VIDEO: ମରୁଭୂମିର ଦେଶ ସାଉଦି ଆରବରେ ତୁଷାରପାତ, ୩୦ ବର୍ଷ ପରେ ସାମ୍ନାକୁ ଆସିଲା ବିରଳ ଦୃଶ୍ୟ

ନୂଆଦିଲ୍ଲୀ: ସାଉଦି ଆରବରେ ଅଭୂତପୂର୍ବ ତୁଷାରପାତ ହୋଇଛି । ତାବୁକ ପ୍ରଦେଶର ପର୍ବତମାଳାର ଭୂଦୃଶ୍ୟକୁ ନାଟକୀୟ ଭାବରେ ପରିବର୍ତ୍ତନ କରିଛି। ପ୍ରାୟ ୨୬୦୦ ମିଟର ଉଚ୍ଚତାରେ ଅବସ୍ଥିତ ଜେବେଲ୍ ଅଲ୍-ଲାୱଜ୍ ଉପରେ ଦେଖିବାକୁ ମିଳିଛି ଅବିଶ୍ବସନୀୟ ଦୃଶ୍ୟ । ଟ୍ରୋଜାନା ଗାଁ ଧରା ବରଫ ଚାଦରରେ ଆଚ୍ଛାଦିତ ହୋଇଛି । ତା ସହିତ ହାଲୁକା ବର୍ଷା ବି ହୋଇଛି । ଏହା ଏହି ଅଞ୍ଚଳ ପାଇଁ ଏକ ବିରଳ ଘଟଣା।

ଯେଉଁଠି କେବେ ତାପାମାତ୍ରା ଖସୁନଥିଲା, ସେଠାରେ ଏବେ ପାରଦ ଶୂନ ତଳକୁ ଖସିଆସୁଛି । ଏ ସ୍ଥିତି ଦିନେ କି ଦୁଇ ଦିନ ପାଇଁ ନୁହେଁ, ବରଂ ଗତ କିଛି ଦିନ ହେବ ଏହା ଦେଖିବାକୁ ମିଳିଛି । ବିଭିନ୍ନ ଅଞ୍ଚଳରେ ଶୀତର ଲହରୀ ଖେଳି ଯାଇଛି, ବର୍ଷା ବି ଲାଗି ରହିଛି । ବିର ବିନ୍ ହାର୍ମାସ, ଅଲ-ଆଇନାହ, ଉମ୍ମାର, ଆଲଉଲା, ଶାକୱା ଏବଂ ଏହାର ଆଖାପାଖ ଅଞ୍ଚଳରେ ମଧ୍ୟମ ଧରଣର ବର୍ଷା ରେକର୍ଡ କରାଯାଇଛି। ରିୟାଦ, କାସିମ ଏବଂ ପୂର୍ବ ଅଞ୍ଚଳରେ ପ୍ରବଳ ବର୍ଷା ହୋଇଛି।

ସାଉଦି ଆରବରେ ପାଗର ଏଭଳି ପରିବର୍ତ୍ତନ ସାରା ବିଶ୍ବର ଦୃଷ୍ଟି ଆକର୍ଷଣ କରିଛି । ହଠାତ ଜଳବାୟୁ ପରିବର୍ତ୍ତନ ଲାଗି ଅପ୍ରସ୍ତୁତ ଇଲାକରେ ଏଭଳି ବିପରୀତ ପାଣିପାଗ ଚିନ୍ତା ବଢ଼ାଇଛି । ସେପଟେ ଥଣ୍ଡା ପବନ ମେଘ ସହ ମିଶିଯିବା ପରେ ସ୍ଥିତି ବିଗିଡ଼ିଛି ବୋଲି କହିଛି ଦେଶର ପାଣିପାଗ କେନ୍ଦ୍ର । ସାଉଦି ମରୁଭୂମିରେ ବରଫ ଆଚ୍ଛାଦିତ ପର୍ବତଗୁଡ଼ିକର ଫଟୋ ଏବଂ ଭିଡିଓ ସୋସିଆଲ ମିଡିଆରେ ଦୃଷ୍ଟି ଆକର୍ଷଣ କରିଛି । ଫଳରେ ମରୁଭୂମିରେ ତୁଷାରପାତ ଦେଖିବାକୁ ଜମୁଛି ଲୋକଙ୍କ ଭିଡ଼ । ପାଣିପାଗ ବିଜ୍ଞାନୀମାନେ ଏହି ଘଟଣା ପାଇଁ ବିଶେଷ ବାୟୁମଣ୍ଡଳୀୟ ପରିସ୍ଥିତିକୁ ଦାୟୀ କରିଛନ୍ତି। ସାଉଦି ଆରବ ଏବଂ ପଡ଼ୋଶୀ ଦେଶଗୁଡ଼ିକରେ ଏପରି ଅସାଧାରଣ ଘଟଣା ପରିବର୍ତ୍ତିତ ଜଳବାୟୁର ଘାତକ ପରିଣାମ ଆଡ଼କୁ ଇସାରା କରୁଛି ।

Snow blanketed Saudi Arabia this week, transforming the usually rugged, desert-framed mountains into a winter landscape.pic.twitter.com/0lMIazJe9b

— Massimo (@Rainmaker1973) December 19, 2025

ସାଉଦି ଆରବରେ ବିରଳ ତୁଷାରପାତ ଘଟଣା ବୃଦ୍ଧି ପାଉଛି । ଏହା ପାଣିପାଗର ପରିବର୍ତ୍ତନର ଆଲୋଚନାକୁ ପୁଣିଥରେ ଆରମ୍ଭ କରିଛି । ଏହି ଘଟଣା ଗତ କିଛି ମାସ ମଧ୍ୟରେ ଅନେକ ଅଞ୍ଚଳରେ ଅନୁଭବ ହୋଇଛି। UAEରେ ପ୍ରବଳ ବର୍ଷାର ଆଶଙ୍କା ସୃଷ୍ଟି ହୋଇଛି । ୟୁରୋପ ଏବଂ ଉତ୍ତର ଆଫ୍ରିକାର କିଛି ସ୍ଥାନରେ ଅସ୍ୱାଭାବିକ ତୁଷାରପାତ ମଧ୍ୟ ମଣିଷ ସମାଜକୁ ଜଳବାୟୁ ପରିବର୍ତ୍ତନ ଆଡ଼କୁ ଧ୍ୟାନ ଦେବାକୁ ବାଧ୍ୟ କରିଛି ।