ପୋଲିସ ଓ ଗଞ୍ଜେଇ ମାଫିଆଙ୍କ ଲୁଚକାଳି : ୭ ମାସ ପରେ ଗଞ୍ଜେଇ ମାମଲାରେ ଧରାପଡିଲେ ରେଙ୍ଗାଲି ସରପଞ୍ଚଙ୍କ ସ୍ୱାମୀ

ବୌଦ୍ଧ ୧୬।୧୦: ଗଞ୍ଜେଇ ଚାଲାଣ ମାମଲାରେ ସରପଞ୍ଚଙ୍କ ସ୍ବାମୀ ଗିରଫ । ରେଙ୍ଗାଲି ପଞ୍ଚାୟତ ସରପଞ୍ଚଙ୍କ ସ୍ବାମୀ ପ୍ରମୋଦ ରଣା ଗିରଫ । ପ୍ରମୋଦଙ୍କୁ ଗିରଫ କଲା କଣ୍ଟାମାଳ ପୋଲିସ । ମାମଲାର ୭ ମାସ ପରେ ଗିରଫ ହେଲା ଅଭିଯୁକ୍ତ । ଗତ ମାର୍ଚ୍ଚ ମାସରେ ବୌଦ୍ଧ ବ୍ରିଜ୍ ଛକ ଠାରେ ୮ କ୍ଵିଣ୍ଟାଲ ୩୭ କେଜି ଗଞ୍ଜେଇ ଧରିଥିଲା ପୋଲିସ । ଗଞ୍ଜେଇ ଛାଡ଼ି ଫେରାର ମାରିଥିଲେ ଅଭିଯୁକ୍ତ ।

ସୂଚନାଯୋଗ୍ୟ ଯେ, ଗତ ମାର୍ଚ୍ଚ ମାସରେ କଣ୍ଟାମାଳ ଅଞ୍ଚକରୁ ବୌଦ୍ଧ ଆଠମଲ୍ଲିକ ଦେଇ କୋଲକାତାକୁ ଏକ ଗାଡ଼ିରେ ଗଞ୍ଜେଇ ଚୋରା ଚାଲାଣ ହେଉଥିଲା । ସେହି ସମୟରେ ବୌଦ୍ଧ ପୋଲିସ ଗଞ୍ଜେଇ ଭର୍ତ୍ତି ଗାଡିକୁ ବ୍ରିଜ୍ ଛକରେ ଅଟକାଇବାରୁ ଡ୍ରାଇଭର ଓ ମାଫିଆ ଉଭୟେ ଦୌଡ଼ି ଫେରାର ମାରିଥିଲେ । ଯାଞ୍ଚ ପରେ ଉକ୍ତ ଗାଡ଼ିରୁ ୮ କ୍ୱିଣ୍ଟାଲ ୩୭ କେଜି ଗଞ୍ଜେଇ ମିଳିଥିଲା । ଏ ନେଇ ବୌଦ୍ଧ ଥାନାରେ ଏକ ମାମଲା ରୁଜୁ କରି ତଦନ୍ତ କଲା ପରେ ଏହା କଣ୍ଟାମାଳ ଥାନା ରେଙ୍ଗାଲି ସରପଞ୍ଚଙ୍କ ସ୍ୱାମୀ ପ୍ରମୋଦ ରଣାଙ୍କ ଗଞ୍ଜେଇ ବୋଲି ଜାଣିବାକୁ ପାଇଥିଲା ପୋଲିସ । ପ୍ରମୋଦକୁ ଖୋଜାଖୋଜି କରିଥିଲେ ମଧ୍ୟ ତାଙ୍କୁ ଧରିବାରେ ବିଫଳ ହୋଇଥିଲା ପୋଲିସ । ତେବେ ଦୀର୍ଘ ୭ ମାସର ପୋଲିସ ଓ ଗଞ୍ଜେଇ ମାଫିଆର ଲୁଚକାଳି ପରେ ଶେଷରେ ଧରାପଡ଼ିଛି ଗଞ୍ଜେଇ ମାଫିଆ । କଣ୍ଟାମାଳ ଥାନା ଅଧିକାରୀ ରଞ୍ଜିତ କୁମାର ମୁନିଙ୍କ ନେତୃତ୍ୱରେ ଏକ ପୋଲିସ ଟିମ୍ ପ୍ରମୋଦକୁ କଣ୍ଟାମାଳ ସ୍ଥିତ ତାଙ୍କ ପେଟ୍ରୋଲ ପମ୍ପ ନିକଟରୁ ଗିରଫ କରିଛି ଏବଂ ଗିରଫ ପରେ ପ୍ରମୋଦଙ୍କୁ ବୌଦ୍ଧ ଥାନାରେ ହାଜର କରାଯାଇଛି । ତେବେ ପ୍ରମୋଦକୁ କୋର୍ଟ ଚାଲାଣ କରାଯିବା ନେଇ ସୂଚନା ମିଳିଛି ।