ମୁମ୍ବାଇ: ସପ୍ତାହର ୭ଦିନ କାମ କରିବା ନେଇ ବଲିଉଡ ଅଭିନେତ୍ରୀ ଦୀପିକା ପାଦୁକୋନ ଗତକାଲି(୯ ଜାନୁଆରୀ ୨୦୨୫) ଏଲ୍ ଆଣ୍ଡ ଟି କମ୍ପନୀର ସିଇଓ ଏସଏନ୍ ସୁବ୍ରମଣିୟମଙ୍କୁ ସମାଲୋଚନା କରିଥିଲେ। ସିଇଓ ଚାରିଆଡ଼ୁ ସମାଲୋଚନାର ଶିକାର ହେବା ପରେ କମ୍ପାନୀ ମଧ୍ୟ ସୁବ୍ରମଣିୟମଙ୍କ ସମର୍ଥନରେ ବାହାରିଥିଲା। ହେଲେ ଦୀପିକା କମ୍ପାନୀକୁ ମଧ୍ୟ ଛାଡ଼ି ନାହାନ୍ତି। ଇନ୍ଷ୍ଟାରେ ପୋଷ୍ଟ କରି ଏଲ ଆଣ୍ଡ ଟି କମ୍ପାନୀକୁ କଡ଼ା ସମାଲୋଚନା କରିଛନ୍ତି ଦୀପିକା ପାଦୁକୋନ। ସେମାନେ ପରିସ୍ଥିତିକୁ ଆହୁରି ଖରାପ କରିଦେଉଛନ୍ତି ବୋଲି ଦୀପିକା କହିଛନ୍ତି।
ସିଇଓ ଏସଏନ୍ ସୁବ୍ରମଣିୟମ ସପ୍ତାହକୁ ୭ ଦିନ ୯୦ ଘଣ୍ଟା କାମ କରିବାକୁ କର୍ମଚାରୀଙ୍କୁ ପରାମର୍ଶ ଦେଇଥିଲେ। ରବିବାର ବି କାମ କରିବାକୁ ଆସିଲେ ଭଲ ହୁଅନ୍ତା ବୋଲି କହିଥିଲେ। ଏହାପରେ ତାଙ୍କୁ ଚାରିଆଡ଼ୁ ସମାଲୋଚନାର ଶିକାର ହେବାକୁ ପଡ଼ିଥିଲା।
ଫଳରେ କମ୍ପାନୀର ସିଇଓଙ୍କ ସମର୍ଥନରେ କମ୍ପାନୀ ପ୍ରବକ୍ତାଙ୍କ ପକ୍ଷରୁ ଏକ ବିବୃତ୍ତି ଜାରି କରାଯାଇଥିଲା। ଯେଉଁଥିରେ କୁହାଯାଇଥିଲା “ରାଷ୍ଟ୍ର ନିର୍ମାଣ ଆମ ଜନାଦେଶର ମୂଳ ଲକ୍ଷ୍ୟ। ୮ ଦଶନ୍ଧିରୁ ଅଧିକ ସମୟ ଧରି, ଆମେ ଭାରତର ଭିତ୍ତିଭୂମି, ଶିଳ୍ପ ଏବଂ ପ୍ରଯୁକ୍ତିବିଦ୍ୟା କ୍ଷମତାକୁ ଆକାର ଦେଇ ଆସିଛୁ। ଏହି ଦଶନ୍ଧୀ ଭାରତର ବୋଲି ଆମେ ବିଶ୍ୱାସ କରୁ। ଏକ ବିକଶିତ ରାଷ୍ଟ୍ର ହେବାର ଆମର ଦୃଷ୍ଟିକୋଣକୁ ସାକାର କରିବା ପାଇଁ ପ୍ରଗତିକୁ ଆଗେଇ ନେବା ପାଇଁ ସାମୂହିକ ସମର୍ପଣ ଏବଂ ପ୍ରୟାସର ଆବଶ୍ୟକ ହେଉଛି।”
କମ୍ପାନୀର ଏଭଳି ବିବୃତ୍ତିକୁ ସମାଲୋଚନା କରି ଦୀପିକା ସୋସିଆଲ୍ ମିଡିଆରେ ଏକ ପୋଷ୍ଟ କରିଛନ୍ତି। ସେ ଲେଖିଛନ୍ତି “ ସେମାନେ ଏହାକୁ ଆହୁରି ଖରପା କରି ଦେଲେ।” ପୂର୍ବ ପୋଷ୍ଟରେ ସୁବ୍ରମଣିୟମଙ୍କ କଥାକୁ ସମାଲୋଚନା କରି ଦୀପିକା ୱାର୍କ ବାଲାନ୍ସ ଓ ମାନସିକ ସ୍ଥିତି ଉପରେ ଗୁରୁତ୍ୱ ଦେଇଥିଲେ। ଜଣେ ବରିଷ୍ଠ ଅଧିକାରୀ ଏପରି କହିଲେ ବଡ଼ ଆଶ୍ଚର୍ଯ୍ୟ ଲାଗେ ବୋଲି ସେ ଲେଖିଥିଲେ।
