ଇଥିଓପିଆରେ ମାରବର୍ଗ ଭାଇରସ, ୯ ରୋଗୀଙ୍କ ଠାରେ ଚିହ୍ନଟ, ବଡ଼ ପଦକ୍ଷେପ ନେଲା WHO

ନୂଆଦିଲ୍ଲୀ:ବିଶ୍ୱ କରୋନା ଭାଇରସ୍ ମହାମାରୀକୁ ଭୁଲି ସାରିଛି। ଏହି ସମୟରେ ମୁଣ୍ଡ ଟେକିଲାଣି ଆଉ ଏକ ନୂଆ ଭାଇରସ୍। ଏହି ଭାଇରସର ନାଁ "ମାରବର୍ଗ"। ଏହାର ପ୍ରଥମ ମାମଲା ପୂର୍ବ ଆଫ୍ରିକୀୟ ଦେଶ ଇଥିଓପିଆରେ ରିପୋର୍ଟ କରାଯାଇଛି। ଗଣମାଧ୍ୟମ ରିପୋର୍ଟ ଅନୁଯାୟୀ, ଇଥିଓପିଆ ପ୍ରଥମ ଥର ପାଇଁ ମାରବର୍ଗ ଭାଇରସ୍ ଚିହ୍ନଟ ହୋଇଥିବା ସ୍ପଷ୍ଟ ହୋଇଛି।

ସ୍ୱାସ୍ଥ୍ୟ ମନ୍ତ୍ରଣାଳୟ ଅନୁଯାୟୀ, ଦକ୍ଷିଣ ସୁଦାନ ସୀମା ନିକଟବର୍ତ୍ତୀ ଓମୋ ଅଞ୍ଚଳରେ ନଅ ଜଣ ଲୋକ ଆକ୍ରାନ୍ତ ହୋଇଛନ୍ତି। ସ୍ୱାସ୍ଥ୍ୟ କର୍ମୀମାନେ କିଛି ରୋଗୀଙ୍କ ମଧ୍ୟରେ ଭାଇରାଲ୍ ହେମୋରେଜିକ୍ ଜ୍ୱର ସହିତ ସମାନ ଲକ୍ଷଣ ଦେଖିଛନ୍ତି।

ବିଶ୍ୱ ସ୍ୱାସ୍ଥ୍ୟ ସଂଗଠନ (ଡବ୍ଲୁଏଚ୍ଓ) ମହାନିର୍ଦ୍ଦେଶକ ଟେଡ୍ରୋସ୍ ଆଧାନୋମ୍ କହିଛନ୍ତି ଯେ ଇଥିଓପିଆର ସ୍ୱାସ୍ଥ୍ୟ ସଂସ୍ଥାଗୁଡ଼ିକ ତ୍ୱରିତ କାର୍ଯ୍ୟାନୁଷ୍ଠାନ ନେବାକୁ କୁହାଯାଇଛି। ଏହି ତ୍ୱରିତ କାର୍ଯ୍ୟାନୁଷ୍ଠାନ ଦେଶର ପ୍ରାରମ୍ଭିକ ପର୍ଯ୍ୟାୟରେ ସଙ୍କଟକୁ ନିୟନ୍ତ୍ରଣ କରିବାରେ ସହାୟକ ହେବ।

ପ୍ରକୋପ ଦେଖାଦେବା ପରଠାରୁ, WHO ଦଳ ଇଥିଓପିଆନ କର୍ତ୍ତୃପକ୍ଷଙ୍କ ସହିତ ସଂକ୍ରମିତ ଲୋକଙ୍କୁ ଚିକିତ୍ସା କରିବା, ସମ୍ଭାବ୍ୟ ସଂସ୍ପର୍ଶରେ ଆସିଥିବା ବ୍ୟକ୍ତିଙ୍କୁ ଚିହ୍ନଟ କରିବା ଏବଂ ଅନ୍ୟ ଅଞ୍ଚଳକୁ ଭାଇରସ ବ୍ୟାପିବାକୁ ରୋକିବା ପାଇଁ ଚେଷ୍ଟା କରୁଛି। ଆଫ୍ରିକା CDCର ନିର୍ଦ୍ଦେଶକ ଡକ୍ଟର ଜନ୍ ନେକେଙ୍ଗାସୋଙ୍ଗ କହିଛନ୍ତି ଯେ ଏହି ବ୍ୟାପିବା ବିଶେଷ ଭାବରେ ଚିନ୍ତାଜନକ। କାରଣ ଏହା ଦକ୍ଷିଣ ସୁଦାନ ସୀମା ନିକଟରେ ଅଛି। ଏହାର ସ୍ୱାସ୍ଥ୍ୟ ବ୍ୟବସ୍ଥା ସମ୍ପୂର୍ଣ୍ଣ ଦୁର୍ବଳ।

ମାରବର୍ଗ ଭାଇରସ ଏବଂ ଏହାର ଲକ୍ଷଣ କ’ଣ?

ମାରବର୍ଗ ଭାଇରସ ଇବୋଲା ଭାଇରସ ଫାମିଲିର। ଏବଂ ଏଥିରେ ଗୁରୁତର ରକ୍ତସ୍ରାବ ସହ ଜ୍ୱର ହୁଏ। ଉଚ୍ଚ ଜ୍ୱର, ମୁଣ୍ଡବିନ୍ଧା, ମାଂସପେଶୀ ଯନ୍ତ୍ରଣା, ପୋଡ଼ାଜଳା ଏବଂ ଆଭ୍ୟନ୍ତରୀଣ କିମ୍ବା ବାହ୍ୟ ରକ୍ତସ୍ରାବ ହୋଇଥାଏ। ସଂକ୍ରମିତ ବ୍ୟକ୍ତିମାନଙ୍କର ଶରୀର ତରଳ ପଦାର୍ଥ କିମ୍ବା ବିଛଣା ଏବଂ ପୋଷାକ ପରି ଦୂଷିତ ବସ୍ତୁ ସହିତ ସମ୍ପର୍କ ମାଧ୍ୟମରେ ଭାଇରସ ବ୍ୟାପିଥାଏ।

ବର୍ତ୍ତମାନ ମାରବର୍ଗ ଭାଇରସ ପାଇଁ କୌଣସି ଅନୁମୋଦିତ ଟୀକା କିମ୍ବା ନିର୍ଦ୍ଦିଷ୍ଟ ଚିକିତ୍ସା ନାହିଁ। ରୋଗୀଙ୍କ ପାଇଁ ଚିକିତ୍ସା କେବଳ ଲକ୍ଷଣ ଉପରେ ଆଧାରିତ। ଇଥିଓପିଆନ ହେଲ୍ଥ ଟିମ୍ ସଂକ୍ରମିତ ଲୋକଙ୍କୁ ପୃଥକ ଏବଂ ଚିକିତ୍ସା କରିଛନ୍ତି। ସେମାନେ ସମ୍ପ୍ରଦାୟ-ବ୍ୟାପୀ ସ୍କ୍ରିନିଂ ମଧ୍ୟ କରୁଛନ୍ତି।