୍ ନମ୍ବର-୧...ହୋଇଥିଲା ଭୟଙ୍କର ବିସ୍ଫୋରଣ...୧୩ଜଣ ଲୋକଙ୍କର ମୃତ୍ୟୁ ହୋଇଥିବା ବେଳେ ଦୁଇ ଡଜନେ ଗୁରୁତର। ପୂରା ଘଟଣାରେ ଆତଙ୍କି ଲିଙ୍କ୍ ର ଚେର ଖୋଜାଚାଲିଥିବାବେଳେ ଆସନ୍ତୁ ନଜର ପକାଇବା ଇତିହାସରେ ଭାରତକୁ ଦୋହଲାଇଥିବା ଏଭଳି କିଛି ବଡ଼ ବିସ୍ଫୋରଣ ଉପରେ ।

୨୦୨୪ରେ ରାମେଶ୍ୱରମ୍ କାଫେ ବିସ୍ଫୋରଣ- ମାର୍ଚ୍ଚ ୧, ୨୦୨୪ରେ ବେଙ୍ଗାଲୁରୁର ବ୍ରୁକଫିଲ୍ଡରେ ଥିବା ରାମେଶ୍ୱରମ୍ କାଫେରେ ହୋଇଥିଲା ବିସ୍ଫୋରଣ। ଏହି ଘଟଣାରେ ଦଶ ଜଣ ଆହତ ହୋଇଥିଲେ। ତଦନ୍ତରୁ ଜଣାପଡିଛି ଯେ ଏହି ବିସ୍ଫୋରଣରେ ଏକ ଇମ୍ପ୍ରୋଭାଇଜ୍ଡ ଏକ୍ସପ୍ଲୋସିଭ୍ ଡିଭାଇସ୍ (IED) ବ୍ୟବହାର କରାଯାଇଥିଲା।

ଭୋପାଳ-ଉଜ୍ଜୟିନୀ ପାସେଞ୍ଜର ଟ୍ରେନରେ ବିସ୍ଫୋରଣ-ମାର୍ଚ୍ଚ ୨୦୧୭ରେ, ମଧ୍ୟପ୍ରଦେଶର ଶାଜାପୁର ଜିଲ୍ଲାରେ ଭୋପାଳ-ଉଜ୍ଜୟିନୀ ପାସେଞ୍ଜର ଟ୍ରେନ ଭିତରେ ଏକ ବିସ୍ଫୋରଣ ଘଟିଥିଲା। ସକାଳ ୯.୩୦ ରୁ ୧୦ ଟା ମଧ୍ୟରେ ଟ୍ରେନଟି ଜାବଦି ଷ୍ଟେସନ ନିକଟରେ ଭୋପାଳରୁ ଉଜ୍ଜୟିନୀ ଯାଉଥିବା ସମୟରେ ଟ୍ରେନର ଏକ ଜେନେରାଲ କୋଚରେ ହୋଇଥିଲା ବିସ୍ଫୋରଣ ।

୨୦୧୩ ବୋଧଗୟା ବିସ୍ଫୋରଣ-୭ ଜୁଲାଇ, ୨୦୧୩ରେ, ବିହାରର ତୀର୍ଥସ୍ଥାନ ବୋଧଗୟାରେ ଥିବା ପବିତ୍ର ବୌଦ୍ଧ ମନ୍ଦିର ମଧ୍ୟରୁ ଗୋଟିଏରେ ଆତଙ୍କ ଖେଳିଯାଇଥିଲା। ହଠାତ୍ ମହାବୋଧି ମନ୍ଦିର ପରିସରରେ ଏକ ସିରିଜ ବିସ୍ଫୋରଣ ଘଟିଥିଲା। ବିସ୍ଫୋରଣରେ ଦୁଇ ଜଣ ସନ୍ୟାସୀ ଆହତ ହୋଇଥିଲେ। ଏହି ମାମଲାରେ ସମସ୍ତ ପାଞ୍ଚ ଜଣ ଅଭିଯୁକ୍ତ ଇଣ୍ଡିଆନ ମୁଜାହିଦ୍ଦିନର ଆତଙ୍କବାଦୀ ସଂଗଠନର।

୨୦୧୩ ହାଇଦ୍ରାବାଦର ଡବଲ୍ ବିସ୍ଫୋରଣ-୨୧ ଫେବୃଆରୀ, ୨୦୧୩ରେ ହାଇଦ୍ରାବାଦର ଦିଲସୁଖନଗର ଅଞ୍ଚଳରେ ହୋଇଥିଲା ବିସ୍ଫୋରଣ। ୧୮ ଜଣଙ୍କର ହୋଇଥିଲା ମୃତ୍ୟୁ , ୧୩୧ ଜଣ ଆହତ ହୋଇଥିଲେ । ଦ୍ୱିତୀୟ ବିସ୍ଫୋରଣ କିଛି ସେକେଣ୍ଡ ପରେ ସେହି ଅଞ୍ଚଳର ଏକ ଦୋକାନ ନିକଟରେ ହୋଇଥିଲା। ବିସ୍ଫୋରଣ ସହିତ ଜଡିତ ଦୁଇଟି ମାମଲା ସେହି ବର୍ଷ ଗୃହ ମନ୍ତ୍ରଣାଳୟ ଦ୍ୱାରା ତଦନ୍ତ ପାଇଁ NIAକୁ ସ୍ଥାନାନ୍ତର କରାଯାଇଥିଲା।

୨୦୧୧ ମୁମ୍ବାଇ ଟ୍ରିପଲ୍ ବିସ୍ଫୋରଣ-୧୩ ଜୁଲାଇ, ୨୦୧୧ରେ ମୁମ୍ବାଇର ଦାଦର, ଜାଭେରୀ ବଜାର ଏବଂ ଅପେରା ହାଉସରେ ତିନୋଟି ହୋଇଥିଲା ବିସ୍ଫୋରଣ। ଯେଉଁଥିରେ ୨୭ଜଣଙ୍କର ମୃତ୍ୟୁ ହୋଇଥିଲା ଏବଂ ୧୦୦ ରୁ ଅଧିକ ଆହତ ହୋଇଥିଲେ। ଏହି ବିସ୍ଫୋରଣ ପାଇଁ ୧୨ ଜଣଙ୍କୁ ଗିରଫ କରିଥିଲା।

୨୦୦୮ ଦିଲ୍ଲୀ ସିରିଏଲ ବୋମା ବିସ୍ଫୋରଣ-ସେପ୍ଟେମ୍ବର ୧୩, ୨୦୦୮ରେ, ରାଜଧାନୀ କାରୋଲ ବାଗ, କନଟ୍ ପ୍ଲେସ୍ ଏବଂ ଗ୍ରେଟର କୈଳାସରେ ବିଭିନ୍ନ ସ୍ଥାନରେ ସିରିଏଲ ବୋମା ବିସ୍ଫୋରଣ ଘଟିଥିଲା। ଏଥିରେ ୨୬ ଜଣଙ୍କର ମୃତ୍ୟୁ ହୋଇଥିଲା ଏବଂ ୧୩୫ ଜଣ ଆହତ ହୋଇଥିଲେ। ଏହା ସହିତ, ତିନୋଟି ବୋମା ମଧ୍ୟ ଚିହ୍ନଟ କରାଯାଇ ନିଷ୍କ୍ରିୟ କରାଯାଇଥିଲା।

୨୦୦୬ ମୁମ୍ବାଇ ଟ୍ରେନ୍ ବିସ୍ଫୋରଣ-୧୧ ଜୁଲାଇ, ୨୦୦୬ରେ। ସାତୋଟି ପଶ୍ଚିମ ଉପନଗରୀୟ ରେଳବାଇ ଓ ମୁମ୍ବାଇ ଲୋକାଲ୍ ଟ୍ରେନ୍ କୋଚରେ ଏକ ସିରିଜ୍ ବୋମା ବିସ୍ଫୋରଣ ହୋଇଥିଲା। ଯେଉଁଥିରେ ୧୮୯ ଜଣଙ୍କର ମୃତ୍ୟୁ ହୋଇଥିଲା। ୮୨୪ ଜଣ ଆହତ ହୋଇଥିଲେ। ସନ୍ଧ୍ୟା ପ୍ରାୟ ୬:୩୦ ସମୟରେ, ଭିଡ଼ ଥିବା ଟ୍ରେନଗୁଡ଼ିକରେ ବିସ୍ଫୋରଣ ଘଟିଥିଲା। ବୋମାଗୁଡ଼ିକୁ ପ୍ରେସର କୁକର ଭିତରେ ରଖାଯାଇଥିଲା।

ଦିଲ୍ଲୀରେ କେବେ କେବେ ହୋଇଛି ବିସ୍ଫୋରଣ?

• ୨୦୧୧ ମେ ୨୫ରେ ଦିଲ୍ଲୀର ହାଇକୋର୍ଟ ପାର୍କିଂରେ ବିସ୍ଫୋରଣ ହୋଇଥିଲା ଓ ୧୧ ଜଣଙ୍କ ମୃତ୍ୟୁ ହୋଇଥିଲା ।
• ୨୦୦୮ ସେପ୍ଟେମ୍ୱର ୨୭ରେ ମେହରୋଲୀର ଫ୍ଲାଓର ମାର୍କେଟରେ ବିସ୍ଫୋରଣ ହୋଇଥିଲା,ଯେଉଁଥିରେ ୩ ଜଣଙ୍କ ମୃତ୍ୟୁ ହୋଇଥିଲା ।
• ୨୦୦୮ ସେପ୍ଟେମ୍ୱର ୧୩ରେ କରୋଲ ବାଗର ଗଫ୍ଫାର ମାର୍କେଟ,କନଟ୍ ପ୍ଲେସ୍ ଓ ଗ୍ରେଟର କୈଳାସରେ ୫ ବିସ୍ଫୋରଣ ହୋଇଥିଲା । ଏଥିରେ ୩୦ ଜଣଙ୍କ ମୃତ୍ୟୁ ହୋଇଥିଲା ।
• ୨୯ ଅକ୍ଟୋବର ୨୦୦୫ରେ ସରୋଜିନୀ ନଗର,ପହରଗଞ୍ଜ ଏବଂ ଗୋବିନ୍ଦପୁରୀରେ ତିନୋଟି ବିସ୍ଫୋରଣ ଘଟି62ଜଣଙ୍କର ମୃତ୍ୟୁ ଘଟିଥିଲା ।
• ୨୨ ମଇ ୨୦୦୫ରେ,ଲିବର୍ଟି ଏବଂ ସତ୍ୟମ ସିନେମା ହଲରେ ଦୁଇଟି ବିସ୍ଫୋରଣ ଘଟିଥିଲା,ଯେଉଁଥିରେ ଜଣେ ବ୍ୟକ୍ତିଙ୍କ ମୃତ୍ୟୁ ହୋଇଥିଲା ।
• ୧୪ ଏପ୍ରିଲ ୨୦୦୬ରେ ଜାମା ମସଜିଦ ପରିସରରେ ଦୁଇଟି ବିସ୍ଫୋରଣ ଘଟିଥିଲା ।
• ୨୭ ଫେବ୍ରୁଆରୀ ୨୦୦୦ରେ,ପାହାରଗଞ୍ଜରେ ବିସ୍ଫୋରଣ ଘଟିଥିଲା ।
• ୧୬ ମାର୍ଚ୍ଚ ୨୦୦୦ରେ ସଦର ବଜାରରେ ଏକ ବିସ୍ଫୋରଣ ହୋଇଥିଲା ।
• ୧୮ ଜୁନ୍ ୨୦୦୦ରେ ଲାଲକିଲ୍ଲା ନିକଟରେ ଦୁଇଟି ଶକ୍ତିଶାଳୀ ବିସ୍ଫୋରଣ ଘଟିଥିଲା,ଯେଉଁଥିରେ ୨ ଜଣଙ୍କର ମୃତ୍ୟୁ ହୋଇଥିଲା ।
• ୩୦ ଡିସେମ୍ବର ୧୯୯୭ରେ,ପଞ୍ଜାବୀ ବାଗ ନିକଟରେ ଏକ ବସରେ ବୋମା ବିସ୍ଫୋରଣ ହୋଇଥିଲା,ଯେଉଁଥିରେ ଚାରି ଜଣଙ୍କର ମୃତ୍ୟୁ ହୋଇଥିଲା ।
• ୩୦ ନଭେମ୍ବର ୧୯୯୭ରେ ଲାଲକିଲ୍ଲା ନିକଟରେ ବିସ୍ଫୋରଣ ଘଟିଥିଲା,ଯେଉଁଥିରେ ୩ ଜଣଙ୍କର ମୃତ୍ୟୁ ହୋଇଥିଲା ।
• ୨୬ ଅକ୍ଟୋବର ୧୯୯୭ରେ,କାରୋଲବାଗ ବଜାରରେ ଦୁଇଟି ବିସ୍ଫୋରଣ ଘଟିଥିଲା,ଯେଉଁଥିରେ ଜଣେ ବ୍ୟକ୍ତିଙ୍କ ମୃତ୍ୟୁ ହୋଇଥିଲା।
• ୧୮ ଅକ୍ଟୋବର ୧୯୯୭ରେ,ରାଣୀ ବାଗ ମାର୍କେଟରେ ଦୁଇଟି ବିସ୍ଫୋରଣ ଘଟିଥିଲା,ଯେଉଁଥିରେ ଜଣେ ବ୍ୟକ୍ତିଙ୍କ ମୃତ୍ୟୁ ହୋଇଥିଲା ।
• ୧୦ ଅକ୍ଟୋବର ୧୯୯୭ରେ,ଶାନ୍ତିଭାନ,କାଉଡିଆ ପୁଲ ଏବଂ କିଙ୍ଗସୱେ କ୍ୟାମ୍ପ ଅଞ୍ଚଳରେ ତିନୋଟି ବିସ୍ଫୋରଣ ଘଟିଥିଲା,ଯେଉଁଥିରେ ଜଣେ ମୃତ୍ୟୁବରଣ କରିଥିଲେ ।
• ୧ ଅକ୍ଟୋବର ୧୯୯୭ରେ ସଦର ବଜାର ନିକଟରେ ଦୁଇଟି ବୋମା ବିସ୍ଫୋରଣ ଘଟିଥିଲା ।
• ୨୫ ମଇ ୧୯୯୬ରେ ଲାଜପତ ନଗର ସେଣ୍ଟ୍ରାଲ୍ ମାର୍କେଟରେ ବୋମା ବିସ୍ଫୋରଣ ଘଟିଥିଲା,ଯେଉଁଥିରେ ୧୬ ଜଣଙ୍କର ମୃତ୍ୟୁ ହୋଇଥିଲା ।