ନୂଆଦିଲ୍ଲୀ: ଆଇପିଏଲର ୪୮ତମ ମୁକାବିଲାରେ ମୁହାଁମୁହିଁ ହୋଇଛନ୍ତି ଦିଲ୍ଲୀ କ୍ୟାପିଟାଲ୍ସ ଓ କୋଲକାତା ନାଇଟ୍ ରାଇଡର୍ସ । ଅରୁଣ ଜେଟଲୀ ଷ୍ଟାଡିୟମରେ ଏହି ମ୍ୟାଚ୍ ଖେଳାଯାଉଥିବା ବେଳେ ପ୍ରଥମ ଇନିଂସରେ ଦିଲ୍ଲୀକୁ ୨୦୫ ରନ୍ର ଟାର୍ଗେଟ ଦେଇଛି କେକେଆର୍ । ଏହି ମ୍ୟାଚରେ ଅଙ୍ଗ୍ରୀସ୍ ରଘୁବଂଶୀ ସର୍ବାଧିକ ୪୪ରନ୍ କରିଛନ୍ତି । ସେପଟେ ଦିଲ୍ଲୀ ପକ୍ଷରୁ ମିଚେଲ୍ ଷ୍ଟାର୍କଙ୍କୁ ଶେଷ ଓଭରରେ ହ୍ୟାଟ୍ରିକ୍ ଓ୍ବିକେଟ୍ ମିଳିଛି ।
ଟସ୍ ଜିତି ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିଲା ଦିଲ୍ଲୀ କ୍ୟାପଟାଲ୍ସ । ଫଳରେ ବ୍ୟାଟିଂ କରିବାକୁ ପଡ଼ିଆକୁ ଓହ୍ଲାଇଥିଲା କୋଲକାତା ନାଇଟ୍ ରାଇଡର୍ସ । ଦୁଇ ଓପନର ସୁନିଲ୍ ନାରିନ୍ ଓ ରହମନୁଲ୍ଲା ଗୁରବାଜ୍ ପ୍ରଥମରୁ ଦିଲ୍ଲୀ ବୋଲରଙ୍କ ଉପରେ ପ୍ରହାର କରିଥିଲେ । ହେଲେ ତୃତୀୟ ଓଭରରେ ୪୮ ସ୍କୋରରେ କେକେଆରକୁ ଲାଗିଥିଲା ପ୍ରଥମ ଝଟକା । ରହମନୁଲ୍ଲା ଗୁରବାଜ୍ ୧୨ ବଲ୍ରେ ମାତ୍ର ୨୬ ରନ୍ କରି ଆଉଟ୍ ହୋଇଥିଲେ । ଏହାପରେ ମୋର୍ଚ୍ଚା ସମ୍ଭାଳି ନେଇଥିଲେ ଅଧିନାୟକ ଅଜଙ୍କିଆ ରାହାଣେ । ହେଲେ ସୁନିଲ୍ ନାରିନ୍ ମାତ୍ର ୨୭ ରନ୍ କରି ପାଭେଲିୟନକୁ ଫେରିଥିଲେ । ୮୫ ରନରେ କେକେଆରର ଦ୍ବିତୀୟ ବିପର୍ଯ୍ୟୟ ଘଟିଥିଲା । ଏହାପରେ ଅଷ୍ଟମ ଓଭରରେ ୨୬ ରନ୍ କରି ଅକ୍ଷର ପଟେଲଙ୍କ ଶିକାର ହୋଇଥିଲେ ରାହାଣେ । ୧୦ ଓଭର ବେଳକୁ କୋଲକାତାର ୧୧୭ ରନରେ ୪ ଓ୍ବିକେଟ୍ ପଡ଼ିସାରିଥିଲା । ପରେ ମୋର୍ଚ୍ଚା ସମ୍ଭାଳିଥିଲେ ରିଙ୍କୁ ସିଂହ ଓ ଅଙ୍ଗ୍ରିସ୍ ରଘୁବଂଶୀ । ଦୁହେଁ ୬୧ ରନ୍ର ଭାଗିଦାରୀ ଇନିଂସ ଖେଳିଥିଲେ । ରଘୁବଂଶୀ ୪୪ ରନ୍ ଓ ରିଙ୍କୁ ସିଂହ ୩୬ ରନ ସଂଗ୍ରହ କରି ଦଳୀୟ ସ୍କୋରରୁ କୋଡିଏ ଓଭରରେ ୨୦୪ ରନ୍ରେ ପହଞ୍ଚାଇଥିଲେ । ତେବେ ଦିଲ୍ଲୀ କ୍ୟାପିଟାନ୍ସକୁ ଏହି ମ୍ୟାଚ୍ ଜିତିବାକୁ ହେଲେ ୨୦୫ ରନ୍ କରିବାକୁ ପଡ଼ିବ ।
